"އަހަރެމެން ކުރާ ކޮންމެ ކަމެއް ޗެލްސީން ކުރަން ބޭނުންވޭ!"

އާރްބީ ލައިޕްޒިގުން ކުރާ ކޮންމެ ކަމެއް ޗެލްސީން ކުރަން ބޭނުންވާ ކަމަށް ވިދާޅުވެ އެ ޓީމުގެ ސީއީއޯ އޮލިވާ މިންޓްޒްލަފް ޗެލްސީ އަށް ފާޑު ވިދާޅުވެއްޖެއެވެ.

އޭނާ މިހެން ވިދާޅުވީ ޗެލްސީގެ އައު ޓެންނިކަލް ޑިރެކްޓަރަކަށް ކްރިސްޓޮފާ ވިވެލް ހަމަޖައްސަން އުޅޭ ކަމަށް އަޑުތައް ފެތުރެމުން ދާ ވަގުތެއްގައެވެ. އޭނާ ވިދާޅުވީ ކުރިން އޮތް އިތުބާރު މިހާރު ނޯންނާނެ ކަމަށެވެ. އަދި އެންމެ ފަހުން ކަންކަން ފިޓު ނުވާކަން ފާހަގަކުރައްވާ އޭނާ ވިދާޅުވީ ދެން އެއްކޮށް މަސައްކަތް ކުރުމަކީ ނުވާނެ ކަމެއް ކަމަށެވެ. އޭނާ ވަނީ ޗެލްސީ އަށް ވަރަށް ބޮޑަށް ފާޑު ވިދާޅުވެފައެވެ.

ލައިޕްޒިގުން ވަނީ އެ ކުލަބުގެ ޓެކްނިކަލް ޑިރެކްޓަރުކަމުން ބުރާސްފަތު ދުވަހު ވިވެލް ވަކިވެސް ކޮށްފައެވެ. ލައިޕްޒިގުން ނެރުނު ބަޔާނެއްގައި ބުނީ، މަގާމުން އޭނާ ވަކިކޮށްފައިވަނީ ކުލަބާ ދެމެދު އުފެދުނު ޚިޔާލު ތަފާތުވުމެއްގެ ތެރެއިން ކަމަށެވެ. ލައިޕްޒިގުން ބުނީ އޭނާގެ މަސްއޫލިއްޔާތުތަކާ ވަގުތީ ގޮތުން މިހާރުގެ މުވައްޒަފެއް ހަވާލުވާނެ ކަމަށެވެ. މީގެ އިތުރުން އެ ކުލަބުގެ އައު ޓެކްނިކަލް ޑިރެކްޓަރު ކަމަށް މެކްސް އެބާލް ހަވާލުވާނެ ކަމަށް ވެސް ލައިޕްޒިގުން ވަނީ ބުނެފައެވެ.

ޖަރުމަނަށް އުފަން އުމުރުން 35 އަހަރުގެ ވިވެލް ވަނީ މީގެ ކުރިން ލައިޕްޒިގްގެ ހެޑް އޮފް ސްކައުޓިން، އަދި ސްޕޯޓިން ޑިރެކްޓަރުކަން ވެސް ކޮށްފައެވެ. ލައިޕްޒިގްގެ ކުރިން ހޮފެންހަމްގައި ވެސް ވިވެލް ވަނީ މަސައްކަތްކޮށްފައެވެ.

މީޑިއާ ރިޕޯޓުތައް ބުނާ ގޮތުގައި ޗެލްސީގެ އައު ޓެކްނިކަލް ޑިރެކްޓަރުގެ ގޮތުގައި ވިވެލް ވަރަށް އަވަހަށް އެއްބަސްވުމުގައި ސޮއި ކުރާނެއެވެ. މީގެ އިތުރުން ޗެލްސީން މަސައްކަތް ކުރަމުން އަންނަނީ މި ހަފްތާގެ ތެރޭގައި އެ މަގާމަށް އޭނާ ހަމަޖެއްސުމަށް ކަމަށް ވެސް ރިޕޯޓުތައް ބުނެއެވެ.