ޒަކާތަކީ ތިބާގެ މުދަލުގައިވާ ފަޤީރުންނާއި މިސްކީނުންގެ ހައްޤެއް – މުފްތީ މެންކް
ކުރާހިތުން ނޫންކަމުގައިވީނަމަވެސް ނަމާދުކުރުމަކީ އެ އަޅަކާއި ހެއްދެވިފަރާތާ ދެމެދު އޮންނަ ގުޅުން ރަނގަޅުވާނެ ކަމެއް
މުފްތީ މެންކް ފުވައްމުލައް ސިޓީގައި - ދަރުސް ދެއްވީ ޕްރޮޑަކްޓިވް މުސްލިމް މައުޟޫއަށް
ޒަކާތަކީ ތިބާގެ މުދަލުގައިވާ ފަޤީރުންނާއި މިސްކީނުންގެ ހައްޤެއް ކަމަށް މުފްތީ މެންކް ވިދާޅުވެއްޖެއެވެ.
ފުވައްމުލައް ސިޓީގައި ބޭއްވި ދަރުސް ފައްޓަވަމުން މުފްތީ މެންކް ވިދާޅުވީ އިސްލާމްދީނުގެ ފުރަތަމަ ތަނބަކީ މާތް ﷲގެ އެއްކައުވަންތަކަން ޤަބޫލުކުރުމާއި މުޙައްމަދު ސައްލައްﷲ ޢަލައިހި ވަސައްލަމައަކީ އެކަލާނގެ ފޮނުއްވި ރަސޫލާކަމަށް ހެކިވުން ކަމުގައެވެ.
އިސްލާމްދީނުގެ ދެވަނަ ތަނބުކަމުގައިވާ ނަމާދު، މުސްލިމުން އަދާކުރަނީ ﷲ ސުބުޙާނަހޫ ވަތަޢާލާއަށް ކިޔަމަންތެރިވުމުގެ ގޮތުން ކަމަށާއި އަދި ފަރުޟު 5 ނަމާދަކީ ކުރަން ޖެހޭކަމަކަށްވާތީ ނަމާދުކުރުމަކީ މައްސަލައެއް ނޫންކަމުގައިވެސް ވިދާޅުވިއެވެ. މުފްތީ މެންކް ވިދާޅުވީ ކުރާހިތުން ނޫންކަމުގައިވީނަމަވެސް ނަމާދުކުރުމަކީ އެ އަޅަކާއި ހެއްދެވިފަރާތާ ދެމެދު އޮންނަ ގުޅުން ރަނގަޅުވާނެ ކަމެއްކަމަށާ އޭގެ ނަތީޖާއަކަށް ވަނީ ނަމާދުކުރުމަކީ އެމީހަކު ކުރާހިތުން، ކުރަން ބޭނުން ވެގެން ކުރާ ކަމަކަށް ވެގެން ދިޔުން ކަމުގައެވެ.
މެންކްގެ ވާހަކަ ކުރިއަށް ގެންދަވަމުން އިތުރަށް ވިދާޅުވީ އިސްލާމްދީނުގައި ފަރުޟުކުރައްވާފައިވާ ކޮންމެ ކަމަކަށް ސުންނަތްތަކެއް ވާ ކަމުގައެވެ. ފަރުޟުކުރައްވާފައިވާ 5 ނަމާދު ކުރުމަކީ މުސްލިމުންގެ މައްޗަށް ވާޖިބަކަށް ވާއިރު ސުންނަތް ނަމާދުތަކަކީ ކުރުން މަޖުބޫރު ނޫން ނަމާދުތަކެއް ކަމަށާއި އެހެން ނަމަވެސް ސުންނަތް ނަމާދަކީ އެ ނަމާދު ކުރުމުން އިތުރު ހިތްހަމަޖެހުމާއި އުފާވެރިކަން ލިއްބައިދޭ ކަމެއްކަންވެސް މުފްތީގެ ވާހަކައިގައި ފާހަގަ ކުރެއްވިއެވެ.
އަދި ﷲ ސުބުޙާނަހޫވަތަޢާލާ ތިބާއަށް ނިޢުމަތެއް ދެއްވުމުން އެކަމާއި ބޮޑާވެ ކިބުރުވެރިވުމަކީ ކޮށްގެން ވާނެކަމެއްނޫންކަމުގައި ވިދާޅުވަމުން މެންކް ވިދާޅުވީ އެމީހެއްގެ މުދަލުން 2.5% ޒަކާތުގެ ގޮތުގައި ދިނުމަކީ ކޮންމެ މުސްލިމެއްގެ މައްޗަށް ވާޖިބެއް ކަމަށާއި އެއީ އެމީހެއްގެ މުދަލުގައިވާ ފަޤީރުންނާއި މިސްކީނުންގެ ހައްޤެއް ކަމަށެވެ. މީގެ އިތުރުން މެންކް ވިދާޅުވީ ދުނިޔޭގައި ލައްވާފައިވާ ހުރިހާ ދިރޭއެއްޗެއްގެ ރިޒުޤު ﷲ ސުބުޙާނަހޫވަތަޢާލާ ވަނީ ލިޔުއްވާފައިކަމަށާއި ޒަކާތަކީ ޞަދަޤާތެއްނޫން ކަމަށާއި ޞަދަޤާތަކީ ޒަކާތުގެ ގޮތުގައި ދައްކަން ޖެހޭ އެއްޗެއްގެ އިތުރުން އެހެން މީހުންނަށް އެހީތެރިވުމުގެ ގޮތުން ދޭ އެއްޗެއް ކަމުގައެވެ. އަދި މިފަދައިން ދެވޭ ކޮންމެ އެއްޗެއްވެސް ހިތްތިރިކަމާއި އެކު މާތްﷲއަށް ޝުކުރުވެރިވާހާލު ދިނުމުގެ މުހިންމުކަންވެސް މެންކްގެ ވާހަކައިގައި ފާހަގަކުރެއްވިއެވެ.
އަދި މިއަދު ތިމާއަށް ލިބިފައިވާ ރީތިކަމަކާއި މުއްސަނދިކަމެއްގެ މައްޗަށް ބޮޑާވެ ކިބުރުވެރިވުމަކީ ބައެއް މީހުން ކުރާކަމެއްކަމަށާއި އެހެން ނަމަވެސް މިއަދު ކިތަންމެ ރީތިމީހާވެސް މާދަމާ މުސްކުޅިވާނެކަމަށާއި، ކިތަންމެ މުއްސަނދިމީހާވެސް ފަޤީރުވެ އެ މުދަލުން އެމީހާ މަޙްރޫމް ކުރައްވަފާނެކަމާއި ނިޢުމަތަކީވެސް އިންސާނާ އިމްތިޙާނު ކުރެއްވުމަށްޓަކައި ދެއްވާ އެއްޗެއްކަން މެންކްގެ ވާހަކައިގައި ހަނދާންކޮށްދެއްވިއެވެ.
އަދި ދުނިޔޭގައި އުޅޭއިރު އިމްތިޙާނުތަކާ ކުރިމަތިލާން ޖެހޭނެކަން ހަނދާން ކޮށްދެއްވަމުން، ކީރިތި ރަސޫލާއާ ކުރިމަތިވި އިމްތިޙާނުތަކަށް އެކަލޭގެފާނު ކެތްތެރިވެވަޑައިގެންނެވި ގޮތް ނަމޫނާއަކަށް ބަލައިގެން އަޅުގަނޑުމެންގެ ދިރިއުޅުން ބައްޓަން ކުރުމަށް އިރުޝާދުދެއްވިއެވެ. އެހެން މީހުންނަށް އަނިޔާވެރިވުމަކީ އެކަމަށް ތިމާ ދަރަނިވެރިވާނެކަމެއްކަމަށާއި އެ ދަރަންޏަކީ ކޮންމެވެސް ދުވަހަކުން އަދާ ކުރަން ޖެހޭނެކަމެއްކަމަށާއި އަނިޔާވެރިކަމަށް ކެތްތެރިވުމަކީ އެކަމުގެ ބަދަލު މާތް ﷲ ދެއްވާނެ ކަމެއް ކަމުގައެވެ.
ޞަދަޤާތުގެ ގޮތުގައި ދެވެނީ ހަމައެކަނި ފައިސާއާއި މުދާ ނޫން ކަމުގައި ވިދާޅުވަމުން މެންކް ފާހަގަ ކުރެއްވީ އެންމެ އަގުހުރި ޞަދަޤާތަކީ ހިނިތުންވެލުން ކަމަށާއި ހިތްހެޔޮކަމާއެކު ހިނިތުންވެލާ އަނެކާއަށް އޯގާތެރިވުމަކީ އެކަމަށް އެއްވެސް ވަރަކަށް ފައިސާ ޚަރަދުނުކޮށް ކުރެވިދާނެ ޞަދަޤާތެއް ކަމުގައެވެ. އާމްދަނީ ހޯދުމަށް އިޚްތިޔާރު ކުރާ މަގަކީ ސަލާން ޖެހުންކަމަށް ހެދުމަކީ އިސްލާމްދީނުގައި ނަހީކުރައްވާފައިވާ ކަމެއްކަމަށާއި އެހެންނަމަވެސް، ކަމަކަށް އެދިގެން އަންނަ މީހާއަށް އެކަން ކޮށްދެވެން ނެތްކަމުގައި ވާނަމަވެސް އިޙްތިރާމާއެކު އެމީހަކާ މުޢާމަލާތުކުރުމަށާއި އެމީހަކު ލަދުގަންނަވާލާ ބޭޒާރުކޮށްނުލުމަށް މެންކް ނަސޭހަތްތެރިވެލެއްވިއެވެ.
އަދި އިސްލާމްދީނުގައި އިންސާނުންނަށް އޯގާތެރިވުމަށް ބާރުއަޅުއްވާފައިވާ ފަދައިން އެހެނިހެން ދިރޭ އެއްޗިއްސަށް އޯގާތެރިވުމަށްވެސް އަންގަވާފައިވާކަން ހަނދާން ކޮށްދެއްވަމުން މެންކް ވިދާޅުވީ މީހަކަށް ކަމެއް ކޮށްދޭއިރު އޭގެ ބަދަލު ކޮންމެފަހަރަކު ލިބޭނެ ކަމަށް ބެލުމަކީ މާޔޫސީއާއި ކުރިމަތިލާން ޖެހިދާނެ ކަމެއް ކަމަށާއި އެހެން ނަމަވެސް މާތް ﷲ އަށްޓަކައި ކުރާ ކޮންމެ ކަމެއްގެ ބަދަލު އެކަލާނގެ ދެއްވާނެ ކަމަށެވެ.
