ބަޔާނާ ދެކޮޅަށް ބާސެލޯނާ ދެ ކުޅުންތެރިޔަކަށް ނުކުޅެވޭނެ
ޒަވީ ބުނީ ބާސެލޯނާގެ ސާޖީ ރޮބާޓޯ އާއި އެންޑްރިއެސް ކްރިސްޓެންސަން އަށް ނުކުޅެވޭނެ ކަމަށް
ބާސެލޯނާގެ ކޯޗު ޒަވީ
ޔުއެފާ ޗެމްޕިއަންސް ލީގު ގްރޫޕް ސްޓޭޖުގައި ބަޔާން މިއުނިކާ ދެކޮޅަށް ކުޅޭ މެޗުގައި ބާސެލޯނާގެ ދެ ކުޅުންތެރިޔަކަށް ނުކުޅެވޭނެ ކަމަށް އެ ޓީމުގެ ކޯޗު ޒަވީ ހެނާންޑޭޒް ބުނެފިއެވެ.
ބުދަ ދުވަހުގެ ރޭ ބަޔާންއާ ދެކޮޅަށް ނުކުންނަ މެޗުގެ ކުރިން އޮތް ޕްރެސްގައި ޒަވީ ބުނީ ބާސެލޯނާގެ ސާޖީ ރޮބާޓޯ އާއި އެންޑްރިއެސް ކްރިސްޓެންސަން އަށް ނުކުޅެވޭނެ ކަމަށެވެ. މި ދެ ކުޅުންތެރިންނަށް ވެސް ނުކުޅެވެނީ އަނިޔާގެ ސަބަބުންނެވެ. ޒަވީ ކްރިސްޓެންސަން އަދިވެސް ފިޓު ނުވާ ކަމަށާއި، އަންނަ ހަފްތާގައި އޭނާ އަށް ކުޅެވޭތޯ މަސައްކަތް ކުރަމުން އަންނަ ކަމަށެވެ. ޒަވީ ބުނީ އޭނާ އަންނަނީ ރަނގަޅަށް ރިކަވަރީވެ، ޓްރެއިނިން ހަދަމުން ކަމަށެވެ.
މީގެ އިތުރުން ޒަވީ ބުނީ ސާޖީ ރޮބާޓޯ އަށް ވެސް ނުކުޅެވޭނެ ކަމަށެވެ. އޭނާ އަށް އަނިޔާވެފައިވަނީ ސްޕެނިޝް ލީގުގައި ބާސެލޯނާ އިން އެތުލެޓިކޯ ބިލްބާއޯއާ ދެކޮޅަށް ކުޅުނު މެޗުގައެވެ. ޒަވީ ބުނީ އޭނާގެ ކުޅުން ހުރީ ރަނގަޅަށް ކަަމަށާއި، އޭނާގެ ހުނަރާމެދު އިތުބާރު އޮންނަ ކަމަށެވެ. ނަމަވެސް މެޗުގައި އޭނާ ނުފެނުނަސް އޭނާގެ މަގާމަށް ކުޅޭނެ ބަދަލު ކުޅުންތެރިން ތިބި ކަމަށް ވެސް ޒަވީ ބުންޏެވެ. އޭގެ ތެރޭގައި ޒަވީ ވަނީ ހެކްޓަރ ބާލިންގެ ނަންނ ފާހަގަކޮށްފައެވެ.
ޒަވީގެ އިތުރުން ޕެޑްރީ ވެސް ވަނީ ވާހަކަ ދައްކާފައެވެ. އޭނާ ބުނީ ބާސެލޯނާގެ ކަހަލަ ކުލަބަކުން އަބަދު ވެސް އުންމީދު ކުރާނީ ހާސިލްކުރެވެން ހުރި ހުރިހާ އެއްޗެއް ހާސިލްކުރުމަށް ކަމަށެވެ. އޭނާ ބުނީ ދަށް ނަތީޖާއެއް ލިބޭ ނަމަ އެންމެނަށް ވެސް އުނދަގޫ ވާނެ ކަމަށާއި، ނަމަވެސް ކޯޗެއްގެ ގޮތުގައި ޒަވީ ކުރަނީ ރަނގަޅު މަސައްކަތެއް ކަމަށެވެ.
ޗެމްޕިއަންސް ލީގުގައި ބާސެލޯނާ އިން އަމިއްލަ ދަނޑުގައި ބަޔާނާ ދެކޮޅަށް ނިކުންނާނީ ބުދަ ދުވަހުގެ ރޭ ރާއްޖެ ގަޑިން 12 ޖަހާއިރުއެވެ.
