ނަތަންޔާހޫ އިނގިރޭސި ޚާރިޖީ ވަޒީރު ޑޭވިޑް ލެމީ އާ ބައްދަލުކުރައްވަން އިންކާރު ކުރައްވައިފި ކަމަށް ރިޕޯޓްތައް ބުނެފިއެވެ.

އިޒްރޭލަށް އިނގިރޭސިވިލާތުގެ ޚާރިޖީ ވަޒީރު ޑޭވިޑް ލެމީ ކުރެއްވި ދަތުރުފުޅުގައި ލެމީ އާ ބައްދަލުކުރައްވަން ނަތަންޔާހޫ ދެކޮޅު ހެއްދެވީ އިނގިރޭސި ވިލާތުގެ އައު ލޭބަރ ސަރުކާރުން އިންޓަނޭޝަނަލް ކްރިމިނަލް ކޯޓު (އައިސީސީ) ގައި ހިނގަމުންދާ އިޒްރޭލުގެ އިސް އޮފިޝަލުން ހައްޔަރު ކުރުމަށް ނެރުމަށް މަސައްކަތް ކުރާ އަމުރުގެ މައްސަލައިގައި އިނގިރޭސިވިލާތުން އެ މައްސަލަ އާ ދެކޮޅަށް މައްސައްކަތް ނުކުރުމަށް ނިންމުމުން ކަމަށް ޚަރަބަރުތައް ބުނެއެވެ.

އިޒްރޭލުގެ ޗެނަލް 13 އާ ހަވާލާދީ މީޑީއާ ރިޕޯޓްތައް ބުނާ ގޮތުގައި އިނގިރޭސި ޚާރިޖީ ވަޒީރު ލެމީ، ނަތަންޔާހޫ އާ ބައްދަލު ކުރައްވަން އެތައް ފަހަރެއްގެ މަތިން އިނގިރޭސިވިލާތުގެ ސަރުކާރުން އެދުމުން ވެސް ނަތަންޔާހޫގެ ލިކުޑް ޕާޓީގެ ޗެއަރމަން ވަގުތު ނެތް ކަމަށް ބުނެ އެ ބައްދަލުވުން ބޭއްވޭނެ ގޮތެއް ވަނީ ހަދައި ނުދީފައެވެ.

އިޒްރޭލުގެ ޗެނެލް 13 އިން ފާހަގަކުރި ގޮތުގައި، ނަތަންޔާހޫ ކޯފާވީ އިނގިރޭސި ސަރުކާރުން އޭނާއާއި އިސްރާއީލުގެ ދިފާއީ ވަޒީރު ޔޯވް ގަލަންޓްގެ މައްޗަށް ހޭގްގައި ހުންނަ ބައިނަލްއަޤްވާމީ ޓްރައިބިއުނަލް އިން ނެރެން އުޅޭ ހައްޔަރު ކުރުމުގެ އަމުރަށް އިނގިރޭސި ސަރުކާރުން ހުށަހެޅި ރިޒަވޭޝަން އަނބުރާ ގެނައުމަށް ނިންމުމާ ގުޅިގެންނެވެ.

އިޒްރޭލުން ހިފާފައިވާ ސަރަހައްދުތަކަށް އިނގިރޭސި ޚާރިޖީ ވަޒީރު ޒިޔާރަތް ކުރެއްވި އިރު އެ ދަތުރުފުޅުގައި ފަރަންސޭސި ޚާރިޖީ ވަޒީރުވެސް ބައިވެރިވެ ވަޑައިގެންފައިވެއެވެ. ނަތަންޔާހޫ މި ބޭފުޅުންނާ ބައްދަލު ކުރައްވަން އިންކާރު ކުރެއްވި ނަމަވެސް އިޒްރޭލުގެ ޚާރިޖީ ވަޒީރު އިޒްރޭލް ކަޓްޒްއާއި ސްޓްރެޓެޖިކް އެފެއާޒް މިނިސްޓަރު ރޮން ޑަރމަރާ ދެ ވަޒީރުންނާ ބައްދަލުކުރެއްވި ކަމަށް ރިޕޯޓްތައް ބުނެއެވެ.

އިނގިރޭސި އެންމެ އިސް ޑިޕްލޮމެޓް އިޒްރޭލަށް މި ކުރެއްވި ދަތުރުފުޅަކީ، އިރާނާއި ލުބްނާންގެ ހިޒްބުﷲ ގުޅިގެން އިޒްރޭލާ ދެކޮޅަށް ހަނގުރާމައެއް ފެށި ސަރަހައްދަށް ހަނގުރާމައިގެ އަސަރު ފެތުރިދާނެ ކަމުގެ ބިރު އުފެދި ފައި އޮތުމާއެކު މަޝްރަހް ފިނިކުރެވޭތޯ މަސައްކަތް ކުރެއްވުމަށް ކުރެއްވި ދަތުރުފުޅެއް ކަމަށް ޚަބަރުތައް ބުނެއެވެ.

އިޒްރޭލުން އުއްމީދު ކުރަނީ މިފަދަ ހަނގުރާމަ އެއް ފެށިއްޖެ ނަމަ އިޒްރޭލުގެ ދިފާއުގައި އިނގިރޭސިވިލާތުން މަސައްކަތް ކޮށްދޭނެ ކަމުގައެވެ.

މެއި މަހު، އައި.ސީ.ސީގެ ޕްރޮސެކިއުޓަރ ކަރީމް ޚާން ވަނީ ނަތަންޔާހޫ އާއި ގަލަންޓްގެ މައްޗަށް ހައްޔަރު ކުރުމުގެ ވޮރަންޓް އެއް ނެރުމަށް އެދި ހުށަހަޅާފައެވެ. މިއީ ގާޒާގައި އިސްރާއީލުން ހިންގަމުންދާ ހަނގުރާމައިގައި 40،000 އަށްވުރެ ގިނަ ފަލަސްތީނު މީހުން މަރުވެފައިވާއިރު ހިންގާފައިވާ ހަނގުރާމައިގެ ޖަރީމާތަކުގައި ނަތަންޔާހޫ އާއި ގަލަންޓް ބައިވެރިވެފައިވާ ކަމަށް އެކަށީގެންވާ ހެކި ހުރުމާ ގުޅިގެން ނެރުމަށް އެދިފައިވާ އަމުރެކެވެ.

ޖުލައި 26 ވަނަ ދުވަހު، ޔޫކޭގެ ބޮޑުވަޒީރު ކޭ ސްޓާމަރގެ ތަރުޖަމާނު ވިދާޅުވެފައިވަނީ ނަތަންޔާހޫ އާއި ގަލަންޓްގެ މައްޗަށް ވޮރަންޓް ނެރުމަށް އައި.ސީ.ސީ ގައި އެދިފައިވާ އެދުމާ މެދު ކުރީގެ ކޮންޒަވެޓިވް ސަރުކާރުން ހުށަހެޅި އިއުތިރާޒު އަނބުރާ ގެންނާނެ ކަމަށެވެ.

ތަރުޖަމާނު ވިދާޅުވީ، ހައްޔަރު ވޮރަންޓް ނެރުމާއި ނުނެރުމަކީ ކޯޓުން ނިންމާ ކަމެއް ކަމަށެވެ.