ރަސްގެފާނު ޗާލްސް ބާރުއަޅުއްވަނީ ލޭ މައްޗަށް ދިޔަނުދަނީސް މެޗު ކާމިޔާބު ކުރުމަށް

ފަހު ވަގުތު ގޯލް ޖަހައިގެން މޮޅުވުމާއި ޕެނަލްޓީ ޖަހައިގެން މޮޅުމުވުމުގެ ބަދަލުގައި އަވަހަށް ގޯލެއް ޖަހައިގެން ޔޫރޯ ފުޓްބޯޅަ މުބާރާތް ކާމިޔާބުކޮށްދިނުމަށް އިނގިރޭސި ރަސްގެފާނު ޗާލްސް ގައުމީ ޓީމުގެ ކިބައިން އެދިވަޑައިގެންފި އެވެ.

ގައުމީ ޓީމަށް ފޮނުއްވި މަރުހަބާގެ ރަސްމީ މެސެޖްގައި ޗާލްސް ވިދާޅުވީ ފަހު ވަގުތު ގޯލު ޖަހައިގެން މޮޅުވުމާއި ޕެނަލްޓީ ޖަހައިގެން މޮޅުވުމަކީ މުޅި ގައުމު ޕްރެޝަރަށްދާ ކަމެއް ކަމެއް ކަމަށެވެ. އަދި އެކަމާހެދި ހިތުގެ ހިނގުން އަވަސްވެ، ލޭ މައްޗަށް ދިއުމަކީ ސިއްހީ ގޮތުން ރަނގަޅު ކަމެއްނޫން ކަމަށާއި މިހެންވެ އަވަހަށް ގޯލެއް ޖަހައިގެން ކާމިޔާބު ހޯދުމަށެވެ.

އިނގިރޭސިން މުބާރާތުގެ ފައިނަލުގައި ސްޕޭނާ ދެކޮޅަށް ކުޅެން އިނގިރޭސިން ދަތުރުކުރީ އުނދަގޫ މަގަކުންނެވެ. ދެ ވަނަ ބުރުން ކުއާޓާ ފައިނަލަށް ދަތުރުކުރީ ސްލޮވީނިއާ ކޮޅަށް އެންމެ ފަހު ފަސް މިނިޓްތެރޭގައި ޖޫޑް ބެލިންހަމް ޖެހި ގޯލުން ނަތީޖާ އެއްވަރުކޮށް، އިތުރު ވަގުތުގައި ކެޕްޓަން ހެރީ ކޭން ޖެހި ގޯލުން 2-1ން މޮޅުވެގެންނެވެ.

ސެމީ ފައިނަލަށް ދަތުރުކުރީ ޕެނަލްޓީ ޖަހައިގެން ސްވިޒަލޭންޑް ބަލިކޮށްގެންނެވެ. ޗާލްސްގެ މެސެޖްގައި ފަހު ވަގުތު ނަތީޖާ ނެރެންޖެހިފައިވުމުގެ ވާހަކަ ފާހަގަކުރެއްވީ މިސަބަބާހުރެ އެވެ.

މިއީ ވިދިވިދިގެން އިނގިރޭސިން ފައިނަލް ކުޅޭ ދެ ވަނަ ފަރެވެ. 2021 ވަނަ އަހަރުގެ ފައިނަލްގައި އިނގިރޭސިން ބަލިވީ އިޓަލީ އަތުން ޕެނަލްޓީ ޖަހައިގެންނެވެ.

މި ފަހަރުގެ ފައިނަލަކީ 1966ގެ ވޯލްޑްކަޕަށް ފަހު ތައްޓެއް ނުލިބި ދިގުދެމިގެންދާ ސިލްސިލާ ނިންމައި ފުރަތަމަ ފަހަރަށް ޔޫރޯ ކާމިޔާބު ކުރުމަށް އަނެއްކާ ވެސް ލިބިފައިވާ ރަނުގެ ފުރުސަތެކެވެ.