އެއަރޕޯޓާއި އޭވިއޭޝަން ސެކިއުރިޓީ އާއި ފެނަކަ އަދި ކްލަބް އެއަރޕޯޓްސް މޮޅު

ކްލަބް މޯލްޑިވްސް ކަޕް ފުޓްސަލް މުބާރާތުގައި މޯލްޑިވްސް އެއަޕޯރޓްސް ކޮމްޕެނީ (އެމްއޭސީއެލް) އާއި, ކްލަބް އޭވިއޭޝަން ސެކިއުރިޓީއާއި, ޓީމް ފެނަކައާއި, ކްލަބް އެއަޕޯރޓްސް ކުޅުނު ފުރަތަމަ މެޗު ކާމިޔާބުކޮށްފިއެވެ.

ގްރޫޕް ސީގައި އެމްއޭސީއެލް ފުރަތަމަ މެޗު ކާމިޔާބުކުރީ ޓްރޭޑް ކްލަބާ ވާދަކޮށް 7-0 ނެވެ. މެޗުގައި އިބްރާހީމް ޝަނޫން ދެ ލަނޑު ޖެހިއެވެ. އެހެން ލަނޑުތައް ޖެހީ އަހުމަދު ސިނާހު, އަހުމަދު ހަމީދު, އަލީ ޝާފިއު, އަބުދުالله ސުޒައިރު އަދި ހުސެއިން ޒާހިރުއެވެ. މިގްރޫޕްގައި ކްލަބް އޭވިއޭޝަން ސެކިއުރިޓީ ވަނީ 6-2 ން ޓީމް ޑީޖޭއޭ ބަލިކޮށްފައެވެ. މެޗުގައި ތައުމީން ނޫހު ތިން ލަނޑު ޖެހިއެވެ. އަދި ފުރަތަމަ ދެ ލަނޑު ޖެހީ އާދަމް މަންސޫރުއެވެ. ފަހު ލަނޑު ޖެހީ އަލީ ފާރިޝްއެވެ. ޓީމް ޑީޖޭއޭގެ ދެ ލަނޑު ޖެހީ ހަސަން އިހުސާންއާއި އަބޫބަކުރު މުޙައްމަދެވެ.

ގްރޫޕް ޑީގެ ފެނަކަ ފުރަތަމަ މެޗު ކާމިޔާބުކުރީ ޔުނައިޓެޑް ބީއެމްއެލްއާ ވާދަކޮށް 2-0 ނެވެ. މެޗުގައި ޓީމް ފެނަކައިގެ ދެ ލަނޑު ޖެހީ މުޙައްމަދު އައްޒާމްއާއި, އަޔާޒު އަހުމަދެވެ. މިގްރޫޕްގައި ކްލަބް އެއަޕޯރޓްސް މެޗު ކާމިޔާބުކުރީ ޓީމް ސިވިލް ކޯޓާ ވާދަކޮށް 4-0 ނެވެ. މެޗުގައި ފުރަތަަމަ ތިން ލަނޑު ޖެހީ އަބޫބަކުރު ސިއްދީގުއެވެ. އަނެއް ލަނޑު ޖެހީ އަލީ ހުސައިންއެވެ.