ވޯލްޑް ކަޕް ފާސް ހޯދުމަށް 1.5 މިލިއަނަށްވުރެ ގިނަ މީހުން އެދިއްޖެ

މިއަންނަ މަހު ފަށާ ފީފާ ވޯލްޑް ކަޕް ބެލުމަށް ގަތަރަށް އެތެރެވާން ބޭނުންވާ "ހައްޔާ ފާސް" ހޯދުމަށް 1.5 މިލިއަނަށްވުރެ ގިނަ މީހުން އެދިފައިވާ ކަމަށް ގަތަރުން ބުނެފިއެވެ.

ހައްޔާ ފާސް ސާވިސްގެ އިސްވެރިއަކަށް ހުރި ސާދް އަލް ސުވައިދީ ވިދާޅުވީ ޖުމްލަ 1.5 މިލިއަނާއި 1.7 މިލިއަނާއި ދެމެދުގެ އަދަދަކަށް ހައްޔާ ފާސް ހޯދުމަށް އެކި ފަރާތްތަކުން އެދިފައިވާ ކަމަށެވެ. މެޗު ޓިކެޓު، ޓްރާންސްޕޯޓް ޓިކެޓް އަދި ފޭންޒޯންތަކަށް ވަނުމުގެ ހުއްދައިގެ އިތުރުން ވިސާއެއްގެ ގޮތުގައިވެސް ނޮވެމްބަރު މަހުން ފެށިގެން ގަތަރުގައި ބޭނުންކުރާނީ ހައްޔާ ކާޑެވެ. ވޯލްޑް ކަޕްގެ މެޗު ބަލަން ނޫންގޮތަކަށް ގަތަރަށްދާ ފަރާތްތަކުންވެސް ނޮވެމްބަރު އެކަކުން ފެށިގެން މި ފާސް ހައްދަން ޖެހޭނެއެވެ.

ގަތަރުން އަންދާޒާކުރާ ގޮތުގައި ވޯލްޑް ކަޕާއި ދިމާކޮށް އެކި ގައުމުތަކުން ޖުމްލަ އެއް މިލިއަނަށްވުރެ ގިނަ މީހުން ގަތަރަށް ޒިޔާރަތް ކުރާނެއެވެ. އެހެންކަމުން ދޯހާގެ ދެ އިންޓަނޭޝަނަލް އެއަރޕޯޓުންވެސް އަންނަނީ ދުވާލަކު 150،000 ފަތުރުވެރިންނަށް އެގައުމަށް ޒިޔާރާތްކުރެވޭނެ އިންތިޒާމު ހަމަޖައްސަމުންނެވެ.

ވޯލްޑް ކަޕް ފަށާނީ އަންނަ ނޮވެމްބަރު މަހުގެ 20 ވަނަ ދުވަހުއެވެ. މުބާރާތާއި ދިމާކޮށް ގަތަރަށް ދަތުރުކުރާ ފަރާތްތައްކަށް ބޭނުންވާ އިންތިޒާމުތައް ހަމަޖެއްސުމަށް ގަތަރުން މިހާރު އަންނަނީ ގިނަ މަސައްކަތްތަކެއް ކުރަމުންނެވެ.