މޮޑެސްޓްގެ ލަނޑާއެކު ޑޯޓްމަންޑުން ބަޔާން މޮޅުވިޔަ ނުދީ ހިފަހައްޓައިފި

ޖަރުމަނު ލީގުގައި ޗެމްޕިއަން ބަޔާން މިއުނިކާ ދެކޮޅަށް ކުޅުނު މެޗުގައި އެ ޓީމު މޮޅުވިޔަ ނުދީ  ބޮރޫޝިއާ ޑޯޓްމަންޑުން ހިފަހައްޓައިފިއެވެ.

ޑޯޓްމަންޑުގެ އަމިއްލަ ދަނޑުގައި ކުޅުނު ފުޓުބޯޅަ މެޗު ނިމުނީ 2-2 އިން އެއްވަރުވެގެންނެވެ. ހޮނިހިރު ދުވަހުގެ ރޭ ކުޅުނު މެޗުން މޮޅުވެގެން އެއް ވަނަ އަށް އެރުމުގެ ފުރުސަތު ދެ ޓީމަށް ވެސް އޮތެވެ.

މެޗުގައި ފުރަތަމަ ލަނޑު ޖަހައި ލީޑު ނެގީ ވެސް ބަޔާނުންނެވެ. އެއީ މެޗުގެ 33 ވަނަ މިނެޓުގައި ޖަމާލް މުސިއާލާ ތަނަވަސްކޮދިން ފުރުސަތަކުން ލެއޯން ގޮރެޓްޒްކާ ޖެހި ލަނޑެކެވެ. ބަޔާންގެ ލީޑު ފުޅާ ކުރީ ދެ ވަނަ ހާފުގައެވެ. ދެ ވަނަ ހާފު ފަށައިގެން ކުރީ ކޮޅު ބަޔާނަށް ލީޑު ފުޅާކޮށްދިނީ ލެރޯއި ސާނޭއެވެ. ސާނޭ ލަނޑު ޖެހުމަށް ވެސް އެހީތެރިވެދިނީ މުސިއާލާއެވެ.

މެޗުގެ 74 ވަނަ މިނެޓުގައި ޑޯޓްމަންޑުން ވަނީ ލަނޑެއް ޖަހައި، އުންމީދެއް ހޯދާފައެވެ. އެއީ މޮޑެސްޓު ދިން ބޯޅައަކުން ޔޫސެފާ މޫކޯކޯ ޖެހި ލަނޑެވެ. މޮޑެސްޓު ކުޅެން ނުކުމެފައިވަނީ ބަދަލު ކުޅުންތެރިޔެއްގެ ގޮތުގައި 70 ވަނަ މިނެޓުގައެވެ. މެޗުގެ 90 ވަނަ މިނެޓުގައި ބަޔާންގެ ކިންގްސްލީ ކޯމަން އަށް ވަނީ ދެ ވަނަ ރީނދޫ ކާޑާއެކު ރަތް ކާޑު ދައްކާފައެވެ. މެޗު ނިމެން ދަނިކޮށް ޑޯޓްމަންޑަށް ނަތީޖާ ހަމަހަމަކޮށްދިނީ މޮޑެސްޓުއެވެ.

މެޗުން އެއްވަރުގެ ބަޔާން އާއި ޑޯޓްމަންޑަށް ވެސް ލިބެނީ 16 ޕޮއިންޓެވެ. ފައިދާ ގޯލުން ބަޔާން އޮތީ ތިން ވަނައިގައެވެ. ޑޯޓްމަންޑު އޮތީ ހަތަރު ވަނައިގައެވެ. އެއް ވަނައިގައި އޮތް ޔޫނިއަން ބާލިންއާ ދެ ވަނައިގައި އޮތް ފްރެއިބާގަށް ލިބެނީ 17 ޕޮއިންޓެވެ.