ނީލަ ކޯރު ސާފު ކުރުމުގެ މަސައްކަތުގައި ވަރުބަލިކަމެއް ނެތި އެއް ޢާއިލާއެއްގެ 3 ޖީލު

މިޞްރުގެ ނީލަ ކޯރުގެ އެންމެ ހިތްގައިމު ހިސާބުތަކުން ހިސާބެއްގައި އޮންނަ ޤުރްސާޔާ އަވަށުގައި ދިރިއުޅެމުންދާ މުޙައްމަދު ނަސަރު، ކޮންމެ ދުވަހަކުވެސް ފަތިހު 05:00 ޖަހާއިރު، އެ އަވަށް ދޫކޮށް މަހަށް ފުރައެވެ.

ކޮންމެ ދުވަހަކުވެސް އެ ދުވަހަކު އެ ބޭނޭ މަސްކޮޅު ވިއްކާލުމަށްފަހު، އުމުރުން 59 އަހަރުގެ މަސްވެރިޔާ އަނެއްކާވެސް މިޞްރާބު ޖަހަނީ އޭނާގެ ބޯޓަށެވެ. އޭނާއަށް ދިރިއުޅުމުގެ މަގު ތަނަވަސްކޮށްދޭ މައިގަނޑު މަސްދަރު އަދި އަމިއްލަ ވަޒަން ކަމުގައި އޭނާ ދެކޭ ނީލަ ކޯރަށް އުކާފައި ހުންނަ އެކި ކަހަލަ ކުނިބުނި ނަގާ، ސާފު ކުރުމުގެ މަސައްކަތަށެވެ.

ނީލަ ކޯރުން ނަސަރު އެއްކުރާ ކުނިތައް، އޭނާ ގެންދަނީ ވެރީނައިލް އިނިޝިއޭޓިވްގެ ހެޑްކުއާޓަރަށެވެ. އެތަނަށް ގޮސް، އޭނާ އެ ކުނި ވިއްކަނީއެވެ. ކިލޯއެއް، 14 މިޞްރު ޕައުންޑް ނުވަތަ 0.71 ޑޮލަރުގެ މަގުންނެވެ. އެ ފައިސާއަކީ، 5 މެންބަރުގެ މައްޗަށް އެކުލެވޭ ނަސަރުގެ ޢާއިލާއަށް މިއަދު އިންތިހާ ބޭނުން ޖެހިފައިވާ އިތުރު އާމްދަނީއެކެވެ.

2018 ވަނަ އަހަރު ތަޢާރަފު ކުރި ވެރީނައިލް އިނިޝިއޭޓިވް އަކީ، ދެމެހެއްޓެނިވި ގޮތެއްގައި ނީލަ ކޯރު ސާފުކޮށް ބޭއްވުމުގެ އިތުރުން، މަސްވެރިންނަށް އިތުރު އާމްދަނީއެއް ލިބޭ ގޮތަށް، ކުނިބުނި އަލުން ބޭނުން ކުރެވޭނެ މަގު ތަނަވަސްކޮށްދިނުމުގެ މަޤުޞަދުގައި ފެށި މަޝްރޫއެކެވެ.

މިއަދު ނަސަރުގެ އިތުރުން، އޭނާއަށް ބޮޑު ބޭބެ ކިއާ ހަޔާމް މުޙައްމަދުއާއި އޭނާގެ ދަރިފުޅު ޔަހްޔާއަކީވެސް ވެރީނައިލް އިނިޝިއޭޓިވްގެ އެހީގައި ޢަބުރުވެރި ދިރިއުޅުމެއް ހޯދާފައިވާ، އެ މަޝްރޫއުގެ ބައިވެރިންނެވެ.

ފާއިތުވީ 4 އަހަރެއްހާ ދުވަހަށް ބަލާއިރު، ވެރީނައިލް އިނިޝިއޭޓިވް އިން ވަނީ 180 ޓަނުގެ ކުނި އެއްކޮށްފައެވެ. އަދި 65 އެއްހާ މަސްވެރިންނަށް އިތުރު ވަޒީފާގެ ފުރުޞަތު ތަނަވަސް ކޮށްދީފައެވެ. އެކަށީގެންވާ ވަޒީފާގެ ފުރުޞަތުތަކުން މަހުރޫމްވެފައިވާ ޤުރްސާޔާ އަވަށުގެ އަންހެނުންނަށް އުޖާލާ ދިރިއުޅުމެއް ހޯދާ ދިނުމުގެ ގޮތުން، ވެރީނައިލް އިނިޝިއޭޓިވްއިން ދަނީ ޕްލާސްޓިކް އަލުން ބޭނުން ކުރެވިދާނެ ގޮތްތައް ދަސްކޮށްދިނުމަށް، އަންހެނުންނަށް އަމާޒު ކޮށްގެން ވޯކްޝޮޕްތައްވެސް ހިންގަމުންނެވެ.

ނަސަރު ނީލަ ކޯރު ސާފު ކުރަމުން ދާ އިރު، ހަޔާމް މަސައްކަތް ކުރަމުން ދަނީ އަންހެނުންނަށް ހާއްސަ ވޯކްޝޮޕެއްގައެވެ. އުކާލާފައިވާ ޕްލާސްޓިކް ކޮތަޅު ބަންޑެލިތައް އިސްތިރި ކުރުމުގެ މަސައްކަތުގައެވެ. ހަޔާމްގެ 22 އަހަރުގެ ފިރިހެން ދަރިފުޅު ހަރަކާތްތެރިވަނީ ބޯޓު ފަލިޖެހުމުގައެވެ. އަދި ޕްލާސްޓިކް ފުޅިތައް އަލުން ބޭނުން ކުރުމަށް ހިންގާ ހަރަކާތުގައިވެސް އޭނާ ބައިވެރިވެއެވެ.

ޕްލާސްޓިކް ވިއްކުމުގައި ނަސަރްއަށް އެންމެ ކާމިޔާބު ދުވަސްތަކަކީ ހަފުތާ ބަންދުގެ ދުވަސްތަކެވެ. އެއީ ހަފުތާ ބަންދާ ދިމާކޮށް ނީލަށް ކޯރަށް ވަންނަ ބޮޑެތި ބޯޓުފަހަރާއި، ކައިވެނީގެ މާލަންތަކުން އުކާލާ ކުނިބުނީގެ ޢަދަދު، ހަފުތާ ބަންދުގައި އިތުރުވާތީއެވެ.

ހަފުތާ ބަންދުން ދުވަހެއްގައި، ދުވާލެއްގެ  މައްޗަށް 70 ކިލޯގްރާމްގެ ހުސްފުޅި އެއްކުރެވެއެވެ. ހަފުތާގެ އެހެން ދުވަސްތަކުގައި އެއް ކުރެވެނީ ގާތްގަނޑަކަށް 20 ކިލޯގްރާމްގެ ފުޅިއެވެ.