ޚުދުމުޚުތާރު ވެރިޔާ އެޑޮލްޕް ހިޓްލަރުގެ ސޯޓެއް ފަސްހާސް ޕައުންޑަށް އެމެރިކާގައި އޮތް ނީލަމެއްގައި ވިއްކާލައިފިއެވެ.

މިއީ 1938 ވަނަ އަހަރުގެ އޭޕްރީލް މަހުގެ 3-4 ށް އޮސްޓްރިއާގެ ޕާކްހޮޓެލް ގްރާޒް ގައި ހިޓްލަރު ހުރި ހުރުމެއްގައި ހޮޓަލަށް ދޫކޮށްފައި ދިޔަ ސޯޓެއް ކަމަށް ރިޕޯޓުތަކުގައި ވެއެވެ.

އުނަގަނޑުގައި 39 އިންޗި އަދި ދިގު މިނުގައި 19 އިންޗި ހުރި މި ސޯޓާ ބެހޭ ގޮތުން ނީލަން އިންތިޒާމް ކުރި ފަރާތުން ބުނެފައިވަނީ، ބެލޭ ގޮތުގައި މިއީ ލޯންޑްރީއަށް ދޮންނަން ފޮނުވި ސޯޓެއް ކަމަށާއި، އަދި ދޮވެގެން ގެނައި އިރު ހޮޓަލުން ހިޓްލަރު ނުކުމެގެން ގޮސްފައި ވުމުގެ ސަބަބުން އެތަނުގައި ސޯޓު ބާއްވާފައި އޮތީ ކަމަށެވެ.

ނީލަމުގައި ސޯޓު ވިއްކާލީ، ހޮޓަލުގެ އޭރުގެ ވެރިފަރާތުގެ ކާފަ ދަރިއެކެވެ.

ސޯޓު ގަތީ ކޮން ފަރާތަކުން ކަމެއް ހާމަކޮށްފައެއް ނުވެއެވެ.

ނީލަން އިންތިޒާމް ކުރި ފަރާތުން ބުނެފައިވަނީ، 80 އަހަރު ވީ، ހިޓްލަރުގެ މި ސޯޓު ރައްކާކޮށްގެން ގެންގުޅުނީ ހޮޓަލުގެ ވެރިފަރާތުގެ އާއިލާއިން ކަމަށެވެ. އަދި މީގެ ކުރިން ހިޓްލަރުގެ އަންހެނުން އީވާ ބްރައުންގެ ޖަނގިލެއްވެސް ނީލަން ކިޔާފައިވާނެ ކަމަށާއި ނަމަވެސް ހިޓްލަރަށް ނިސްބަތްވާ އެއްޗެއް ނީލަންކީ މިއީ ފުރަތަމަ ފަހަރު ކަމަށެވެ.