މޮޅުނުވިޔަސް ސިޓީއަށް ގްރޫޕްގެ އެއްވަނަ ޔަޤީންވެއްޖެ

ދެވަނަ ލެގުގައި ޑޯޓްމަންޑްގެ ދަނޑުގައި މޮޅުނުވިޔަސް, މެންޗެސްޓަރ ސިޓީއަށް ޗެމްޕިއަންސް ލީގު ގްރޫޕް ސްޓޭޖްގެ އެއްވަނަ ޔަޤީންވެއްޖެއެވެ.

ސީޓީ ހިމެނޭ ގްރޫޕްގެ އެއްވަނަ އެޓީމަށް ޔަޤީންވީ ޑޯޓްމަންޑް އަތުން ދެވަނަ ލެގުގައި ލިބުނު ޕޮއިންޓާއެކު ޖުމްލަ 11 ޕޮއިންޓާއެކުއެވެ. ބަކީ ސިޓީއަށް އަދި އެއް މެޗު އެބައޮތެވެ. ޑޯޓްމަންޑާއި ވާދަކުރި ދެވަނަ ލެގުގެ މެޗު ނިމުނީ ލަނޑެއް ނުޖެހި އެއްވަރުވެގެންނެވެ. މެޗުން މޮޅުވާން ރެއާލްއަށް ޕެނަލްޓީއެއް ވެސް ލިބުނެވެ. ރިޔާދު މާރޭޒްއަށް ކުރި ފައުލަށް ދިން ޕެނަލްޓީ ނާކާމިޔާބުވީ ވެސް އޭނާ އަތުންނެވެ. ރިޔާދު މާރޭޒް ފޮނުވާލި ޕެނަލްޓީ ކީޕަރު ދިފާއުކުރީއެވެ. އޭނާ އެންމެ ފަހުން ޖެހި ހަތަރު ޕެނަލްޓީގެ ތެރެއިން ތިން ޕެނަލްޓީ ވަނީ ނާކާމިޔާބުވެފައެވެ. 58 ވަނަ މިނެޓުގައި ޕެނަލްޓީ ލިބުނުއިރު ހާލާންޑް ވަނީ ބަދަލުކޮށްފައެވެ. ހާލާންޑްގެ ބަދަލުގައި ބާނާޑޯ ސިލްވާ ކުޅެން ނެރުނީ ދެވަނަ ހާފް ފަށައިގެން ފުރަތަމަ މިނެޓުގައެވެ.

ކޯޗު ޕެޕް ގާޑިއޯލާ ބުނީ ހާލާންޑް ބަދަލުކުރީ ވަރުބަލިކަމާއި, ހުމުގެ އަސަރުވެސް ހުރުމުން ކަމަށެވެ. އަދި ޕެނަލްޓީ ކާމިޔާބުކުރުމުގައި ސިޓީއަށް މައްސަލަ ކުރިމަތިވާކަން ވެސް ގާޑިއޯލާ ވަނީ ފާހަގަކޮށްފައެވެ. އޭނާ ސިޓީއާ ހަވާލުވިފަހުންވެސް 25 ޕެނަލްޓީ ނާކާމިޔާނުވެއްޖެކަމަށާއި, އޭގެތެރެއިން ގިނަ ޕެނަލްޓީތަކަކީ ޗެމްޕިއަންސް ލީގުގައި ލިބުނު ޕެނަލްޓީތައްކަން ވެސް ގާޑިއޯލާ ފާހަގަކުރިއެވެ. އެއީ މައްސަލައެއް ކަމަށާއި, ހައްލު ހޯދަންޖެހޭކަމަށް ގާޑިއޯލާ ބުންޏެވެ.

މެޗުން އެއްވަރުވެ ގްރޫޕްގެ ދެވަނަ ޓީމްގެ ގޮތުގައި ޑޯޓްމަންޑް ވެސް ވަނީ ދެވަނަ ބުރު ޔަޤީންކޮށްފައެވެ. އެއީ އަށް ޕޮއިންޓާއެކުއެވެ. މިގްރޫޕްގައި އެފްސީ ކޯޕަން ހޭގަން އަތުން ސެވިއްޔާ 3-0 ން މޮޅުވިޔަސް އެޓީމަށް ދެން ދެވަނަ ބުރުގެ ފުރުޞަތެއް ނެތެވެ.