ދަރަނި އަނބުރާ ނުދެއްކޭވަރު ބަޔަކަށް ދަރަނި ދީފާނެތޯ؟: ޔައުގޫބު

ދަރަނި އަނބުރާ ނުދެއްކޭވަރު ބަޔަކަށް އެއްވެސް ފަރާތަކުން ދަރަނި ދީފާނެތޯ ދާންދޫ ދާއިރާގެ މެމްބަރު، ޔައުޤޫބް އަބްދުﷲ ސުވާލު އުފައްދަވައިފިއެވެ.

ޔައުގޫބު މިފަދައިން ސުވާލު އުފެއްދެވީ ރާއްޖެޓީވީގެ ފަލަސުރުޚީ ޕްރޮގްރާމުގައި ބައިވެރިވެވަޑައިގެން ރާއްޖޭގެ އިގްތިސާދީ ހާލަތާއި، ދަރަނި ދެއްކުމުގެ ގާބިލުކަން ނެތްކަމަށް ދެކެވޭ ވާހަކަތަކަށް ރައްދު ދެއްވަމުންނެވެ.

Advertisement

ޔައުގޫބު ވިދާޅުވީ ދަރަނީގެ ވާހަކަ އެންމެ ބޮޑަށް ދައްކަނީ، ރާއްޖެއިން ނަގާ ދަރަނިތައް އަނބުރާ ދެއްކޭނެކަން ވަރަށް ރަނގަޅަށް އެނގޭ ބަޔަކު ކަމަށެވެ. ދަރަނި ދެއްކުނަސް، ދަރަނި ނުދެއްކޭނެ ކަމަށް ބުނަން އެމީހުން ބޭނުންވާ ކަމަށާއި، ޒިންމާދާރު ބަޔަކު ކުރަންޖެހޭނެ ކަމަކީ އެއީތޯ ޔައުގޫބު ސުވާލު އުފެއްދެވިއެވެ.

މި ސަރުކާރުން ވަރަށް ގިނަ ފަހަރުމަތިން ދަރަނި ނަގާފައިވާކަން ފާހަގަކުރައްވައި ޔައުގޫބު ވަނީ ދަރަނި އަނބުރާ ނުދެއްކޭ ވަރުގެ ބަޔަކަށް ދަރަންޏަށް ފައިސާ ދީފާނެތޯ ސުވާލުކުރައްވާފައެވެ. އެހެންނަމަވެސް އެކި ފަރާތްތަކުން ސަރުކާރަށް ދަރަނި ދެމުންދާތީ، ރާއްޖޭގެ އިގްތިސާދުގެ ވަރުގަދަކަން އެނގިވަޑައިގަންނަވާކަމަށް އޭނާ ވިދާޅުވިއެވެ.

ޔައުގޫބު ވިދާޅުވީ ދަރަނި ނަގައިގެން ކުރިއަށްގެންދާ މަސައްކަތަކީ ރާއްޖޭގެ ތަރައްގީ އާއި އިގްތިސާދީ ކުރިއެރުމަށް ކުރާ މަސައްކަތްތަކެއް ކަމަށެވެ. އެއީ ހުއްޓާލައިގެންވާނެ މަސައްކަތްތަކެއް ނޫން ކަމަށާއި، އެ މަސައްކަތްތައް ކުރިއަށްގެންދަންޖެހޭކަމަށް އޭނާ ވިދާޅުވިއެވެ.