މެންޗެސްޓަރ ސިޓީއަށް ކުޅެމުން އަންނަ އިންގްލެންޑުގެ މިޑްފީލްޑަރު ފިލް ފޮޑެން, އެ ޓީމާއެކު ހަދާފައިވާ އެއްބަސްވުން އައުކޮށްފިއެވެ.

ފޮޑެން އޭނާގެ ސީނިއަރ ކެރިއަރު ފަށާފައިވަނީ 2017 ވަނަ އަހަރު ސިޓީންނެވެ. ފޮޑެން އަންނަނީ ސިޓީގައި މޮޅު ކުޅުމެއް ދައްކަމުންނެވެ. އޭނާއަކީ ސިޓީގައި އިސް ދައުރެއް އަދާކުރާ ކުޅުންތެރިއެކެވެ. ސިޓީގެ އެއްބަސްވުން ފޮޑެން އައުކޮށްފައިވަނީ އިތުރު ފަސް އަހަރު ދުވަހަށެވެ. އެހެންކަމުން މިހާރު ސިޓީއާއެކު އޭނާ ހެދި އެއްބަސްވުމުގެ މުއްދަތު ހަމަވާނީ 2027 ވަނަ އަހަރުގެ ޖޫން މަހުގެ ނިޔަލަށެވެ.

އެއްބަސްވުން އައުކުރުމަށްފަހު ވާހަކަ ދައްކަމުން ފޮޑެން ބުނީ، އެއީ އޭނާގެ ހުވަފެނެއް ހަގީގަތަކަށްވުން ކަމަށެވެ. އޭނާގެ މުޅި އުމުރުގައިވެސް އޭނާއަކީ ސިޓީގެ ސަޕޯޓަރެއްކަމަށެވެ. އަދި ސިޓީއާއެކު 2027އާ ހަަމައަށް ހުރެވޭނެކަން އެނގުމުން ވަރަށް އުފާވާކަމަށެވެ.

މި ސީޒަންގައިވެސް ފޮޑެން އަންނަނީ ސިޓީގައި މޮޅު ކުޅުމެއް ދައްކަމުންނެވެ. ސީޒަންގެ މިހާތަނަށް ސިޓީއަށް ކުޅެދިން 13 މެޗުގައި ފޮޑެން ވަނީ ހަތް ލަނޑު ޖަހާފައެވެ. ފޮޑެން ވަނީ މިހާތަނަށް ސިޓީއަށް ޖުމުލަ 182 މެޗު ކުޅެދީ، 52 ލަނޑު ޖަހާފައެވެ. ސިޓީއާއެކު އޭނާ ވަނީ ގިނަ ކާމިޔާބީތަކެއްވެސް ހޯދާފައެވެ. އެގޮތުން އިނގިރޭސި ޕްރިމިއަރ ލީގާއި، އެފްއޭ ކަޕާއި، ކަރަބޯ ކަޕް އަދި އެފްއޭ ކޮމިއުނިޓީ ޝީލްޑް އޭނާ ވަނީ ކާމިޔާބުކޮށްފައެވެ.

ފޮޑެން އަންނަނީ 2020 ވަނަ އަހަރުން ފެށިގެން އިނގިރޭސި ގައުމީ ޓީމަށްވެސް ކުޅެމުންނެވެ.