ޔުއެފާ ޗެމްޕިއަންސް ލީގު ގްރޫޕް ސީގެ ފަހު މެޗުގައި ބާސެލޯނާ އިން ވިކްޓޯރިއާ ޕްލެޒެން ބަލިކޮށްފިއެވެ.

ޕްލެޒެންގެ ދަނޑުގައި އަންގާރަ ދުވަހުގެ ރޭ އެ ޓީމާ ދެކޮޅަށް ނުކުތްއިރު ވެސް ބާސެލޯނާ ވަނީ ޗެމްޕިއަންސް ލީގުން ކަޓައިފައެވެ. ޕްލެޒެންގެ މައްޗަށް ބާސެލޯނާ އިން ކުރި ހޯދީ 4-2 އިންނެވެ. ގްރޫޕް ސްޓޭޖުގައި ބާސެލޯނާ އަށް ހޯދުނީ ދެ މޮޅެވެ. އެ ދެ މޮޅަކީ ވެސް ޕްލެޒެން އާ ދެކޮޅަށް ހޯދުނު މޮޅެވެ. ތިން މެޗުން ބަލިވީއިރު، އެއް މެޗުން ވަނީ އެއްވަރުވެފައެވެ.

މުބާރާތުން ކަޓާފައި އޮތުމުން ޕްލެޒެން އާ ދެކޮޅަށް ބާސެލޯނާގެ މުހިންމު ބައެއް ކުޅުންތެރިން ނުކުޅެއެވެ. އޭގެ ތެރޭގައި ޕޮލެންޑުގެ ފޯވާޑް ރޮބާޓް ލެވަންޑޯސްކީ، އެއް ނަންބަރު ގޯލް ކީޕަރު ޓާ ސްޓެެގެން، ފްރެންކީ ޑި ޔޯން ފަދަ ކުޅުންތެރިން ހިމެނެއެވެ.

މެޗުގެ ހަ ވަނަ މިނެޓުގައި އަންސު ފާޓީ ތަނަވަސްކޮށްދިން ފުރުސަތަކުން ބާސެލޯނާ އަށް ލީޑު ނަގައިދިނީ މާކޮސް އަލޮންސޯއެވެ. ބާސެލޯނާގެ ދެ ވަނަ ލަނޑު ފުރަތަމަ ހާފު ނިމެން މިނެޓެކަށްވެފައި ވަނިކޮށް ޖެހީ ފެރާން ޓޮރޭސްއެވެ. އެއީ ޖޯޑީ އަލްބާގެ އެހީތެރިކަމާ އެކު އޭނާ ޖެހި ލަނޑެކެވެ. ދެ ވަނަ ހާފަށް ނުކުމެ ޕްލެޒެން އިން ވަނީ ލަނޑެއް ޖަހައި ފަރަގު ކުޑަކޮށްފައެވެ. 51 ވަނަ މިނެޓުގައި ލިބުނު ޕެނަލްޓީއެއްގައި ލަނޑު ޖެހީ ޗޮރީއެވެ. ނަމަވެސް އޭގެ ތިން މިނެޓު ފަހުން ފެރާން ވަނީ ބާސެލޯނާގެ ތިން ވަނަ ލަނޑު ޖަހާފައެވެ. ޕްލެޒެންގެ ދެ ވަނަ ލަނޑު 63 ވަނަ މިނެޓުގައި ޖެހީ ވެސް ޗޮރީއެވެ. އޭގެ ފަހުން 75 ވަނަ މިނެޓުގައި ބާސެލޯނާގެ ހަތަރު ވަނަ ލަނޑު ޖެހީ ޓޮރޭ ކަރާލްއެވެ.

މެޗުން މޮޅުވެ ބާސެލޯނާ ނިންމާލީ ތިން ވަނައިގައެވެ. އެއީ ހަ މެޗުން ހަތް ޕޮއިންޓު ހޯދައިގެންނެވެ. ޕްލެޒެން ގްރޫޕް ސްޓޭޖު ނިންމާލީ ޕޮއިންޓެއް ނުލިބިއެވެ. އަންނަ ސީޒަނުގައި ބާސެލޯނާ އަށް ޖެހޭނީ ޔޫރޮޕާ ލީގުގައި ވާދަކުރާށެވެ.