ފުރަތަމަ ނަޒަރުންވެސް އެއީ ޣައްޒާއިން އާންމުކޮށް ފެންނަ ސްކޫލްތަކާ ތަފާތުކަމެއް ހުރި ސްކޫލެއްކަން އެނގިގެންދެއެވެ. ސްކޫލުގެ ވެށިން ފެންނަ ފެހިކަން ގަދަ ސަރަހައްދުތަކާއި، ކުޅޭނެ ގޯތިތެރެއާއި، ސޯލާރ ޕެނަލްތައް ގިނައެވެ. ބޯފެން އުފައްދާނެ ޕްލާންޓެއްވެސް ހުންނަ މި ސްކޫލަކީ، އދ.ގެ ރިލީފް އެންޑް ވަރކްސް އޭޖެންސީ (ޔޫއެންއާރްޑަބްލިއުއޭ)އިން ހިންގާ ސްކޫލެކެވެ. މިއީ ޣައްޒާގައި މިވަގުތު ހުރި އެންމެ އާދަޔާ ޚިލާފު ސްކޫލްތަކުގެ ތެރެއިންވެސް، ފާހަގަކޮށްލެވޭ ސްކޫލެކެވެ. މިއީ ތިމާވެއްޓާ ރައްޓެހި ސްކޫލެކެވެ.

1965 ވަނަ އަހަރު އިމާރާތްކުރި މި ސްކޫލް ޒަމާނީ ފެންވަރަށް ތަރައްގީކޮށް، 2021 ވަނަ އަހަރު ހުޅުވީ ކޭއެފްޑަބްލިއު ޑިވެލޮޕްމަންޓް ބޭންކު މެދުވެރިކޮށް، ޖަރުމަނުވިލާތުން ފަންޑުކޮށްގެންނެވެ.

ޔޫއެންއާރްޑަބްލިއުއޭއިން ޣައްޒާގެ އިރުމަތީގައި ހިންގާ ސްކޫލްތަކުގެ އިސް ވެރިއެއްގެގޮތުގައި މަސައްކަތްކުރައްވާ ރީހާމް އައްމާރު ވިދާޅުވީ، މި ސްކޫލް ފަރުމާކޮށްފައި ވަނީ މޫސުމަށްވެސް އެންމެ އެކަށޭނަ ފަދަ ގޮތަކަށް ކަމަށެވެ.

ވެއްޓާ ރައްޓެހިވުމުގެ އިތުރުން، މި ސްކޫލް ފަރުމާކުރުމުގައި އެންމެ ބޮޑު އިސްކަމެއް ދީފައިވަނީ ދަރިވަރުންގެ ދުޅަހެޔޮ ކަމަށެވެ. ސްކޫލުގެ ޕްރިންސިޕަލްގެ މަގާމުގައި މިވަގުތު ހުންނެވި މާއީ އަހުމަދު އައްނަބާހީން ފާހަގަކުރެއްވިގޮތުގައި، ދަރިވަރުންގެ އިޖުތިމާއީ ތަރައްގީއަށް ބޭނުންވާ ކަންކަމަށްވެސް ސްކޫލުން އެއްބާރުލުން ދެއެވެ.

5000 އަކަމީޓަރުގެ ބޮޑު ސަރަހައްދެއްގައި ތަރައްގީކޮށްފައިވާ މި ޚާއްސަ ސްކޫލު ފަރުމާކޮށްފައިވަނީ، ކުއްލި ހާދިސާތަކުގައި، ވަގުތީ ހިޔަލެއްގެ ގޮތުގައިވެސް ބޭނުންކުރެވޭނެފަދަ ގޮތަކަށެވެ.

375 އަކަކިލޯމީޓަރުގެ ޣައްޒާއަކީ މުޅި ދުނިޔޭގެ ނިސްބަތުން ބަލާއިރުވެސް، އެއް ސަރަހައްދެއްގައި އެންމެ ގިނަ އަދަދެއްގެ ބަޔަކު ތޮއްޖެހިފައިވާ ސަރަހައްދެވެ. ޣައްޒާގެ އާބާދީ 2.3 މިލިއަނަށްވުރެ މައްޗަށް އަރާއިރު، އޭގެތެރެއިން 4 ބައިކުޅަ 1 ބައި މީހުންނަށް ދިރިއުޅެން މަޖުބޫރުވެފައިވަނީ ރެފިއުޖީ ކޭމްޕުތަކުގައެވެ.

ޣައްޒާއާ ދެކޮޅަށް، ޔަހޫދީ އިޒްރޭލުން ދަތިކުރުމުގެ ފިޔަވަޅުތައް ވަރުގަދަ ކުރީ 2007 ވަނަ އަހަރުގެ ތެރޭގައެވެ. އެގޮތުން ޣައްޒާއަށް ވަދެ ނުކުމެ ހެދުމަކީ އިންތިހާ ތަކުލީފު ބޮޑު ކަމަކަށް އޮންނަނީ ވެފައެވެ. ގިނަ ބަޔަކު ސިފަކުރާގޮތުގައި ޣައްޒާއަކީ، މި ވަގުތު ދުނިޔޭގައި އޮތް، އަނގަމަތި ހާ އެންމެ ބޮޑު ޖަލެވެ.