ފުޓުބޯޅައިގެ އެންމެ ރަނގަޅު ޕްރޮޖެކްޓް އޮތީ މެންޗެސްޓަރ ސިޓީގައި: ހާލަންޑު

މިވަގުތު ފުޓުބޯޅައިގެ އެންމެ ރަނގަޅު ޕްރޮޖެކްޓެއް އޮތީ މެންޗެސްޓަރ ސިޓީގައިކަމަށް އާލިން ހާލަންޑު ބުނެފިއެވެ.

ސިޓީއަށް ކުޅެމުން އަންނަ ނޯވޭގެ ފޯވާޑް މިހެން ބުނީ އެ ޓީމުގައި އޭނާގެ ކުރިމަގާ ގުޅޭގޮތުން ވާހަކަ ދައްކަމުންނެވެ. ބޮރޫޝިއާ ޑޯޓްމަންޑު ދޫކޮށް ސިޓީއަށް ބަދަލުވެ ހާލަންޑު އަންނަނީ އެ ޓީމުގައި މޮޅު ކުޅުމެއް ދައްކަމުންނެވެ. އޭނާ ވަނީ މިހާތަނަށް ސިޓީއަށް ކުޅެދިން 10 މެޗުގައި 14 ލަނޑު ޖަހާފައެވެ.

ހާލަންޑު ބުނީ މުޅި ދުނިޔެއިންވެސް ފުޓުބޯޅައިގެ އެންމެ ރަނގަޅު ޕްރޮޖެކްޓެއް އޮތީ ސިޓީގައި ކަމަށާއި، އޭނާއަށް ފެންނަގޮތުގައި އޭނާގެ އެންމެ މޮޅު ކުޅުން ދެއްކޭނީވެސް ސިޓީގައިކަމަށެވެ. ހާލަންޑު ބުނީ ސިޓީއަށް ބަދަލުވާން ނިންމުމަކީ އޭނާއަށް ނިންމުނު ވަރަށް ރަނގަޅު ނިންމުމެއް ކަމަށެވެ.

މީގެ އިތުރުން ހާލަންޑު ބުނީ 2021 ވަނަ އަހަރު ޑޯޓްމަންޑުން ސިޓީއާ ދެކޮޅަށް ކުޅުނު މެޗަށްފަހު ގާތްގަނޑަކަށް 15 މީހުން އޭނާ ގާތު ސިޓީއަށް ބަދަލުވާން ބުނިކަމަށެވެ. އޭގެތެރޭގައި ސިޓީގެ ކުޅުންތެރިންކަމަށްވާ ސްޓޯންސް، ޑިއާސް، ފޮޑެން އަދި ޑިބްރައިނާ ހިމެނޭކަން ހާލަންޑު ވަނީ ފާހަގަކޮށްފައެވެ.

ސިޓީގެ ކޯޗު ޕެޕް ގާޑިއޯލާވެސް ވަނީ، ހާލަންޑަކީ ތަފާތު ހުނަރެއް ހުރި މޮޅު ކުޅުންތެރިއެއްކަމަށް ބުނެފައެވެ. އޭނާ ގަބޫލުކުރާގޮތުގައި، ހާލަންޑާއެކު ސިޓީން ދާން ބޭނުންވާ މިސްރާބަށް ދިއުމަށް އިތުރަށް ފަސޭހަވާނެއެވެ.