ޓޮޓެންހަމަށް ކުޅެމުން އަންނަ ބްރެޒިލްގެ ފޯވާޑް ރިޗާލިސަން އަށް އަނިޔާވެ ކުޅުމާ ދުރުގައި ހުންނަން ޖެހިއްޖެއެވެ.

ރިޗާލިސަން އަށް އަނިޔާވެފައިވަނީ ލީގުގައި ޓޮޓެންހަމުން އެވަޓަންއާ ދެކޮޅަށް ކުޅުނު މެޗުގައެވެ. އޭނާގެ ފައިގެ ކުޑަކަޅުވާ މަސްގަނޑަކަށް ލިބުނު އަނިޔާއެއްގެ ސަބަބުން މެޗުގެ 52 ވަނަ މިނެޓުގައި އޭނާ ވަނީ ބަދަލުކޮށްފައެވެ. އެވަޓަން ދޫކޮށް ޓޮޓެންހަމަށް ބަދަލުވެ، ރިޗާލިސަން އަންނަނީ މޮޅު ކުޅުމެއް ދައްކަމުންނެވެ.

އަނިޔާގެ ސަބަބުން ނޮވެމްބަރު މަހު ޤަތަރުގައި ފަށާ ވޯލްޑް ކަޕްގައި ނުކުޅެވުމުގެ ބިރު އޭނާ އަށް އޮތް ކަމަށް މީޑިއާ ރިޕޯޓުތައް ބުނެއެވެ. އެކަމާ ގުޅިގެން ރިޗާލިސަން ބުނީ، މިއީ އޭނާ އަށް ވަރަށް އުނދަގޫ ވަގުތެއް ކަމަށެވެ. އޭނާ ބުނީ ވޯލްޑް ކަޕްގައި ކުޅުމަކީ އޭނާގެ ވަރަށް ބޮޑު ހުވަފެނެއް ކަމަށެވެ. އަދި ވޯލްޑް ކަޕް މިހާ ކައިރިވެފައި އޮއްވާ އަނިޔާއެއް ލިބުމުން އުނދަގޫވާ ކަމަށެވެ. ރިޗާލިސަން ބުނީ ކުރިން ވެސް އޭނާ އަށް މިކަހަލަ އަނިޔާއެއް ލިބުނު ކަމަށާއި، އުންމީދަކީ ވީހާވެސް އަވަހަކަށް އަނިޔާއިން ރަނގަޅުވުން ކަމަށެވެ.

އެވަޓަންގެ މެޗަށްފަހު ވާހަކަ ދައްކަމުން ޓޮޓެންހަމްގެ ކޯޗު އެންޓޯނިއޯ ކޮންޓޭ ބުނީ، ލީގުގައި މެންޗެސްޓަރ ޔުނައިޓެޑާ ދެކޮޅަށް ކުޅޭ މެޗަށް ރިޗާލިސަން ނާރުވާނެ ކަމަށެވެ. ކޮންޓޭ ބުނީ ރިޗާލިސަން އަށް ލިބުނު އަނިޔާގެ ސަބަބުން ރިކަވަރީއަށް އޭނާ ވަގުތު ބޭނުންވާނެ ކަމަށެވެ. ކޮންޓޭ ބުނީ ރިޗާލިސަން އަކީ ކޮލެޓީ ހުރި ވަރުގަދަ ކުޅުންތެރިޔެއް ކަމަށާއި، އޭނާއާއެކު ޓީމަށް ވެސް ކުރިއެރުންތަކެއް ލިބޭ ކަމަށެވެ.

ލިބުނު އަނިޔާގެ ސަބަބުން ރިޗާލިސަންގެ އިތުރު މެޑިކަލް ޓެސްޓުތައް ހެދުން އާދިއްތަ ދުވަހު ކުރިއަށްދާނެއެވެ.