އަންނަ ނޮވެމްބަރު މަހު ޤަތަރުގައި ފަށާ ފީފާ ވޯލްޑް ކަޕާ ދިމާކޮށް ކޮންސިއުލަރ ޚިދުމަތް ދޭނެ ސެންޓަރުތަކެއް އެ ޤައުމުގައި ޤާއިމުކޮށްފިއެވެ.
މި ސެންޓަރަކީ މުބާރާތް ކުރިއަށްދާ ދުވަސްވަރު އެ ޤައުމަށް ދަތުރުކުރާ ސަޕޯޓަރުންނަށް ޚާއްސަކުރާ ސެންޓަރެކެވެ. މިއީ ބައިނަލްއަޤުވާމީ މައުލޫމާތާއި، ދަތުރުވެރިންގެ އެހެނިހެން ކަންކަމަށް ބޭނުންވާ މައުލޫމާތު ފޯރުކޮށްދިނުމުގެ މަޤުސަދުގައި ޤާއިމު ކުރި ސެންޓަރެއް ކަމަށް އެ ޤައުމުން ބުނެއެވެ. މި ސެންޓަރުން ދަތުރުވެރިންގެ ވިސާ އާއި އެހެނިގެން ލިޔެކިޔުންތައް ބެލެހެއްޓުމުގެ މަސައްކަތް ކުރާނެ ކަމަށް ވެސް ޤަތަރުން ބުނެއެވެ.
މި ސެންޓަރު މިހާރު ހުޅުވާފައިވާއިރު ޤަތަރު 2022 ގެ ސީއީއޯ ނާސިރު-އަލް ޚަތެރް ވިދާޅުވީ މުބާރާތަށް 20 ވަރަކަށް ދުވަސްވެފައިވާ އިރު، މިހާތަނަށް އެތައް މަސައްކަތެއް ކުރެވިއްޖެ ކަމަށާއި ކުރިއަށް ކުރަން ވެސް މަސައްކަތްތަކެއް ހުރި ކަމަށެވެ. އޭނާ ވިދާޅުވީ އެ މީހުންގެ ބޭނުމަކީ މިއީ މިހާތަނަށް ބާއްވާ އެންމެ ކާމިޔާބު އަދި އެންމެ ފުރިހަމަ ވޯލްޑް ކަޕް މުބާރާތަށް ހެދުން ކަމަށެވެ. މީގެ އިތުރުން ދުނިޔޭގެ އެކި ކަންކޮޅުތަކުން މުބާރާތް ބެލުމަށް އަންނަ ސަޕޯޓާރުންނަށް މަރުޙަބާ ކިޔައި، އެންމެ ފުރިހަމަ އިންތިޒާމުތައް ފޯރުކޮށްދިނުމަށް ތައްޔާރު ކަމަށެވެ.
އޭނާ އިތުރަށް ވިދާޅުވީ ވޯލްޑް ކަޕް މުބާރާތަކާ ދިމާކޮށް ބައިނަލްއަޤުވާމީ ކޮންސިއުލަރ ސެންޓަރެއް ޤާއިމުކުރި މިއީ ފުރަތަމަ ފަހަރަކު ކަމަށެވެ. އޭނާ ބުނީ މި ސެންޓަރު ޤާއިމުކޮށްފައިވާނީ ސަޕޯޓަރުންނަށް އެންމެ ފަސޭހައިން ދެވޭނެ ހިސާބެއްގައި ކަމަށެވެ. އަދި މުބާރާތުގެ ޓިކެޓު ވިއްކާ މެއިން ސެންޓަރު ވެސް ހުންނާނީ އެތަނުގައި ކަން އޭނާ ފާހަގަކުރެއްވިއެވެ.
ޤަތަރުގެ އުންމީދަކީ އެ ޤައުމަށް ދަތުރުކުރާ ފަރާތްތަކާއި، މުބާރާތަށް އަންނަ ޓީމުތަކަށް އެންމެ ފުރިހަމަ ޚިދުމަތެއް ދިނުމެވެ. މީގެ އިތުރުން އެ ޤައުމުން ދޭ ޔަގީން ކަމަކީ މިއީ މިހާތަނަށް ބާއްވާ އެންމެ ފުރިހަމަ މުބާރާތަށް ވާނެ ކަމުގެ ޔަގީންކަމެވެ.
