ލައިޕްޒިގް ބަލިކޮށް، ލިވަޕޫލަށް ތިން ވަނަ މޮޅު

ޔުއެފާ ޗެމްޕިއަންސް ލީގުގައި އާރްބީ ލައިޕްޒިގާ ދެކޮޅަށް ކުޅުނު މެޗުން މޮޅުވެ، ލިވަޕޫލް އިން ތިން ވަނަ މޮޅު ހޯދައިފި އެވެ.

ލައިޕްޒިގްގެ އަމިއްލަ ދަނޑުގައި ބުދަ ދުވަހުގެ ރޭ ކުޅުނު މެޗު ލިވަޕޫލް އިން ކާމިޔާބު ކުރީ 1-0ންނެވެ. މެޗުގައި ލިވަޕޫލް އިން ލަނޑު ޖަހާފައި ވަނީ ވެސް ފުރަތަމަ ހާފުގަ އެވެ.

މެޗުގެ ފުރަތަމަ ހާފުގެ 27 ވަނަ މިނެޓުގައި ލިވަޕޫލަށް ލީޑު ނަގައިދިނީ ޑާވިން ނޫނޭޒް އެވެ. އެ ލަނޑު ޖަހަން އޭނާ އަށް ފުރުސަތު ތަނަވަސްކޮށްދިނީ މިޞްރުގެ ފޯވާޑު މުޙައްމަދު ޞަލާޙު އެވެ. އޭގެ ފަހުން ވެސް މެޗުގައި ލިވަޕޫލް އިން ވަނީ އިތުރު ލަނޑު ޖެހުމަށް ފުރުސަތު ތަކެއް ތަނަވަސްކޮށްފަ އެވެ.

ޗެމްޕިއަންސް ލީގުގައި ލިވަޕޫލް އިން މިހާތަނަށް ކުޅުނު ތިން މެޗުން ވެސް މޮޅުވެފައިވާއިރު، ނުވަ ޕޮއިންޓާ އެކު އެ ޓީމު އޮތީ ދެ ވަނައިގަ އެވެ. ހަމަ އެ އަދަދަށް މެޗު ކުޅެގެން އެއް ވަނައިގައި އޮތް އެސްޓަން ވިލާ އަށް ވެސް ލިބެނީ ނުވަ ޕޮއިންޓެވެ. މި ސީޒަނާ ދިމާކޮށް ލިވަޕޫލްގެ ކޯޗުކަމާ ހަވާލުވި އާން ސްލޮޓްގެ އިރުޝާދުގެ ދަށުން އެ ޓީމު އަންނަނީ ރަނގަޅު ނަތީޖާތަކެއް ނެރެމުންނެވެ.