ވަކިން ލޯބިން ރިލީޒް ކުރުމުގެ ކުރިން ރާއްޖެއެމްވީން ފިލްމުގެ ރިވިއު ގެނެސްދޭނެ!

ދިވެހި ފިލްމް އެވޯޑްގެ ގިނަ އެވޯޑްތަކަކާ އެކު، އަހަރުގެ އެންމެ ކާމިޔާބު ސްޓޫޑިއޯގެ ގޮތުގައި 2017 ވަނަ އަހަރު ނިންމާލި ޑާކް ރެއިން އެންޓަރޓެއިންމަންޓް އިން މި އަހަރު ފުރަތަމަ ރިލީޒް ކުރުމަށް ތައްޔާރުވަމުންދާ ފިލްމު، 'ވަކިން ލޯބިން' ގެ ޕްރީ-ޕްރިމިއަރ ރިވިއުއެއް ގެނެސްދޭން ރާއްޖެއެމްވީން ނިންމައިފިއެވެ.

ހޯމަ ދުވަހުގެރޭ ރިލީޒް ކުރުމަށް ހަމަޖެހިފައިވާ 'ވަކިން ލޯބިން' ގެ ރިވިއު ރާއްޖެއެމްވީއިން ގެނެސްދޭން ނިންމާފައިވަނީ 4 މާރޗު ވާ އާދީއްތަ ދުވަހުގެ ހެނދުނެވެ.

ޕްރީ-ޕްރިމިއަރ ރިވިއުއަކީ ފިލްމުގެ ޕްލޮޓްގެ ތަފްޞީލަށް މާބޮޑަށް ނުގޮސް، ފިލްމަށް ފާޑުކިޔާ ރިވިއުއެކެވެ.

މި ފިލްމު ދެއްކުމުގެ ފަހުގެ ތައްޔާރީތައް މިހާރު ވަމުންދާއިރު، ފިލްމަށް ދަނީ ބޮޑު ތަރުހީބެއް ލިބެމުންނެވެ. އެގޮތުން މިހާތަނަށް މި ފިލްމުގެ 3 ޓްރެއިލަރ އަކާއި 4 ލަވައެއް ރިލީޒްކޮށްފައިވާއިރު، ޓްރެއިލަރ ތަކާއި ލަވަތަކަށްވެސް ވަނީ އާންމުންގެ ބޮޑު ތަރުހީބެއް ލިބިގެން ގޮސްފައެވެ.

މާލޭގެ އިތުރުން ރާއްޖޭގެ އެކި ހިސާބުގައިވެސް މި ފިލްމު ދެއްކުމަށް ވަނީ ނިންމާފައެވެ. އަދި ބައެއް ރަށްތަކުގައި ފިލްމު ޕްރިމިއަރ ކުރާ ހަފްލާތަކުގައި ފިލްމުގައި ހަރަކާތްތެރިވާ ބައެއް ފަންނާނުންވެސް ބައިވެރިވާނެއެވެ.

މި ފިލްމުގެ މައި 3 ކެރެކްޓަރގެ ރޯޅު ކުޅެދީފައިވަނީ މުޙައްމަދު ޖުމައްޔިލް (ޖުމަލް)، މަރިޔަމް މަޖުދާ (މަޖޫ) އަދި ނުޒުހަތު ޝުޢައިބް (ނުޒޫ) އެވެ.

ޑާކްރެއިން އެންޓަރޓެއިންމަންޓުން، މުޙައްމަދު އަލީ (މޮގަރ) އާއި އެކު އައިޝަތު ފުވާދް ޕްރޮޑިއުސްކުރާ މި ފިލްމުގައި ޖުމަލް، މަޖޫ އަދި ނުޒޫގެ އިތުރުން ވެސް ގިނަ ފަންނާނުންތަކެއް ފެނިގެންދާނެއެވެ. އެގޮތުން ޚަދީޖާ އިބްރާހިމް ދީދީ (ކުޑަ ހައްޖަ)، އަޙުމަދު ސުނީ، ޢަބްދުﷲ ޝާފިއު އިބްރާހިމް، މަރިޔަމް ޔާލާ ޝިފާއު، ޢައިޝަތު ޝްއުއާ ޝާނިޒް އަދި ހަސަން މަނިކުގެ އިތުރުން އާދަމް ރިޒްވީ، މާރިއާ ޓެރޭސާ، އިބްރާހިމް އަމާން ޙުސައިން، އަޙުމަދު ޝާކިރު، މާއިޝާ އަޙުމަދާއި މަރިޔަމް ސާޖިޔަތުވެސް މި ފިލްމުން ފެނިގެން ދާނެއެވެ. މީގެ އިތުރުން ވެސް މި ފިލްމުން އިތުރު ބައެއް ފަންނާނުން ފެނިގެން ދާނެއެވެ.

އައިޝަތު ފުވާދް ލިޔެފައިވާ ވާހަކައަކަށް ހަދާ މި ފިލްމު ޑައިރެކްޓް ކޮށްފައި ވަނީ އަލީ ޝިފާޢު (ޗިއްޕެ) އެވެ. ޑާކްރެއިން އެންޓަރޓެއިންމަންޓްގެ ގިނަ ފިލްމުތަކޭ ވެސް އެއްގޮތަށް މި ފިލްމުގެ ވިޜުއަލް އިފެކްޓްސް ހަދާފައިވަނީ ވެސް އަޙުމަދު ޝިނާނެވެ. މި ފިލްމަށް ޙުސައިން ޝަދިޔާން (ސޭންޑީ) ކޮސްޓިއުމް ޑިޒައިން ކޮށްދީފައިވާއިރު، މި ފިލްމުގެ މިއުޒިކް ހަދާފައިވަނީ މުޙައްމަދު އިކްރާމްއެވެ.