ޣާފިލްކަމުގެ ނިދިން ހޭލާ، އަމިއްލަ ހަށިގަނޑުގައި ލެވިފައިވާ ހަންގަނޑު ވެސް ތިބާގެ މައްޗަށް ހެކިދޭ: ޚުތުބާ
6 ނޮވެމްބަރު 2020 | ހުކުރު 08:18ޤިޔާމަތް ދުވަހަކީ ބިރުވެރިކަން ބޮޑުވެގެންދާ ދުވަހެއް
އިސްލާމީ މަރުކަޒުގެ ހުކުރު ނަމާދުގެ ތެރެއިން، މިއަދުގެ ހުކުރު ޚުތުބާގެ މައުޟޫއަކީ \'\'ޤިޔާމަތް ދުވަހާއި މެދު ޤާފިލުނުވާށެވެ\'\'
އަމިއްލަ ހަށިގަނޑުގައި ލެވިފައިވާ ހަންގަނޑު ތިބާގެ މައްޗަށް ހެކިދޭ ކަމަށާއި، ޣާފިލްކަމުގެ ނިދިން ހޭލުމަށް ހުކުރު ޚުތުބާގައި ގޮވާލައިފިއެވެ.
''ޤިޔާމަތް ދުވަހާއި މެދު ޤާފިލުނުވާށެވެ'' މިމައުޟޫއަށް ރާއްޖޭގެ އެކިކަންކޮޅުތަކަށް އިއްވި ހުކުރު ޚުތުބާގައި ބުނީ ޤިޔާމަތް ދުވަހަކީ ބިރުވެރިކަން ބޮޑުވެގެންދާ ދުވަހެއް ކަމަށާއި، ނާމާން ދުވަހެއް ކަމަށެވެ. ޤިޔާމަތްވާ ދުވަހު މާސިންގާ އުޑުތައް ފަޅަފަޅައިގެން ގޮސް ކުދިކުދިވެގެންދާ ކަމަށެވެ. އަދި ބޮޑެތި ބިޔަ ފަރުބަދަތައް ބިމުން އުފުރިގެން ގޮސް ފުނޑުފުނޑުވެ ލުއި ކަފަކޮޅުތަކެއް ފަދައިން މީސްތަކުގެ ބޯމަތީގައި އެނބުރެމުންދާ ކަމަށެވެ.
ޤިޔާމަތް ދުވަހު ކޮންމެ މީހަކު ވެސް ﷲގެ ދަރުބާރަށް ހާޒިރުވާނީ އެމީހަކު ބިންމަތީގައި އުޅުނުއިރު ކުޅަ އަމަލަކާގެން ކަމަށްވާއިރު، ޤާފިލްކަމުގެ ނިދިން ހޭލަން ޖެހޭ ކަމަށް ޚުތުބާގައި ވަނީ ގޮވާލާފައެވެ.
ދުނިޔޭގެ ޙަޔާތުގައި އިންސާނާއަށް މާތްﷲ ދެއްވި އިލްމުގެ މަދު މިންވަރުން މިއަދު ވަނީ ތަރައްގީ އާއި ތަހުޒީބުގެ މަގުގައި، މީގެ ކުރިން އެއްވެސް ޒަމާނެއްގައި ހޯދިފައިނުވާ ފަދަ މާއްދީ ބޮޑެތި ކުރިއެރުންތައް ހޯދާފައިކަން ފާހަގަކޮށް ޚުތުބާގައި ބުނީ މި މާއްދީ ކުރިއެރުންތަކުގެ ސަބަބުން ރޫޙާނިއްޔަތު ފުނޑުފުނޑުވެގެން ގޮސްފައިވާ އިރު، އެކަމުގެ އިޙްސާސް ވެސް ބައެއް އިންސާނުންގެ ކިބައިގައި ނެތްކަމަށެވެ. އެހެންކަމުން، އެމީހުން އެމަސައްކަތް ކުރަނީ، ސުވަރުގެ ދުނިޔެމަތީގައި ބިނާކުރެވޭތޯ ކަމަށެވެ. ނަމަވެސް ދުނިޔެއަކީ ކެހިދޭ ކުލަތައް ގިނަ ތަނެއްގެ ގޮތުގައި ޚުތުބާގައި ބުނެފައިވެއެވެ.
ޚުތުބާގައި ބުނީ މަޙްޝަރުގެ މައިދާނުން، ފެންނަ އާދަޔާ ޚިލާފު ކަންތައްތަކަށް ސަމާލުވެ އިންސާނާ ހުއްޓޭނެ ކަމަށާއި، އެމައިދާނުން ހަގީގީ ނެކްނޮލޮޖީ ފެންނާނެ ކަމަށެވެ. އެއީ ދުނިޔެމަތީގައި ހޯދި ޓެކްނޮލޮޖީ ފަދަ، ފަނާވެދަނިވި އެއްޗެއް ނޫން ކަމަށެވެ.
މީގެ އިތުރުން ޚުތުބާގައި ބުނީ ތިބާގެ އަމިއްލަ ހަށިގަނޑު ލެވިފައިވާ ހަންގަނޑު ތިބާގެ މައްޗަށް ހެކިދޭނެ ކަމަށާއި، އެ ހަންގަނޑަށް ވާހަކަ ދެއްކުމުގެ ކުޅަދާނަކަން އެދުވަހު ކާއިނާތުގެ މިލްކުވެރި ﷲ ދެއްވާނެ ކަމަށެވެ.
ޤިޔާމަތް ދުވަހުގެ ބިރުވެރިކަމުން ސަލާމަތްވެ، އަރްޝީގެ ހިޔާވަހިކަން ލިބޭނެ 7 ގިންތިއެއްގެ މީހުންގެ ޚަބަރު މާތް ނަބިއްޔާ މުހައްމަދުﷺ ވަނީ، ދެއްވާފައިވާކަން ފާހަގަކޮށް ޚުތުބާގައި ބުނީ އެއީ، އަދުލުވެރި ވެރިންނާއި، އެބައިމީހުންގެ ވެރިރަސްކަލާނގެއަށް އަޅުކަންކުރުން މަތީގައި ބޮޑުވި ޒުވާނުންނާއި، އެ ބައެއްގެ ހިތް މިސްކިތާ ގުޅި ލާމެހިފައިވާ މީހުންނާއި، ﷲއަށް ޓަކައި އެއްބަޔަކު އަނެއްބަޔަކު ދެކެލޯބިވެ، ﷲ އަށް ޓަކައި އެއްބަޔަކު އަނެއް ބަޔަކާ ބައްދަލުވެ، ﷲ އަށްޓަކައި އެއްބަޔަކުއަނެއް ބަޔަކާ ވަކިވި މީހުންނާއި، ޤަދަރުވެރި ރީތި އަންހެނަކު ފާހިޝް ކަމަކުން ދައުވަތު ދިނުމުން، ތިމަންމެން ﷲ އަށް ބިރުވެރިވަމޭ ބުނެ އެކަމުން ދުރުވެގަތް މީހުންނާއި، ކަނާތުން ކުޅަ ޞަދަޤާތް ވާތަށް ނޭނގޭހައި ސިއްރުން ޞަދަޤާތް ކުޅަ މީހުންނާއި، އެކަހެރި ތަނެއްގައި ﷲ ހަނދުމަކޮށް ލޮލުން ކަރުނަ އޮހޮރުނު މީހުން ކަމަށެވެ.
ޚުތުބާގައި ބުނީ ފޮނުގަނޑުހައި ގިނައިން ފާފަ ކުރެވިފައި ވިޔަސް އިޚްލާސްތެރި ތައުބާއަކުން ތައުބާވެ ފާފަތަކުން އެނބުރި ރުޖޫއަ ވެއްޖެނަމަ އެ ހުރިހައި ފާފަތަކެއް ﷲ ތަޢާލާ ހެޔޮކަންތަކަށް ބަދަލުކޮށްދެއްވާ ކަމަށެވެ. އެހެންކަމުން ﷲ ގެރަޙްމަތުން އުއްމީދު ކަނޑައިނުލާ ވަގުތު ފާއިތުވުމުގެ ކުރިން، ކުރެވިފައިވާ ފާފަތަކަށް ތައުބާވެ، ﷲ ތައާލާގެ ޙަޟްރަތުން ފާފަފުއްސެވުމަށް އެދި އަވަސްވެގަތުމަށް ޚުތުބާގައި ވަނީ ގޮވާލާފައެވެ.
