މިއީ އާޖެންޓީނާގެ ކެޕްޓަން ލިއޮނެލް މެސީ އަލުން އެނބުރި ބާސެލޯނާ އަށް އަންނަ ވާހަކަ ދައްކަންވީ ވަގުތު ނޫން ކަމަށް އެ ޓީމުގެ ކޯޗު ޒަވީ ހެނާންޑޭޒް ބުނެފިއެވެ.

ޒަވީ މިހެން ބުނީ މި ސީޒަނަށްފަހު މެސީ، އޭނާ މިހާރު ކުޅެމުން އަންނަ ކުލަބު ޕެރިސް ސެއިންޓް ޖާމަން (ޕީއެސްޖީ) ދޫކޮށް އަލުން ބާސެލޯނާ އަށް އަންނަން ބޭނުންވާ ވާހަކަ ދެކެވޭ ދަނޑިވަޅެއްގައެވެ.

ބާސެލޯނާ ދޫކޮށް މެސީ ޕީއެސްޖީ އަށް ބަދަލުވީ 2021 ވަނަ އަހަރުއެވެ. ދެ އަހަރު ދުވަހުގެ އެއްބަސްވުމެއްގެ ދަށުން މެސީ ޕީއެސްޖީ އަށް ބަދަލުވީއިރު، އެ އެއްބަސްވުމުގެ މުއްދަތު އަންނަ އަހަރު ހަމަވާނެއެވެ. އެއާއެކު ޕީއެސްޖީން އަންނަނީ މެސީ އަށް އައު އެއްބަސްވުމެއް ހުށަހަޅަން ތައްޔާރުވަމުން ކަމަށް މީޑިއާ ރިޕޯޓުތައް ބުނެއެވެ. ނަމަވެސް މެސީ އޭނާގެ ކުރިމަގާ ގުޅޭ ގޮތުން ގޮތެއް ނިންމާނީ ފީފާ ވޯލްޑް ކަޕަށްފަހު ކަމަށް ތަޖުރިބާކާރުން ބުނެއެވެ.

މެސީ ބާސެލޯނާ ދޫކޮށްލީ އެ ޓީމުގެ މާލީ ޙާލަތު ގޯސްވެ، އޭނާގެ އެއްބަސްވުން އައު ނުކުރެވުމުންނެވެ. އޭގެ ފަހުން މިހާރު ބާސެލޯނާގެ މާލީ ޙާލަތު ރަނގަޅުވެފައިވާއިރު، ބާސެލޯނާގެ އިސްވެރިން އަންނަނީ ތަކުރާރުކޮށް މެސީގެ ވާހަކަ ދައްކަމުންނެވެ. އެގޮތުން ބާސެލޯނާގެ ރައީސް ޖޯން ލަޕޯޓާ އާއި ނައިބު ރައީސް އެޑޮއާޑް ރޮމޭއު ވިދާޅުވީ، މިހާރު މެސީ ބާސެލޯނާ އަށް އައުމަށް މާލީ ގޮތުން އެއްވެސް ހުރަހެއް ނެތް ކަމަށެވެ. ލަޕޯޓާ އަބަދުވެސް ބުނާ ވާހަކައަކީ، ބާސެލޯނާ އަކީ މެސީގެ ގެ ކަމަށެވެ.

މިކަމާ ގުޅޭ ގޮތުން ވާހަކަ ދައްކަމުން ޒަވީ ބުނީ، މިއީ އެވާހަކަ ދައްކަންވީ ވަގުތު ނޫން ކަމަށެވެ. ޒަވީ ބުނީ މެސީ އަކީ އޭނާގެ ވަރަށް ގާތް ރަޙުމަތްތެރިއެއް ކަމަށާއި، މެސީ ހުރީ ޕީއެސްޖީގައި ހިތްހަމަ ޖެހިގެން ކަމަށެވެ. މީގެ އިތުރުން ޒަވީ ވެސް ބުނީ ބާސެލޯނާ އަކީ މެސީގެ ގެ ކަމަށެވެ. އެހެންކަމުން މެސީ އަށް ހަމަޖެހިގެން ޕީއެސްޖީގައި ކުޅުމުގެ ފުރުސަތު ވެސް ދޭން ޖެހޭ ކަމަށް ޒަވީ ބުންޏެވެ.

ޕީއެސްޖީގައި މިއީ މެސީގެ ދެ ވަނަ ސީޒަނެވެ. ފުރަތަމަ ސީޒަނުގައި މެސީ އަށް އެންމެ އެދެވޭ ކުޅުމެއް ނުދެއްކުނު ނަމަވެސް، މި ސީޒަނުގައި މެސީ އަންނަނީ ތަފާތު މޮޅު ކުޅުމެއް ދައްކަމުންނެވެ. މެސީގެ އެއްބަސްވުން އައު ކުރަން ޕީއެސްޖީން ވެސް އަންނަނީ މަސައްކަތް ކުރަމުންނެވެ.