އިނގިރޭސިންގެ އައު ރަސްގެފާނާއެކު، ޒަމާންތަކަކަށްފަހު ފައިސާފޮއްޗަށްވެސް ބޮޑު ބަދަލެއް

މަންމާފުޅު އަވަހާރަވުމާ ގުޅިގެން އިނގިރޭސި ރަސްކަމުގެ ތަޚުތައް ދާދިފަހުން އިސްކުރެވުނު ރަސްގެފާނު ޗާލްސްގެ ފޮޓޯފުޅާއެކު ފަރުމާކޮށްފައިވާ ފުރަތަމަ ފައިސާފޮތިތައް އާންމުކޮށް ދައްކާލައިފިއެވެ.

ރަސްގެފާނު ޗާލްސްގެ ފޮޓޯފުޅު ހިމަނައިގެން އެންމެ ފުރަތަމަ ފަރުމާކުރި ފައިސާފޮތިތަކުގެ ތެރޭގައި ހިމެނެނީ އިނގިރޭސި 5 ޕައުންޑްގެ ފައިސާ ފޮއްޗާއި، އަވަހާރަވެފައިވާ ރާނީ އެލިޒަބަތު 2 ވަނައިގެ ހަޔާތްޕުޅުގެ ހަނދާނެއް ކަމުގައިވާ 50 ޕެންސް ފައިސާފޮތީގެ ނުފުށެވެ.

ފައިސާފޮތިތަކުން ފެނިގެންދާ ރަސްގެފާނު ޗާލްސްގެ ފޮޓޯފުޅުގެ ކުރެހުން ފަރުމާކުރީ އިނގިރޭސި ފަންނުވެރިއެއް ކަމަށްވާ މާރޓިން ޖެނިންގްސްއެވެ. އަސްލަކަށް ބަލާފައިވަނީ، ޚުދު ރަސްގެފާނު ސީދާ ފާސްކުރައްވާފައިވާ ފޮޓޯފުޅެކެވެ. އިނގިރޭސި ސަގާފަތާ އެއްގޮތަށް، ރަސްގެފާނު ޗާލްސްގެ ފޮޓޯފުޅު ޖަހާފައިވަނީ ފޮޓޯފުޅުގައި ރާނީ އެލިޒަބަތު އިންނެވި ދިމާއާ އިދިކޮޅު މިސްރާބަށެވެ.

އަލަށް ފަރުމާކޮށްގެން ދައްކާލި 5 ޕައުންޑްގެ ފައިސާ ފޮތީގައި ހިމެނޭ ރާނީ އެލިޒަބަތުގެ ފޮޓޯފުޅަކީ މުޅިން އާ ފޮޓޯފުޅެކެވެ. އަދި 50 ޕެންސްގެ ނުފުށުގައި ބޭނުންކޮށްފައިވާ ފަރުމާއަކީ، 1953 ވަނަ އަހަރު ރަނިކަމުގެ ތަޚުތަށް ރާނީ އިސްކުރެއްވި ދުވަސްވަރު ފެނުނު ފަރުމާއެއްކަމަށް މައުލޫމާތު ލިބެއެވެ.

އިނގިރޭސި ރޯޔަލް މިންޓްގެ އިންފޮރމޭޝަން އެންޑް ރިސަރޗް މެނޭޖަރ ކްރިސް ބާކަރ ވިދާޅުވީ، ރަސްގެފާނު ޗާލްސްގެ ފޮޓޯފުޅުތައް ފަރުމާކުރެއްވުމުގައި ޖެނިންގްސް ކޮށްފައި ވަނީ ވަރަށް ފުރިހަމަ މަސައްކަތެއްކަމަށެވެ.

އަވަހާރަވެފައިވާ ރާނީ އެލިޒަބަތު 2 ވަނާގެ ފޮޓޯފުޅާއެކު އިނގިރޭސިވިލާތުގައި މިހާރު ދައުރު ކުރަމުންދާ 27 ބިލިއަނެއްހާ ފައިސާ ފޮތި، އަދިވެސް ލީގަލް ޓެންޑަރެއްގެ ގޮތުގައި ބޭނުން ކުރަމުންދާނެކަމަށާއި، ރަސްގެފާނު ޗާލްސްގެ ފޮޓޯފުޅާއެކު ފަރުމާކުރި އާ ފައިސާ ފޮތިތައް، މަރުހަލާތަކަކަށް ބަހާލައިގެން ތައާރަފުކުރަމުން ދާގޮތަށް ވަނީ ހަމަޖައްސާފައެވެ.