އިސްލާމިކް މިނިސްޓްރީން ފަޤީރުންނާއި މިސްކީނުންގެ ދަފްތަރަށް ޝަކުވާ ހުށަހެޅުމުގެ ފުރުޞަތު ހުޅުވާލައިފިއެވެ.
އާދިއްތަ ދުވަހު އެ ވުޒާރާ އިން ބުނީ ފަޤީރުންނާއި މިސްކީނުންގެ ދަފްތަރުގައި ރަޖިސްޓްރީވުމަށް ހުޅުވާލި ފުރުސަތުގައި މާލެއާއި ހުޅުމާލެއާއި ވިލިމާލޭގައި ދިރިއުޅޭ ފަރާތްތަކަށް މިދިޔަ ޑިސެމްބަރު މަހުގެ 19ގެ ނިޔަލަށް ހުށަހަޅާފައިވާ ފޯމްތަކުގެ ޖަވާބު މިހާރު ދީފައިވާ ކަމަށެވެ. އެހެންކަމުން އެ ކަމަށް އެދި ހުށަހެޅި ފަރާތްތަކުގެ ތެރެއިން ދަފްތަރުގައި ނަން ހިމެނިފައިނުވާ ފަރާތްތަކުން ޝަކުވާ ހުށަހަޅަން ބޭނުންވާނަމަ އިސްލާމިކް މިނިސްޓްރީއަށް ގޮސް ނުވަތަ އީމެއިލް މެދުވެރިކޮށް ޝަކުވާ ހުށަހެެޅުމަށް ފުރުސަތު ވަނީ ހުޅުވާލާފައެވެ.
އެ މިނިސްޓްރީ އިން ބުނީ ޝަކުވާ ހުށަހެޅުމުގެ އެންމެ ފަހު ދުވަހަކީ މިމަހުގެ 16 ވަނަ ދުވަސް ކަމަށެވެ. އަދި އެއަށްފަހު ހުށަހަޅާ ޝަކުވާއެއް ބަލައި ނުގަންނާނެކަމަށް ވެސް މިނިސްޓްރީން ވަނީ ބުނެފައެވެެ. އިސްލާމިކް މިނިސްޓްރީން އަންނަނީ ކޮންމެ އަހަރެއްގެ ވެސް ފަޤީރުންނާއި މިސްކީނުންގެ ދަފްތަރު އެކުލަވާލަމުންނެވެ. 1442 އަހަރުގެ މާލެ ސިޓީގެ ފަޤީރުންނާއި މިސްކީނުންގެ ދަފްތަރުގައި ޖުމުލަ 1520 ފަރާތަކުން ވަނީ ރަޖިސްޓްރީކޮށްފައެވެ.
