ދުނިޔޭގެ ތައްޓަށް ކުޅެވޭ އެންމެ ޝަރަފުވެރި މުބާރާތް ފަށަން މިހާރު ވަނީ މަސް ދުވަހަަށް ވުރެ ކުޑަތަންވެފައެވެ.
ހަތަރު އަހަރުން އެއް އަހަރު އޮންނަ މި މުބާރާތަށް ޤައުމުތަކުން ތައްޔާރުވަމުން އަންނަނީ ވަރަށް ފުރިހަމަ އަށެވެ. ޚާއްސަކޮށް ވަރުގަދަ ގްރޫޕްތަކުގައި ލައްވާލާފައިވާ ޓީމުތަކުން އަންނަނީ ފުރިހަމަ އަށް ތައްޔާރުވަމުންނެވެ. މުބާރާތަށް ކުޑަތަންވަމުން އަންނަ ވަރަކަށް ކުޅުންތެރިން ވެސް އަންނަނީ ވަކިވަކިން ވެސް މުބާރާތަށް ތައްޔާރުވަމުންނެވެ.
މުބާރާތަށް ކުޑަ ދުވަސްކޮޅަކަށް ވެފައިވާއިރު، މުބާރާތުގައި ވާދަ ކުރާ ކޮސްޓަ ރިކާ އަށް ވަނީ ބޮޑު ދައްޗަކާ ކުރިމަތިލާން ޖެހިފައެވެ. އެ ޓީމުގެ ޑިފެންސް ލައިންގައި މިފަހަކަށް އައިސް އިސް ދައުރެއް އަދާ ކުރާ އުމުރުން 22 އަހަރުގެ އޯލާންޑޯ ގާލޯ އަށް ވަނީ ދުނިޔޭގެ ފުޓުބޯޅައިގެ މައި އިދާރާ (ފީފާ) ގެ ސަސްޕެންޝަނަކާ ކުރިމަތިލާން ޖެހިފައެވެ. އެއީ ގާލޯ މަނާ ބޭހެއް ބޭނުން ކުރިކަން ފީފާ އަށް ސާބިތުވެފައިވާތީއެވެ. އެއާއެކު ފީފާ އިން މިހާރު ނިންމާފައިވަނީ ގާލޯ މުޅި ވޯލްޑް ކަޕަށް ސަސްޕެންޑު ކުރުމަށެވެ.
އެކަން ސާބިތުކުރެވިފައިވަނީ ކޮސްޓަ ރިކާގެ ފުޓުބޯޅަ އިދާރާ އިން ހެދި ޓެސްޓަކުންނެވެ. އެ ޓެސްޓުގެ ނަތީޖާ ދައްކާ ގޮތުން ގާލޯ ވަނީ ބޭނުން ކުރުން މަނާ ބޭހަކަށް ޕޮސިޓިވްވެފައެވެ. އޭނާ ސަސްޕެންޑުކޮށްފައިވާކަން ފީފާގެ ތަރުޖަމާނު ވަނީ ޔަގީންކޮށްދެއްވާފައެވެ. މިކަމާ ގުޅިގެން އޭނާ ސަސްޕެންޑު ކުރުމުގެ އިތުރުން ފީފާ އިން ވަނީ ޢާންމު އުސޫލެއްގެ ގޮތުން އިތުރު ކަންކަން ބަލަން ފަށާފައެވެ.
މިއީ ވަރުގަދަ ގްރޫޕެއްގައި ލައްވާލި ކޮސްޓަ ރިކާ އަށް ވެސް ބޮޑު ގެއްލުމަކަށްވާނެއެވެ. މުބާރާތުގައި އެ ޤައުމު އޮތީ ސްޕެއިން، ޖަރުމަނު އަދި ޖަޕާނާއެކު ގްރޫޕް އީގައެވެ. ކޮސްޓަ ރިކާގެ ފުރަތަމަ މެޗުގައި ނޮވެމްބަރު މަހުގެ 23 ގައި ނުކުންނާނީ ސްޕެއިންއާ ދެކޮޅަށެވެ. ދެ ވަނަ މެޗުގައި ޖަޕާނާ ދެކޮޅަށް ނޮވެމްބަރު 27 ގައި ނުކުންނައިރު، ގްރޫޕް ސްޓޭޖުގެ ފަހު މެޗުގައި ޖަރުމަނާ ދެކޮޅަށް ނުކުންނާނީ ޑިސެމްބަރު ދެ ވަނަ ދުވަހުއެވެ.
