"ރޮނާލްޑޯ ނެތި ފެނާންޑޭސް މާ މޮޅަށް ކުޅޭ!"

ޕޯޗުގަލްގެ ކްރިސްޓިއާނޯ ރޮނާލްޑޯ ނެތި ބްރޫނޫ ފެނާންޑޭސް މާ މޮޅަށް ކުޅޭ ކަމަށް އެލަން ޝިއަރާ ބުނެފިއެވެ.

ޕްރިމިއާ ލީގުގައި އެންމެ ގިނަ ލަނޑު ޖެހި ޝިއާރާ މިހެން ބުނީ ލީގުގައި މެންޗެސްޓަރ ޔުނައިޓެޑުން ޓޮޓެންހަމާ ދެކޮޅަށް ކުޅުނު މެޗުގައި ފެނާންޑޭސް ދެއްކި ކުޅުމާ ގުޅުވައިގެންނެވެ. އެ މެޗުގައި ފެނާންޑޭސް ވަނީ ލަނޑެއް ޖަހާފައެެވެ. މެޗުގައި ކޯޗު އެރިކް ޓެން ހާގް ރޮނާލްޑޯއަށް ފުރުސަތު ދީފައެއް ނުވެއެވެ.

ޝިއަރާ ބުނީ އެ މެޗުގައި ފެނާންޑޭސްގެ ފަރާތުން ފެނުނީ މޮޅު ކުޅުމެއް ކަމަށެވެ. ޝިއަރާ ބުނީ ރޮނާލްޑޯއާ ނުލައި ފެނާންޑޭސް ޓީމުގައި ހުންނަނީ އުފަލުންނޭ ބުނުމުން ވާހަކަ ބޮޑު ކުރުމަށް ވާނެތޯ ސުވާލު އުފައްދާފައެވެ. ޝިއަރާ ބުނީ މެޗުގައި ފެނާންޑޭސްގެ ފަރާތުން ފެނުނު ކުޅުމާއި، އޭނާގެ ފަރާތުން މޮޅު ލީޑަރޝިޕެއް ފެނުނު ކަމަށެވެ. އޭނާ ބުނީ ފެނާންޑޭސް އަށް މެޗުގައި ގޯލު ހައްގު ކަމަށެވެ.

ފެނާންޑޭސް ބުނީ ޓީމުގެ އެންމެ އިސް ކުޅުންތެރިޔާ އަށް ވާން އޭނާ ބޭނުންނުވާ ކަމަށެވެ. ސަބަބަކީ ބައެއް ކުޅުންތެރިން އެކަން ބޭނުންވާތީ ކަމަށް އޭނާ ބުންޏެވެ. އޭނާ ބުނީ ވަރަށް ބުރަކޮށް މަސައްކަތް ކުރަން ޖެހޭ ކަމަށާއި، އެންމެ ކުޑަ ދުވަހުން ފެށިގެން އޭނާގެ ކުޅުމުގެ ވައްޓަފާޅި ހުންނަނީ އެގޮތުގައި ކަމަށެވެ. މީގެ އިތުރުން ފެނާންޑޭސް ބުނީ އޭނާ އަމިއްލަ އަށް، އޭނާ އަކީ މެޗުގެ މޮޅު ކުޅުންތެރިޔާއޭ ނުބުނާނެކަމަށެވެ. އިތުރަށް އޭނާ ބުނީ އޭނާގެ މަގާމު އޭނާ އަށް އެނގޭ ކަމަށެވެ.

މީގެ ކުރިން އެފަދަ ވާހަކަތަކެއް އެކި ފަރާތްތަކުން ވަނީ ދައްކާފައެވެ. ނަމަވެސް ފެނާންޑޭސް ބުނަމުން އަންނަނީ އެއީ އޭނާ އަށް ޤަބޫލު ކުރެވޭ ވާހަކައެއް ނޫން ކަމަށެވެ. އޭނާ ބުނެފައިވަނީ ރޮނާލްޑޯގެ ސަބަބުން އޭނާގެ ކުޅުމަށް ބަދަލެއް ނާންނަކަމަށެވެ.