ހިނގާފައި ގަތަރަށް ދަތުރުކުރި ސްޕެއިންގެ ސަޕޯޓަރެއް ގެއްލިއްޖެ
ސަންޗޭޒްގެ އިތުރުން ވެސް ވޯލްޑް ކަޕް ބެލުމަށްޓަކައި އެކި ފަރާތްތަކުން ވަނީ ތަފާތު ގޮތްގޮތަށް ދަތުރު ފަށާފައި
ފައިމަގުގައި ގަތަރަށް ދަތުރު ފެށި ސަންޗޭޒް (ރެއާލް މެޑްރިޑްގެ ޖާޒީގައި)
މިއަންނަ މަހު ފަށާ ފީފާ ވޯލްޑް ކަޕް ބެލުމަށް ހިނގާފައި ގަތަރަށް ދިޔަ ސްޕެއިންގެ ސަޕޯޓަރެއް ވީނުވީ ނޭންގި ގެއްލިއްޖެއެވެ.
މުބާރާތް ބެލުމަށް ފައިމަގުގައި ގަތަރަށް ދިއުމުގެ ދަތުރު ފެށީ ސްޕެއިންގެ 41 އަހަރުގެ ސަންޓިއާގޯ ސަންޗޭޒްއެވެ. އޭނާގެ ޚަބަރެއް އެންމެ ފަހުންވީ އޮކްޓޫބަރު އެއްވަނަ ދުވަހުއެވެ. އެދުވަހު ސަންޗޭޒް ވަނީ އިރާނާއި އިރާގު ގުޅޭ ބޯޑަރު ކައިރީގައި ހުރެ ނަގާފައިވާ ފޮޓޯއެއް އޭނާގެ ރައްޓެއްސަކަށް ފޮނުވުމަށްފަހު އިރާނަށް ވަތްކަމުގެ ޚަބަރު ދީފައެވެ. ސަންޗޭޒް ގެއްލިގެން ހޯދާތާ ދެ ހަފްތާ ފަހުން ސްޕެއިންގެ ފޮރިން މިނިސްޓްރީން ވެސް ވަނީ އޭނާ ގެއްލިފައިވާކަން ކަށަވަރުކޮށްދީފައެވެ.
ބައެއް މީޑިއާ ރިޕޯޓުތައް ބުނާ ގޮތުން އިރާނުގެ ސިފައިން ވަނީ ސަންޗޭޒް ހައްޔަރުކޮށްފައެވެ. އޭނާގެ އާއިލާއިން ވެސް ބޮޑަށް ބުރަވަނީ މީޑިއާތަކުގައި ފަތުރާފައިވަނީ ތެދު ޚަބަރެއް ކަމަށެވެ. މިކަމާއި ގުޅިގެން ސަންޗޭޒްގެ މަންމަ ސެލިއާ ބުނީ އިރާނުގެ ސިފައިން ސަންޗޭޒް ހައްޔަރުކޮށްފައިވާ ކަމަށް އޭނާއަށް 99 އިންސައްތަ ޔަގީން ކަމަށެވެ. އަދި އިރާނުގައި ހުންނަ ސްޕެއިންގެ އެމްބަސީން އާއިލާއަށް މައުލޫމާތުދީފައިވާ ގޮތުގައި އެކަން ޔަގީން ކުރެވޭނީ އެމްބަސީގެ ފަރާތުން މަންދޫބެއް އިރާނުގެ ޖަލަށް ގޮސް ބެލުމަށް ފަހުއެވެ.
ސަންޗޭޒްގެ އިތުރުން ވެސް ވޯލްޑް ކަޕް ބެލުމަށްޓަކައި އެކި ފަރާތްތަކުން ވަނީ ތަފާތު ގޮތްގޮތަށް ދަތުރު ފަށާފައެވެ. އެގޮތުން ފްރާންސްގެ ދެ ސަޕޯޓަރެއް ވަނީ ބައިސަކަލުގައި ގަތަރަށް ދިއުމަށް ދަތުރު ފަށާފައެވެ. އަދި އާޖެންޓީނާގެ ސަޕޯޓަރެއް ވަނީ މުބާރާތް ފެށުމުގެ ހަ މަސް ކުރިން، މިދިޔަ މޭ މަހު ގަތަރަށް ދަތުރުކޮށްފައެވެ. ބެލެވޭ ގޮތުގައި އެއީ މުބާރާތް ބެލުމަށް އެންމެ ފުރަތަމަ ގަތަރަށް ދަތުރުކުރި ސަޕޯޓަރެވެ.
