ޔުއެފާ ޗެމްޕިއަންސް ލީގު ގްރޫޕް ސްޓޭޖުގައި މެކަބީ ހައިފާ ބަލިކޮށް ޕެރިސް ސެއިންޓް ޖާމަން (ޕީއެސްޖީ) ދެ ވަނަ ބުރުން ޖާގަ ހޯދައިފިއެވެ.

ގްރޫޕް އެޗުގައި އަންގާރަ ދުވަހުގެ ރޭ ޕީއެސްޖީގެ އަމިއްލަ ދަނޑުގައި ކުޅުނު މެޗު އެ ޓީމުން ކާމިޔާބުކުރީ 2-7 އިންނެވެ. މެޗުގައި ޕީއެސްޖީގެ އާޖެންޓީނާ ތަރި ލިއޮނެލް މެސީ އާއި ފްރާންސްގެ ތަރި ކީލިއަން އެމްބާޕޭ އަދި ބްރެޒިލްގެ ތަރި ނޭމާ ޖޫނިއާ ވަނީ ލަނޑު ޖަހާފައެވެ.

މެޗު ފަށައިގެން 19 ވަނަ މިނެޓުގައި ޕީއެސްޖީއަށް ލީޑު ނަގައިދިނީ މެސީއެވެ. އެއީ މެކަބީ ހައިފާގެ އޭރިޔާ ތެރެއިން އެމްބާޕޭ ދިން ބޯޅައެއް ގޯލުގެ ދުރު ކަނަށް ފޮނުވާލައިގެން މެސީ ކާމިޔާބުކުރި ލަނޑެކެވެ. ފުރަތަމަ ހާފު ނިމުމުގެ ކުރިން ޕީއެސްޖީން ވަނީ އިތުރު ތިން ލަނޑު ޖަހައި، ލީޑު ފުޅާކޮށްފައެވެ. ޕީއެސްޖީގެ ދެ ވަނަ ލަނޑު މެޗުގެ 32 ވަނަ މިނެޓުގައި ޖެހީ އެމްބާޕޭއެވެ. އެއީ މެކަބީ ހައިފާ އޭރިޔާ ތެރެއިން ލިބުނު ބޯޅައެއް ގޯލަށް ފޮނުވާލައިގެންނެވެ. އެ ޓީމުގެ ތިން ވަނަ ލަނޑު ނޭމާ ޖެހީ މެސީ ތަނަވަސްކޮށްދިން ފުރުސަތެއްގަައި 35 ވަނަ މިނެޓުގައެވެ. އޭގެ ތިން މިނެޓު ފަހުން މެކަބީ ހައިފާގެ ސެކް ވަނީ ލަނޑެއް ޖަހާފައެވެ. ޕީއެސްޖީގެ ހަތަރު ވަނަ ލަނޑު 44 ވަނަ މިނެޓުގައި މެސީ ޖެހީ އެމްބާޕޭގެ އެހީތެރިކަމާއެކުއެވެ.

ދެ ވަނަ ހާފު ފަށައިގެން ފަސް ވަނަ މިނެޓުގައި ސެކް ވަނީ މެކަބީ ހައިފާ ދެ ވަނަ ލަނޑު ޖަހައި، ދެ ލަނޑަށް ފަރަގު ކުޑަކޮށްފައެވެ. ނަމަވެސް ޕީއެސްޖީން ވަނީ އިތުރު ލަނޑު ޖަހައި ލީޑު ފުޅާކޮށްފައެވެ. ޕީއެސްޖީގެ ފަސް ވަނަ ލަނޑު 64 ވަނަ މިނެޓުގައި އެމްބާޕޭ ޖެހީ އަޝްރަފް ހަކީމީ ތަނަވަސްކޮށްދިން ފުރުސަތަކުންނެވެ. އޭގެ ތިން މިނެޓު ފަހުން ޕީއެސްޖީގެ ހަ ވަނަ ލަނޑަކީ މެކަބީ ހައިފާގެ ސީން ގޯލްޑްބާގްގެ އަތުން ބައިކޮޅަށް ވަން ލަނޑެކެވެ. ޕީއެސްޖީގެ ފަހު ލަނޑު މެޗުގެ 84 ވަނަ މިނެޓުގައި ޖެހީ ކާލޮސް ސޮލާއެވެ. އޭނާ ލަނޑު ޖެހީ މެސީ ތަނަވަަސްކޮށްދިން ފުރުސަތަކުންނެވެ.

މެޗުން މޮޅުވެ ޕީއެސްޖީ ދެ ވަނަ ބުރަށް ދިޔައީ ގްރޫޕްގެ އެއް ވަނަ ޓީމުގެ ގޮތުގައެވެ. އެއީ ފަސް މެޗުން 11 ޕޮއިންޓާއެކުއެވެ. މި ގްރޫޕްގެ ދެ ވަނައިގެ ގޮތުގައި ދެ ވަަނަ ބުރަށް ދިޔައީ ބެންފީކާއެވެ. އެ ޓީމަށް ވެސް ފަސް މެޗުން ލިބެނީ 11 ޕޮއިންޓެވެ. ނަމަވެސް ޕީއެސްޖީ ކުރި ހޯދަނީ ފައިދާ ގޯލުންނެވެ.