ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އިން އިންތިޒާމުކޮށްގެން ބާއްވާ މިނިވަން ޗެމްޕިއަންޝިޕްގެ ފައިނަލް ބުރު ހދ.ކުޅުދުއްފުށި އަދި ގދ.ތިނަދޫގައި ބޭއްވުމަށް އެ މުބާރާތުގެ ކޮމެޓީން ނިންމައިފި އެވެ.

މުބާރާތުގެ ޒޯން ބުރުގެ ކުޅުން ނިމި ފައިނަލް ބުރުގެ ކުޅުން އަންނަ ޖުލައި މަހުގެ ފަސްވަނަ ދުވަހު ފަށާއިރު، ފައިނަލް ބުރު ހޮސްޓް ކުރުމަށް ހަ ރަށަކުން ވަނީ ކުރިމަތިލާފައެވެ. އޭގެ ތެރޭގައި ކުޅުދުއްފުށި އާއި ތިނަދޫގެ އިތުރުން ހިމެނެނީ ބ.އޭދަފުށި، ތ.ތިމަރަފުށި، ދ.ކުޑަހުވަދޫ އަދި އައްޑޫ ސިޓީ އެވެ.

ޖުމްލަ 8 ޒޯނަކަށް ބަހާލައިގެން ކުރިއަށް ގެންދިޔަ މި މުބާރާގެ ފައިނަލް ބުރަށް ކޮންމެ ޒޯނަކުން 1 ޓީމު ވަނީ ދަތުރުކޮށްފައެވެ. އެގޮތުން ފައިނަލް ބުރު ކުރިއަށް ގެންދިއުމަށް ހަމަޖެހިފައިވަނީ 2 ގުރޫޕަކަށް ބަހާލައިގެންނެވެ.

ފުޓުބޯޅަ ފޯމެޓަށް މުޅިން އަލަށް ގެނައި ބަދަލާއި ގުޅިގެން، މި މުބާރާތުގެ އެންމެ ގަދަ 4 ޓީމު މާލޭގައި އޮންނަ ދިވެހި ލީގަށް ކޮލިފައި ވާނެއެވެ. މާލެ ލީގުގައި ވާދަކުރާނީ ފުރަތަމަ ޑިވިޝަންގެ ކްލަބުތަކުގެ މެޗުގައި ކުޅެވޭ މާލެ ލީގުގެ ގަދަ 4 ޓީމާއި، މިނިވަން ޗެމްޕިއަންޝިލްގެ ގަދަ 4 ޓީމެވެ.

މުބާރާތުގެ ފައިނަލް ބުރަށް ދަތުރުކޮށްފައިވާ ޓީމުތަކަކީ ހދ. ކުޅުދުއްފުށި، ބ. އޭދަފުށި، ތ. ތިމަރަފުށި، ށ. މިލަންދޫ، އއ. މާޅޮސް، ދ. ކުޑަހުވަދޫ، ގދ. ތިނަދޫ އަދި ސ. ފޭދޫ އެވެ.