ޑި މާރިއާއަށް ވޯލްޑް ކަޕްގައި ކުޅެވޭނެކަމުގެ އުންމީދު އެބައޮތް

އާޖެންޓީނާގެ ވިންގަރ އެންހެލް ޑި މާރިއާއަށް މިއަހަރުގެ ފީފާ ވޯލްޑް ކަޕްގައި ކުޅެވޭނެކަމުގެ އުންމީދު އެބައޮތްކަމަށް މީޑިއާ ރިޕޯޓުތައް ބުނެފިއެވެ.

ޑި މާރިއާއަށް އަނިޔާވެފައިވަނީ ޔުއެފާ ޗެމްޕިއަންސް ލީގުގައި ޔުވެންޓަސްއިން މެކަބީ ހައިފާއާ ދެކޮޅަށް ކުޅުނު މެޗުގެ ތެރެއިންނެވެ. މެޗުގެ ތެރެއިން ޑި މާރިއާ ފައިގެ ފަލަމަސްގަނޑަށް ލިބުނު އަނިޔާގެ ސަބަބުން އޭނާ ވަނީ ބަދަލުކޮށްފައެވެ.

އެއާއެކު އަންނަ ނޮވެމްބަރު މަހުގެ 20 ވަނަ ދުވަހު ގަތަރުގައި ފަށާ ވޯލްޑް ކަޕުން ޑި މާރިއާ ފެނިދާނެތޯ ވަނީ ސުވާލު އުފެދިފައެވެ. އަނިޔާގެ ސަބަބުން ޑި މާރިއާގެ އިތުރު މެޑިކަލް ޓެސްޓުތަކެއް ވަނީ ބުރާސްފަތި ދުވަހު ހަދާފައެވެ. އެއަށްފަހު ޔުވެންޓަސްއިން އާންމުކުރި ބަޔާނެއްގައި ވަނީ، އަނިޔާއިން އެއްކޮށް ރަނގަޅުވުމަށް 20 ދުވަސް ނަގާނެކަމަށެވެ.

ވޯލްޑް ކަޕް ފެށެން މިހާރު 36 ދުވަހަށް ވެފައިވާއިރު، އަނިޔާއިން ރަނގަޅުވެ ޑި މާރިއާއަށް މުބާރާތުގައި ކުޅުމުގެ ފުރުސަތު އޮންނާނެކަމަށް މީޑިއާ ރިޕޯޓުތައް ބުނެއެވެ. ޑި މާރިއާއަކީ އާޖެންޓީނާގެ މުހިންމު ކުޅުންތެރިޔެކެވެ. 2021 ވަނަ އަހަރު އާޖެންޓީނާއިން ކޮޕަރ އެމެރިކާ މުބާރާތް ކާމިޔާބުކުރި ލަނޑުވެސް ޖެހީ ޑި މާރިއާއެވެ. އޭގެ ފަހުން އާޖެންޓީނާގައި ޑި މާރިއާ އަންނަނީ މޮޅު ކުޅުމެއްވެސް ދައްކަމުންނެވެ.

ޑި މާރިއާ ވަނީ މިއަހަރުގެ ތެރޭގައި އާޖެންޓީނާގެ ގައުމީ ޓީމަށް ކުޅެދިން ފަސް މެޗުން ތިން ލަނޑު ޖަހާފައެވެ. 2008 ވަނަ އަހަރުން ފެށިގެން ގައުމީ ޓީމަށް ކުޅެމުން އަންނައިރު، މިހާތަނަށް ވަނީ ގައުމީ ޓީމަށް 123 މެޗު ކުޅެދީފައެވެ. ދާދި ފަހުން އުމުރުން 34 އަހަރުގެ ޑި މާރިއާ ވަނީ މިއަހަރުގެ ވޯލްޑް ކަޕަށްފަހު ގައުމީ ޓީމު ރިޓަޔަރކުރާނެ ކަންވެސް އިއުލާންކޮށްފައެވެ.