ވިއެޓްނާމްގައި އޮންނަ އޭޝިއަން މެންސް ކްލަބް ވޮލީބޯޅަ ޗެމްޕިއަންޝިޕްގައި ރާއްޖެ ތަމްސީލުކުރާ ގައުމީ ޗެމްޕިއަން، މޯލްޑިވިއަން ސްޕޯޓްސް އެންޑް ރެކްރިއޭޝަން ކްލަބް އެންމެ ފަހުގެ ތައްޔާރީތައް ވާން ފަށައިފިއެވެ.
ފާއިތުވި ދެ އަހަރުވެސް މޯލްޑިވިއަންސް ޓީމަށް ކާމިޔާބީ ހޯދައިދިން ކޯޗް އަބްދުﷲ ނާޝިދްގެ ބެލުމުގެ ދަށުން އެޓީމްގެ އެންމެ ފަހުގެ ތައްޔާރީތައް ވާން ފަށާފައި ވާއިރު، އެޓީމަށް އޭޝިއަން ކްލަބް ޗެމްޕިއަންޝިޕުން ފުރިސަތު ލިބެނީ ރާއްޖޭގެ ގައުމީ ޗެމްޕިއަނުންގެ ހައިސިއްޔަތުންނެވެ.
މި މަހުގެ 28 އިން އަންނަ މަހުގެ 6 އަށް ވިއެޓްނާމްގައި ކުރިއަށްދާ މި މުބާރާތުގައި ރާއްޖެއާ އެއް ގުރޫޕެއްގައި ހިމެނޭ ޓީމު ތަކަކީ ޗައިނާގެ ޗެމްޕިއަން ބެއިޖިން މޮޓޯސް އާއި، ތައިލޭންޑްގެ ޗެމްޕިއަން އެއާފޯސް ޓީމާއި ޖަޕާނުގެ ޗެމްޕިއަން ޓޮޔޯޓާ ބޯސޭއާ އެވެ.
މިއަހަރުގެ މުބާރާތުގައި ޖުމްލަ 14 ގައުމެއްގެ ޗެމްޕިއަނުން ބައިވެރި ވާއިރު، މި މުބާރާތުގެ އެންމެ ފަހުގެ ޗެމްޕިއަން އީރާނުގެ ސަރްމަޔާ ބޭންކްވެސް މުބާރާތުގައި ވާދަކުރެއެވެ.
މިކަމާ ގުޅޭ ގޮތުން ވޮލީބޯލް އެސޯސިއޭޝަންގެ ފަރާތުން މައުލޫމާތު ހިއްސާކުރަމުން އެ އިދާރާގެ ރައީސް މުހަންމަދު ލަތީފް (ލަތީބެ) ވިދާޅުވީ މުބާރާތުގައި ވާދަކުރުމަށް މޯލްޑިވިއަން ޓީމުގެ ތައްޔާރީތައް ފެށިގެން ކުރިއަށްދާ ކަމަށާއި، މިމަހުގެ 25 ވަނަ ދުވަހު ޓީމް ވިއެޓްނާމަށް ފުރުމަށް ހަމަޖެހިފައިވާ ކަމަށެވެ. އަދި މުބާރާތުގައި މޯލްޑިވިއަން ޓީމް ރަނގަޅު ކާމިޔާބީއެއް ހޯދާނެ ކަމަށް އުއްމީދު ކުރާކަމަށްވެސް ލަތީބެ ވިދާޅުވިއެވެ.
އޭޝިއާގެ ގައުމުތަކުގެ ޗެމްޕިއަން ކްލަބްތަކުގެ މެދުގައި ކުޅެވޭ މި މުބާރާތުގައި މިއީ ރާއްޖޭގެ ކްލަބެއް ވާދަކުރާ ދެވަނަ ފަހަރެވެ. މީގެ ކުރިން ދިވެހި ސިފައިންގެ ކްލަބް ވަނީ މި މުބާރާތުގައި ވާދަކޮށްފައެވެ.
