ރޮނާލްޑޯ އަންނަނީ ރަނގަޅަށް ތަމްރީނު ހަދަމުން: ޓެން ހާގް

މެންޗެސްޓަރ ޔުނައިޓެޑަށް ކުޅެމުން އަންނަ ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯ އަންނަނީ ރަނގަޅަށް ތަމްރީނު ހަދަމުން ކަމަށް އެރިކް ޓެން ހާގް ބުނެފިއެވެ.

މި ސީޒަންގައި ރޮނާލްޑޯގެ ފަރާތުން އެދެވޭ ކުޅުމެއް ނުފެނުމުގެ ސަބަބުން ޓެން ހާގް އަންނަނީ ގިނަ ފުޓުބޯޅަ މެޗުތަކުގައި އޭނާ ބެންޗުގައި ބައިންދަމުންނެވެ. ޕްރިމިއާ ލީގުގައި ޔުނައިޓެޑުން އެންމެ ފަހުން މެންޗެސްޓަރ ސިޓީއާ ދެކޮޅަށް ކުޅުނު މެޗުގައި ވެސް ޓެން ހާގް ރޮނާލްޑޯ ކުޅުވާފައެއް ނުވެއެވެ. އެކަމުގެ ސަބަބުން ގިނަ ބަޔަކު ވަނީ ޓެން ހާގަށް ވަރަށް ބޮޑަށް ފާޑު ވެސް ކިޔައިފައެވެ.

ޓެން ހާގް ބުނީ މެޗުގައި ކުޅުމުގެ ފުރުސަތު ނުލިބޭތީ ރޮނާލްޑޯ ހުންނަނީ އުފަލުން ނޫން ކަމަށެވެ. ނަަމަވެސް ރޮނާލްޑޯ އަންނަނީ ރަނގަޅަށް ތަމްރީނުވަމުންކަން ފާހަގަކޮށް ޓެން ހާގް ބުނީ، ރޮނާލްޑޯ އޭނާގެ އެންމެ ރަނގަޅު ދައްކަމުން އަންނަ ކަމަށެވެ. އިތުރަށް ޓެން ހާގް ބުނީ ރޮނާލްޑޯ ހުރީ ވެސް ރަނގަޅު މޫޑެއްގައި ކަމަށެވެ.

މީގެ އިތުރުން ޓެން ހާގް ބުނީ ފަރިތަކުރުންތަކުގައި ރޮނާލްޑޯގެ މޫޑު ހުންނަ ގޮތާމެދު ވަރަށް ގިނައިން ސުވާލު އަންނަ ކަމަށެވެ. ނަމަވެސް ފަރިތަކުރުންތަކުގައި ވެސް ރޮނާލްޑޯ ހުންނަނީ އުފަލުންކަން އޭނާ ވަނީ ފާހަގަކޮށްފައެވެ. ޓެން ހާގް ބުނީ މެޗުތަކުގައި ރޮނާލްޑޯ ކުޅެން ބޭނުންވާ ކަމަށާއި، އެ ފުރުސަތު ނުލިބުމުން އުފާ ނުވާ ކަމަށެވެ.

މިފަހަރު ވެސް ޓެން ހާގް ވަނީ އޭނާގެ ކުރީގެ ވާހަކަތަކެއް ތަކުރާރުކޮށްފައެވެ. އޭނާ ބުނީ މެޗަކުން ޔުނައިޓެޑު 4-0، 5-1 ނުވަތަ 6-1 އިން ބަލިވަމުންދާ ހާލަތެއްގައި ރޮނާލްޑޯ ނާރުވަނީ ކުރާ އިހުތިރާމެއްގެ ސަބަބުން ކަމަށެވެ. އޭގެ ސަބަބުން ކުރިއަށް އޮތް ތަނުގައި ވެދާނެ ގޮތަކާމެދު ކުރާނެ ކަމެއް ނެތް ކަމަށް ވެސް އޭނާ ބުންޏެވެ.

ޔޫރޮޕާ ލީގުގައި ބުރާސްފަތި ދުވަހުގެ ރޭ ޔުނައިޓެޑުން ނުކުންނަނީ ރަށުން ބޭރުގައި އޮމޯނިއާ ނިކޯސިއާއާ ދެކޮޅަށެވެ.