ކާބޯތަކެތި ބޭނުންކޮށްގެން އުފެއްދި ބެޓެރިއަކާއެކު ބޭސްފަރުވާއަށް ބޮޑު އިންގިލާބެއް!

ހަލުވި ދުވެލީގައި އިންގިލާބީ ބޮޑެތި ބަދަލުތަކެއް އަންނަ އެއް ދާއިރާއަކީ ސިއްހީ ބޭސްފަރުވާގެ ދާއިރާއޭ ދެންނެވުމުން ދޮގަކަށް ނުވާނެއެވެ. ސިއްހީ ދާއިރާ ހަރުދަނާކޮށް، އިންސާނީ އާބާދީގެ ދުޅަހެޔޮކަން ވީހާވެސް ލުއިފަސޭހަ ގޮތެއްގައި ހަމަޖެއްސުމަށް، އަދުގެ ސައިންސުވެރިން ދަނީ ކެނޑިނޭޅި ދިރާސާތައްކޮށް، އާ އީޖާދުތައް ތައާރަފު ކުރަމުންނެވެ.

ދާދި ފަހުން މިފަދަ އީޖާދެއް ތައާރަފުކުރި އެއް ބަޔަކީ އިޓަލީވިލާތުގެ މިލާންގައި ހަރަކާތްތެރި ވަމުން ދިޔަ ރިސަރޗަރުންގެ ޓީމެކެވެ. އެ ޓީމުން ތައްޔާރުކުރީ، ކާލެވޭ ނުވަތަ ދިރުވާލެވޭ ބެޓެރިއެކެވެ. ދިރާސާ ޓީމުގެ އުއްމީދަކަށްވީ، ހަށިގަނޑުގެ އެތެރެއަށް ފޮނުވާލާ ސިއްހީ އާލާތްތަކަށް އިންގިލާބީ ބަދަލެއް ގެނައުމެވެ. މި ބެޓެރި ތައްޔާރުކުރި ޓީމުން ބުނިގޮތުގައި، މިއީ މުޅި ބެޓެރީގެ ހުރިހާ ބައެއް ކާލެވޭ، އަދި ރީޗާޖު ކުރެވޭ ގޮތަށް، މިހާތަނަށް މުޅި ދުނިޔޭގައިވެސް އުފެއްދި މިފަދަ ފުރަތަމަ ބެޓެރިއެވެ.

އިޓާލިއަން އިންސްޓިޓިއުޓް އޮފް ޓެކްނޮލޮޖީ (އައިއައިޓީ)ގެ ދިރާސާ ޓީމުން މި ބެޓެރި އުފެއްދުމަށްޓަކައި މުޅިންވެސް ބޭނުންކޮށްފައިވަނީ ކާބޯތަކެތީގެ ބާވަތްތަކެވެ. އޭގެ ތެރޭގައި، އާމަންޑް، މެޑިޓަރޭނިއަން ސަރަހައްދުން އާންމުކޮށް ފެންނަ ކޭޕަރޒްއާއި، އެކްޓިވޭޓެޑް ޗާރކޯލް، މޫދުވިނަ، ގޯލްޑް ލީފް އަދި ބީވެކްސް ފަދަ ބާވަތްތައް ހިމެނެއެވެ.

ބެޓެރި މެދުވެރިކޮށް ކަރަންޓުގެ ހަކަތަ ނުވަތަ ޗާޖު ފޯރުކޮށްދޭ މިންވަރު އިތުރުކުރުމަށް ބޭނުންކޮށްފައިވަނީ އެކްޓިވޭޓެޑް ޗާރކޯލްއެވެ. މިއީ ބޯޓުދެއްޔާއި ދަރުގެ އިތުރުން އަދިވެސް އެހެން މާއްދާތަކެއް ބޭނުންކޮށްގެން އުފައްދާފައި ހުންނަ، އެއްވެސް ވަހެއް ނުހުންނަ، ހިމުން، ކަޅު ކުނޑިތަކެކެވެ. ބެޓެރިއަށް ކުރިމަތިވެދާނެ ސަރކިޓް ޝޯޓުވުންފަދަ ކަމަކުން ރައްކާތެރިކަން ހޯދައިދިނުމަށް ބޭނުންކޮށްފައިވަނީ މޫދުވިނައިގެ ބާވަތެއް ކަމަށްވާ ނޯރީ ސީވީޑްއެވެ. މިއީ އިރުމަތީ އޭޝިއާގެ ގައުމުތަކަށް ޚާއްސަ ސޫޝީ ތައްޔާރުކުރާއިރު، ބޭރުގައި އޮޅާލާފައި ހުންނަ ސީވީޑެވެ. ބެޓެރީގެ ރޮޑްތައް ހަދާފައިވަނީ ބީވެކްސްއިން ކަމަށް ވާއިރު، ދެކޮޅު ގުޅައިލަނީ ކޭކު ފަދަ ޕޭސްޓްރީގެ އުފެއްދުންތައް ޒީނަތްތެރިކުރަން ބޭނުންކުރާ، ކެވޭގޮތަށް ހުންނަ ގޯލްޑް ލީފް ނުވަތަ ރަން ފޮތިތަކުންނެވެ.

ކާލެވޭގޮތަށް ފަރުމާކުރާ އިލެކްޓްރޯނިކް ޑިވައިސްތަކަކީ، ވަކިން ޚާއްސަކޮށް ބަނޑާއި ގޮހޮރުގެ ބަލިތައް ދެނެގަނެ، ފަރުވާކުރުމުގެ ސިއްހީ ޚިދުމަތްތަކަށް އިންގިލާބީ ބޮޑު ބަދަލެއް ގެނެސްދޭނެ އެއްޗެއް ކަމަށް ދިރާސާ ޓީމުން ޢުއްމީދު ކުރެއެވެ. މިފަދަ އާލާތްތަކަކީ، ކާބޯތަކެތީގެ ކޮލިޓީ ނުވަތަ ރައްކާތެރިކަން ހުރި މިންވަރު ވަޒަންކުރަންވެސް ބޭނުންކުރެވިދާނެ ޑިވައިސްތަކެކެވެ.

ދިރުވާލެވޭގޮތަށް ހުންނަ ސިއްހީ ބައެއް ޢާލާތްތައް މިހާރުވެސް ކޮންމެވެސް ވަރަކަށް ބޭނުން ކުރެއެވެ. ނަމަވެސް، އެފަދަ ޑިވައިސްތައް ދިރުވާލުމުގެ ތެރޭގައި ނުވަތަ ބަނޑު ތެރެއަށް ފޮނުވާލުމުގައި އެއްވެސް މައްސަލައެއް ދިމާވެއްޖެނަމަ، އޮޕަރޭޝަނެއް ނުވަތަ ސަރޖަރީއަކަށް ދާންޖެހެއެވެ. އެއާ ޚިލާފަށް އައިއައިޓީގެ ޑިވައިސް ފަރުމާކޮށްފައިވަނީ، ސިއްހަތަށް ގެއްލުމެއް ނުލިބޭގޮތަށް، ހަޖަމުވާގޮތަށެވެ.

އައިއައިޓީގެ ބެޓެރި މަސައްކަތް ކުރަން ބޭނުންވަނީ 0.65 ވޯލްޓްގެ ހަކަތައެވެ. މިއީ އެކަމުގެ ސަބަބުން އިންސާނެއްގެ ހަށިގަނޑުގެ އެތެރެއަށް ނުރައްކަލެއް ނެތް މިންވަރެކެވެ. މި ބެޓެރިއަކީ 12 މިނެޓެއްހާއިރު ވަންދެން 48 މައިކްރޯއެމްޕްގެ ހަކަތަ އުފައްދާ ބެޓެރިއެކެވެ. މިއީ ކުދި ލެޑް ފަދަ ކަރަންޓް ސާމާނުތަކަށް ހަކަތަ ފޯރުކޮށްދޭނެ މިންވަރެކެވެ. ދިރާސާ ޓީމުން މިހާރު މަސައްކަތްކުރަމުންދަނީ ބެޓެރީގެ ކެޕޭސިޓީ އިތުރުކުރުމަށެވެ. އަދި ފަސޭހަކަމާއެކު ދިރުވާލެވޭ ބޭސްގުޅައެއްގެ ސައިޒަށް ބެޓެރި ކުޑަކުރުމުގެ ދިރާސާތައްވެސް ދަނީ ކުރިއަށެވެ.

ބެޓެރިއާބެހޭ ތަފްސީލީ މައުލޫމާތުތައް އެޑްވާންޑްސް މެޓީރިއަލްސް ޖަރނަލްގައި ވަނީ ޝާއިއުކޮށްފައެވެ.