"ބޮސް" ގެ އަޕްޑޭޓް: މިހާރު ކުރިއަށް ދަނީ އޯޑިއޯ ބެލެންސް ކުރުމުގެ މަސައްކަތް

ދިވެހި ފިލްމު "ބޮސް" ގެ އެންމެ ފަހުގެ މަސައްކަތަކީ އޯޑިއޯ ބެލެންސް ކުރުމުގެ މަސައްކަތް ކަމަށް އެ ފިލްމުގެ ވީޑިއޯ އެޑިޓަރ ރަވީ ފާރޫގް ބުނެފިއެވެ.

ރަވީ ރާއްޖެއެމްވީއަށް ބުނީ "ބޮސް" އަކީ ނަހުލާގެ ފިލްމު ތަކަށް ލޯބި ކުރާ ފަރާތްތަކަށް އެންމެ މުހިއްމު އެއް ފިލްމު ކަމަށާއި މިޒަމާނަށް އެންމެ ރަނގަޅު ފިލްމު ކަމަށެވެ.

"މި ފިލްމުގެ އެކްޓަރުންނަށް ބެލިކަމުގައިވެސް ޑައިރެކްޝަނަށް ބެލި ކަމުގައިވިއަސް އަދި ފިލްމުގެ ކޮލިޓީއަށް ބެލިކަމުގައިވިއަސް އެއީ ޒަމާނީ ރަނގަޅު ފިލްމެއް. މޮޅު ދެރަ އޯޑިއެންސުން ނިންމާނީ،" ރަވީ ބުންޏެވެ.

ރަވީއަށް އެންމެ ކަމުދަނީ މި ފިލްމުގެ ކޮން އެކްޓަރެއްގެ އެކްޓެއްތޯ އެހުމުން ބުނީ ޔުނާން ގެ އެކްޓިން އެއީ ވަރަށް ފާހަގަ ކޮށްލެވޭ އެކްޓިންއެއް ކަމަށެވެ ޔުނާންގެ އެކްޓިންއަށް އެ ފިލްމުގެ ޓްރެއިލާ އާންމު ކުރުމާއެކުވެސް ދިޔައީ ތައުރީފު އޮހެމުންނެވެ.

މި ފިލްމުގައި އެންމެ ކަމުދަނީ ތެދުތެދަށް ބުނަންޏާ ޔުނާންގެ އެކްޓިން. އެއީ މިބުނާހެން އެ ކެރެކްޓާއަކީ މޭކްބިލީވް ކެރެކްޓާއެކޭ. މިސާލަކަށް އޭނާ ފެނިފަވެސް ހީވެދާނެ އޭނަގެ ފަރާތުން އެވަރުގެ ޕާފޯމެންސެއް ނުފެނިދާނެކަމަށް. އެކަމަކު ބުނާނީ އޭނާ ހަމަ ވިރުވާ އަޅާލައޭ." ރަވީ ބުންޏެވެ.

ރަވީ ބުނީ ރާއްޖޭގެ ރަށްރަށުގައި ފިލްމު އެޅުވުމުގެ މަސައްކަތް މިހާރުވެސް ދަނީ ކުރެވެމުންކަމަށެވެ. އަދި މާލޭގައި ފިލްމު އެޅުވުމަށްފަހު ޝްވެކް ސިނަމާގައި އަޅުވާނެ ކަމަށް ރަވީ ބުންޏެވެ.

މި ފިލްމުގެ ޓިކެޓް މިހާރު އޮލިމްޕަހުން ވިއްކަމުން ދާއިރު މި ފިލްމުގެ ވެބްސައިޓް www.bos-themovie.com މެދުވެރިކޮށް ޓިކެޓް އޮންލައިންކޮށް ބުކްކުރުމުގެ ފުރުސަތު ލިބިގެންދެއެވެ.

"ބޮސް"ގެ ލީޑް ރޯލުން ފެނިގެން ދަނީ އަލަށް ތައާރަފުވާ މުހައްމަދު ޔުނާންއާ އެކު، ރިޝްމީގެ ކޮއްކޮ އަދި މިހާރު އެންމެ ވިދާ ބަތަލާ މަރިޔަމް އައްޒަ އެވެ.

ފިލްމްގެ އިތުރު ކާސްޓުންގެ ތެރޭގައި އިބްރާހީމް ޖިހާދު (ޖިމީ)، ފާތުމަތު އާޒިފާ (އަޒޫ)، އަލީ އާޒިމް (ދޮންއައްޔަ) އަދި އަލީ ޝަމީލް ހިމެނެ އެވެ.

"ބޮސް" ގައި ހިމެނެނީ 7 ލަވައެވެ. މި ލަވަތައް ކިޔާފައިވަނީ މުހައްމަދު އަބްދުލް ޣަނީ (ތޭރަވާ) އާއި، އިބްރާހިމް ޒައިދު އަލީ (ކުޑައިއްބެ) އަދި ޝަލަބީ އިބްރާހިމާއި، ހަމޫދުގެ އިތުރުން ރާފިޔަތު ރަމީޒާ، މާއިން ރަޝީދާއި، ފާތިމަތު އަޝްފާއެވެ. މި ފިލްމުގެ ޕްރޮޑިއުސަރަކީ މަޝްހޫރު ބަތަލާ އައިޝަތު ރިޝްމީއެވެ.

މި ފިލްމު ސިނަމާތަކަށް އަންނާނީ އޮކްޓޯބަރު މަހުގެ 31 ވަނަ ދުވަހުގައެވެ.