ޗާލްސް ރަސްކަމާ ހަވާލުވެވަޑައިގަންނަވާ ދުވަހު ޕްރެމިއާ ލީގުގައި ގައުމީ ސަލާމް ކިޔަނީ

އިނގިރޭސި ރަސްކަމުގެ ތަހުތުގައި ރަސްގެފާނު ޗާލްސް ރަސްމީކޮށް ވެޑުވިވަޑައިގަންނެވުމުގެ ޝަރަފުގައި އަންނަ މެއި މަހުގެ ހަ ވަނަ ދުވަހު އިނގިރޭސި ޕްރެމިއާ ލީގުގައި ގައުމީ ސަލާމް ކިއުމަށް ނިންމައިފި އެވެ.

ޝާހީ ގަނޑުވަރު ބަކިންހަމް ޕްލަސްއިން އަންގާފައިވާ ގޮތުގެ މަތީން އެދުވަހު ކުޅޭ ހުރިހާ މެޗެއްގައި ވެސް ގައުމީ ސަލާމް ކިޔަން ޖެހޭނެ އެވެ. އަދި ގައުމީ ސަލާމް ކިޔާއިރު ކުޅުންތެރިން ތިބެންވާނީ ސެންޓަސާކަލް މެދުގައި ވަށްބުރަކަށް އެތުރިގެންނެވެ. މިވަގުތު ކުޅުންތެރިންގެ ކުރިމަތީގައި ރަސްގެފާނު ޗާލްސް އާއި އަނބިކަނބަލުން ކެމީލާގެ ހާއްސަ ފޮޓޯފުޅެއް ވެސް ބަހައްޓާފައި ހުންނާނެ އެވެ. މީގެ އިތުރުން ގައުމީ ސަލާމް ކިޔާ ވަގުތު ރަސްގެފާނު ތަހުތާ ހަވާލުވާ ރަސްމިއްޔާތުގެ ހާއްސަ ބެޖް ބޮޑު ސްކްރީނުގައި ދައްކާނެ އެވެ.

ބަކިމްހަމް ޕެލަސްއިން މިހާރު ދަނީ ޕްރެމިއާ ލީގު މެދުވެރިކޮށް މި ބެޖް ކުލަބުތަކަށް ފޯރުކޮށްދެމުންނެވެ.

ގައުމީ ސަލާމް ކިޔަން ޖެހުމާ ގުޅިގެން އެންމެ ކަންބޮޑުވެފައިވަނީ ލިވަޕޫލުންނެވެ. އެ ޓީމުގެ ސަޕޯޓަރުން ވަނީ މިދިޔަ އަހަރުގެ އެފްއޭކަޕް ފައިނަލްގައި ގައުމީ ސަލާމް ކިޔަން ފެށުމުން ގައުމީ ސަލާމަށް މަލާމާތްކޮށް އަޑުގަދަކޮށްފަ އެވެ. މިހެންވެ ލިވަޕޫލުން ގައުމީ ސަލާމް ކިއުމާމެދު އަދި ވަކި ގޮތެއް ނުނިންމަ އެވެ.