ހަރުފައެއް އަންހެނަކު މަރާލައި، މުޅި ހަށިގަނޑު ދިރުވާލައިފި

އިންޑޮނީޝިޔާގެ ޖަމްބީ ޕްރޮވިންސްގައި ޕައިތަން ކިޔާވައްތަރުގެ ބިޔަ ހަރުފައެއް އަންހެނަކަށް ހަމަލާދީ މަރާލުމަށްފަހު އޭނާގެ މުޅި ހަށިގަނޑު އެއްކޮށް ދިރުވާލައިފިއެވެ.

އުމުރުން ފަންސާހުގެ އަހަރުތައް ގުނަމުން އައި ޖަހްރާ ނަމަކަށް ކިޔާ މި އަންހެން މީހާއަކީ ރަބަރު ޕްލާންޓޭޝަނެއްގައި މަސައްކަތްކުރާ މީހެއްކަމަށްވެއެވެ. އޭނާ އާދީއްތަ ދުވަހު ހެނދުނު މަސައްކަތު ދިއުމަށްފަހު ރޭވީއިރުވެސް ގެއަށް އައިސްފައިނުވާތީ، އޭނަ ގެއްލިފައިވާކަމަށް ރިޕޯޓްކުރެވި ހޯދުމުގެ މަސައްކަތް ފަށާފައިވެއެވެ. އަދި ހޯދުމުގެ މަސައްކަތުގައި އުޅުނު ޓީމްތަކަށް އެއްދުވަސް ފަހުން، ބަނޑު ވަރަށް ފުއްޕާފައިވާ، 16 ފޫޓެއްހާ ދިގު ހަރުފައެއް ފެނުނުކަމަށްވެއެވެ. އަދި އޭތި މަރާލައިގެން ބެލިއިރު އޭނާގެ ހަށިގަނޑު ފެނިފައިވާކަމަށްވެއެވެ.

އެ ޕްރޮވިންސްގެ ޕޮލިސް ޗީފް ނޫސްވެރިންނަށް މައުލޫމާތު ދެއްވަމުން ވިދާޅުވިގޮތުގައި، ޖަހްރާގެ ހަށިގަނޑު ހަރުފައިގެ ބަނޑުން ނެގިއިރު ހަށިގަޑަށް މާބޮޑު ގެއްލުމެއް ވެފައެއްނުވެއެވެ. ޕޮލިސް ޗީފް ވިދާޅުވީ ޖަހްރާ ހޯދުމަށް ނުކުމެއުޅުނު އޭނާގެ ފިރިމީހާއަށް، އޭނާގެ ބައެއް އަންނައުނާއި ބައެއް ސާމާނު އާދީއްތަދުވަހުގެ ރޭ ފެނިގެން، އިތުރު މީހުންނެރެ ހޯދަމުން ދަނިކޮށް ހޯމަ ދުވަހު ޕައިތަން ފެނުނުކަމަށެވެ. އަދި އޭތީގެ ބަނޑު ފުއްޕާފައިވާވަރުން ޝައްކުވެގެން އޭތި ހިފައި މަރާލުމަށްފަހު ބަނޑު ފަޅާލީކަމަށް ވެއެވެ.

މިއީ އިންޑޮނީޝިޔާގައި މިގޮތަށް ޕައިތަންއެއް ހަމަލާދީ މަރާލުމަށްފަހު ދިރުވާލި ފުރަތަމަ މީހާ ނޫންކަމަށްވެއެވެ. މިގޮތުން 2017 ވަނަ އަހަރާއި 2018 ވަނަ އަހަރުވެސް މިފަދަ ދެ ހާދިސާ ހިނގާފައިވާކަމަށް ވެއެވެ.