ޓީމް މާރަންދޫއާއި 22 ސްޕޯޓްސް ކްލަބު ފައިނަލަށް
މުބާރާތުގެ ފައިނަލް މެޗު އޮންނާނީ މި މަހުގެ 13 ވަނަ ދުވަހު
އާރްވީއެސްއޭ ވިމެންސް ހޭންޑް ބޯލް ޓޯނަމެންޓް
ހއ. ހޯރަފުށީގައި މިހާރު ކުރިއަށްދާ އާރްވީއެސްއޭ ވިމެންސް ހޭންޑް ބޯލް ޓޯނަމެންޓްގެ ފައިނަލް ޖާގަ, ޓީމް މާރަންދޫއާއި 22 ސްޕޯޓްސް ކްލަބު ކަށަވަރުކޮށްފިއެވެ.
މި ދެޓީމަށްވެސް ފައިނަލުގެ ޖާގަ ކަށަވަރުވީ ހޯމަ ދުވަހު ކުޅުނު މެޗުތައް ކާމިޔާބުކޮށްގެންނެވެ. ހޯމަ ދުވަހު ޓީމް މާރަންދޫ ބައްދަލުކުރީ ފްރިގޭޓަރއާއެވެ. މި މެޗު މާރަންދޫން ކާމިޔާބުކުރީ 16-8ންނެވެ. މެޗުގެ މޮޅު ކުޅުންތެރިއަކީ ޓީމް މާރަންދޫގެ ޝިފާނާއެވެ.
ހޯމަ ދުވަހު 22 ސްޕޯޓްސް ކްލަބު ބައްދަލުކުރީ ހޯރަފުށީ އެއަރޕޯޓް ޓީމާއެވެ. މި މެޗު 22 ސްޕޯޓްސް ކްލަބުން ކާމިޔާބުކުރީ 11-10ންނެވެ. މެޗުގެ މޮޅު ކުޅުންތެރިއަކަށް ހޮވުނީ 22 ސްޕޯޓްސް ކްލަބުގެ ރުނާއެވެ.
މާރަންދޫން މުބާރާތުގެ ފައިނަލްގެ ޖާގަ ކަށަވަރުކުރީ ލީގު ބުރުގައި ކުޅުނު ހަތަރު މެޗުގެ ތެރެއިން ތިން މެޗު ކާމިޔާބުކޮށްގެންނެވެ. 22 ސްޕޯޓްސް ކްލަބަށް މުބާރާތުގައި ބާކީ އެއް މެޗު އެބައޮތެވެ. ހޯރަފުށީ އާރުވީ ސްޕޯޓްސް އެކަޑަމީން އިންތިޒާމުކުރާ މި މުބާރާތުގެ ފައިނަލް މެޗު އޮންނާނީ މި މަހުގެ 13 ވަނަ ދުވަހުއެވެ.
