ކުރިއަށް އޮތް ފީފާ ވޯލްޑް ކަޕް ބެލުމަށް ޤަތަރަށް ދަތުރުކުރާ ސަޕޯޓަރުން ކޮވިޑަށް ޓެސްޓު ކުރަން ނުޖެހޭ ގޮތަށް ނިންމައިފިއެވެ.
މީގެ ކުރިން ޤަތަރުން ވަނީ މެޗުތައް ބެލުމަށް ސަޕޯޓަރުންނަށް ދަނޑަށް ވަދެވޭނީ ކޮވިޑަށް ޓެސްޓު ކުރުމަށްފަހު ނެގެޓިވް ނަތީޖާއާއެކު އެކަނިކަމަށް ބުނެފައެވެ. ނަމަވެސް ބުދަ ދުވަހު ޤަތަރުން ވަނީ އެނިންމުން ބަދަލުކޮށްފައެވެ. ޤަތަރުގެ ހެލްތު މިނިސްޓްރީން ނެރުނު ބަޔާނެއްގައިވާ ގޮތުން މުބާރާތް ބެލުމަށް ޤަތަރަށް ދަތުރުކުރާ ސަޕޯޓަރުން ކޮވިޑަށް ޓެސްޓަށް ކުރަން ނުޖެހޭނެއެވެ. މިގޮތަށް ނިންމީ މުޅި ދުނިޔެ އަދި ޤަތަރުގައިވެސް ކޮވިޑަށް ޕޮސިޓިވްވާ މީހުންގެ އަދަދު ބޮޑުތަނުން ދަށްވެފައިވާތީއެވެ.
ނަމަވެސް ހުރިހާ ސަޕޯޓަރުންވެސް ޤަތަރުގެ ސަރުކާރުން ކޮންޓެކްޓް ޓްރޭސް ކުރުމަށް ބޭނުންކުރާ މޯބައިލް އެޕްލިކޭޝަންކަމަށްވާ "އިހްތިރާޒް"ގައި ރަޖިސްޓަރީވާން ޖެހޭނެއެވެ.
މިއަންނަ މަހު ޤަތަރުގައި ފަށާ ފީފާ ވޯލްޑް ކަޕާއި ދިމާކޮށް 1.2 މިލިއަން މީހުން ޤަތަރަށް ޒިޔާރަތްކުރާނެ ކަމަށް އެގައުމުން އަންދާޒާކުރެއެވެ. މުބާރާތް ފަށާނީ ނޮވެމްބަރު މަހުގެ 20 ވަނަ ދުވަހުއެވެ.
