ސަޕްލިމެންޓްރީ ބަޖެޓާއި ގުޅޭގޮތުން އިންކުއަރީ ހެދުމަށް ސައީދު ހުށަހެޅުއްވި މައްސަލަ މާލިއްޔަތު ކޮމިޓީއަށް
އެކޮމިޓީން ނިންމަވާ ގޮތެއްގެ މަތިން މިމައްސަލަ ކުރިޔަށް ގެންދެވޭނެ ކަމަށް ނަޝީދު ވިދާޅުވި
މާވަށު ދާއިރާގެ ޕީއެންސީ މެންބަރު މުހައްމަދު ސައީދު
މިއަހަރުގެ ބަޖެޓަށް 5.8 ބިލިއަން ރުފިޔާ އިތުރު ކުރުމަށް ސަރުކާރުން ހުށަހެޅި ސަޕްލިމެންޓްރީ ބަޖެޓާއި ގުޅޭގޮތުން އިންކުއަރީއެއް ހެދުމަށް މާވަށު ދާއިރާގެ ޕީއެންސީ މެންބަރު މުހައްމަދު ސައީދު ހުށަހަޅުއްވައިފިއެވެ.
ރައްޔިތުންގެ މަޖިލީހުގެ އަންގާރަ ދުވަހުގެ ޖަލްސާ ފައްޓަވަމުން ރިޔާސަތުގައި އިންނެވި މަޖިލީހުގެ ރައީސް، ރައީސް މުހައްމަދު ނަޝީދު ވަނީ ސަޕްލިމެންޓްރީ ބަޖެޓާއި ގުޅޭގޮތުން ކަން ހިނގާ ނުހިނގާ ގޮތް ދެނެގަތުމަށް އެދި އިންކުއަރީއަށް ހެދުމަށް ސައީދު މަޖިލީހުގެ ރައީސަށް ސިޓީއެއް ފޮނުއްވާފައިވާކަމަށް ވިދާޅުވެފައެވެ. އެކަމާއި ގުޅޭގޮތުން ވާހަކަފުޅުދައްކަވަމުން ނަޝީދު ވިދާޅުވީ މިކަން ދިރާސާކުރުމަށް މާލިއްޔަތު ކޮމިޓީއަށް ފޮނުއްވާނެކަމަށެވެ. އެކޮމިޓީން ނިންމަވާ ގޮތެއްގެ މަތިން މިމައްސަލަ ކުރިޔަށް ގެންދެވޭނެ ކަމަށް ނަޝީދު ވިދާޅުވިއެވެ.
އަންނަ އަހަރަށް ލަފާކުރާ ދައުލަތުގެ ބަޖެޓް ހުށަހަޅުއްވަމުން މިއަހަރުގެ ބަޖެޓަށް އިތުރު ފައިސާ ބޭނުންވާކަން ހާމަކުރައްވާ ސަޕްލިމެންޓްރީ ބަޖެޓް ހުށަހަޅުއްވަމުން ފިނޭންސް މިނިސްޓަރު އިބްރާހިމް އަމީރު ވިދާޅުވީ 2022 ވަނަ އަހަރުގެ ބަޖެޓާ ވެސް ކުރިމަތިލީ ބަޖެޓުގެ ޑެފިސިޓް ކުޑަކޮށް ދަރަނީގެ މިންވަރު ކުޑަކުރުމަށް އަމާޒުތަކެއް ކަނޑައަޅައިގެންކަމަށާއި އެހެންނަމަވެސް، މި އަހަރު އިތުރު އިޤްތިސާދީ ގޮންޖެހުންތަކެއް ކުރިމަތިވެއްޖެ ކަމަށެވެ. އެގޮތުން ރަޝިޔާ-ޔޫކްރެއިން ހަނގުރާމައާ އެކު ތެލާއި ތަކެތީގެ އަގު އިންތިހާއަށް މައްޗަށް ދިއުމުގެ ސަބަބުން، ބަޖެޓަށް ބާރުބޮޑުވެފައިވާކަމަށާއި ފިއުލް ސަބްސިޑީއަށް ބަޖެޓުކުރި 342 މިލިއަން ރުފިޔާ، މި އަހަރުގެ ނިޔަލަށް 2.3 ބިލިއަން ރުފިޔާއަށްވުރެ މަތިވާނެކަމަށް އަންދާޒާކުރެވޭކަމަށް އޭނާ ވިދާޅުވިއެވެ. އަމީރު ވިދާޅުވި ގޮތުގައި ބަޖެޓަށް އިތުރުވާ އިތުރުވުން ފައިނޭންސް ކުރާނީ މަޝްރޫޢުތަކަށް ލިބިފައިވާ ލޯނުތަކުންނާއި ޑޮމެސްޓިކް މާކެޓުން ފައިނޭންސިންގ ހޯދައިގެންނެވެ.
މިއަހަރަށް ސަޕްލިމެންޓްރީ ބަޖެޓެއްް މަޖިލީހަށް ހުށަހެޅުމުން މަޖިލީހުގެ ރައީސް، ރައީސް މުޙައްމަދު ނަޝީދު ވަނީ އެކަމާ ފާޑު ވިދާޅުވެފައެވެ. އެގޮތުން އަހަރުގެ ބާކީ އޮތް ނޮވެމްބަރު މަހާއި ޑިސެމްބަރު މަސްތެރޭގައި 5.8 ބިލިއަން ރުފިޔާ ހަރަދުވާނެކަމަށް އަންދާޒާނުކުރެވޭކަމަށާއި މިހާތަނަށް އައިއިރު މިއަހަރުގެ ބަޖެޓަށް އިތުރުވާ ފައިސާއިން ހަރަދުވެފައިވާ މިންވަރު ވެސް ސާފުނުވާކަމަށް އެމަނިކުފާނު ވިދާޅުވިއެވެ.
ގާނޫނު އަސާސީގެ 96 ވަނަ މާއްދާގެ ނ ގައި ވަރަށް ސާފުކޮށް މަޖިލީހުން ހުއްދަދީގެން މެނުވީ މަޖިލީހުން ފާސްކޮށްފައިވާ މިންވަރަށްވުރެ އިތުރަށް ހަރަދުކޮށްގެން ނުވާނެކަމަށް ބަޔާންކޮށްފައިވާކަމަށް ނަޝީދު ވިދާޅުވިއެވެ. އަދި މާލިއްޔަތުގެ ގާނޫނުގެ 32 ވަނަ މާއްދާގެ ބ ގައި ބަޖެޓަށް އިތުރަށް ބޭނުންވާ ފައިސާއެއް މަޖިލީހުން ފާސްކުރުމަށް ސަޕްލިމެންޓްރީ ބަޖެޓެއް ހަދައި އެފައިސާ ބޭނުންވާ ދުވަހެއްގެ އެއް މަސް ދުވަސްކުރިން މަޖިލީހަށް ހުށަހަޅަންޖެހޭކަމަށް ބަޔާންކޮށްފައިވާކަމަށް ނަޝީދު ވިދާޅުވިއެވެ.
މިހެންކަން އޮތް އިރު 2023 ވަނަ އަހަރުގެ ބަޖެޓުގައި 2022 ވަނަ އަހަރަށް އިތުރަށް ބޭނުންވާ ސަޕްލިމެންޓްރީ ބަޖެޓެއް ހިމެނޭނެގޮތެއް ފެނިވަޑައިނުގަންނަވާކަމަށް ނަޝީދު ވިދާޅުވިއެވެ.
އަންނަ އަހަރަށް ލަފާކުރާ ދައުލަތުގެ ބަޖެޓް ދިރާސާކުރި ބަޖެޓް ކޮމިޓީން ވަނީ މިއަހަރުގެ ބަޖެޓަށް އިތުރުކުރުމަށް ފިނޭންސް މިނިސްޓަރު ހުށަހެޅުއްވި ސަޕްލިމެންޓްރީ ބަޖެޓް ފާސްކޮށްފައެވެ. މަޖިލީހުގެ ޖަލްސާއަށް އެޖެންޑާ ކޮށްފައިވަނީ އަންނަ އަހަރުގެ ބަޖެޓާއި ސަޕްލިމެންޓްރީ ބަޖެޓަށް ވަކިވަކިން ވޯޓަށް އަހާގޮތަށެވެ.
