މި ސީޒަންގައި ލީގުގައި ހޯދި ފުރަތަމަ މޮޅާއެކު ލެސްޓަރ ސިޓީ ތާވަލުގެ ފުލުން ކުރިއަށް

އިނގިރޭސި ޕްރިމިއަރ ލީގުގައި މިސީޒަންގައި ލެސްޓަރ ސިޓީން ފުރަތަމަ މޮޅު ހޯދައިފިއެވެ.

ލެސްޓަރ ސިޓީން އާސީޒަންގެ ފުރަތަމަ މޮޅު ހޯދީ އަށްވަނަ މެޗުގައި 4-0 ން ނޮޓިންގހަމް ފޮރެސްޓް ބަލިކޮށްގެންނެވެ. ފުޓުބޯޅަ މެޗުގައި އިނގިރޭސި ފޯވާޑް ޖޭމްސް މެޑިސަން ދެ ލަނޑު ޖަހާ, އެއް ލަނޑު ޖަހަން ފުރުޞަތު ފަހިކޮށްދިނެވެ. އެއާއެކު އޭނާއަށް އިނގިރޭސި ޤައުމީ ސްކޮޑުން ޖާގަ ދޭންޖެހޭކަމަށް ލެސްޓަރ ސިޓީގެ ކޯޗު ބްރެންޑަން ރޮޖާރސް ވަނީ ބުނެފައެވެ. އޭނާ ބުނީ މިދިޔަ 18 މަސް ދުވަހު މެޑިސަން ދައްކަމުން އަންނަ ކުޅުމަށް ބަލާއިރު އިނގިރޭސި ސްކޮޑުން ޖާގަ ނުދިނުމަކީ ބަލައިގަނެވޭނެ ކަމެއް ނޫންކަމަށެވެ. މި މޮޅަކީ މިދިޔަ އަހަރުގެ ޑިސެމްބަރު މަހުގެ ފަހުން އަމިއްލަ ދަނޑުގައި ލެސްޓަރ ސިޓީ ހޯދި އެންމެ ބޮޑު މޮޅެވެ.

މިމޮޅާއެކު ލެސްޓަރ ސިޓީ މިހާރު އޮތީ 20 ޓީމް ވާދަކުރާ ލީގުގެ 19 ވަނާގައެވެ. އެއީ އަށް މެޗުން ހަތަރު ޕޮއިންޓާއެކުއެވެ.