ސީޒަންގެ ކުރިއަށް އޮތް ތަނުގައި އޭނާގެ އެންމެ މޮޅު ކުޅުން ދައްކާނެކަމަށް މެންޗެސްޓަރ ސިޓީގެ ޕްލޭ މޭކަރު ޖެކް ގްރީލިޝް ބުނެފިއެވެ.
ގްރީލިޝް ބުނީ ފާއިތުވި ދުވަސްތަކުގައި އަނިޔާގެ ސަބަބުން އޭނާގެ އެންމެ މޮޅު ކުޅުމާއި ގާތަށްވެސް ނުކުޅެވޭ ކަމަށެވެ. ގްރީލިޝްއަށް ވަނީ މިދިޔަ އޯގަސްޓު މަހުގައި އަނިޔާވުމުގެ ސަބަބުން ގިނަ މެޗުތަކެއް ގެއްލިފައެވެ. މި ސީޒަންގައި ގްރީލިޝް މިހާތަނަށް ކުޅެފައިވަނީ ހުރިހާ މުބާރާތެއް އެއްކޮށްލައިގެން ޖުމްލަ ހަ މެޗެވެ.
އަނިޔާގެ ސަބަބުން ގިނަ މެޗުތަކެއް ގެއްލުނުކަން ފާހަގަކޮށް ގްރީލިޝް ބުނީ މިހާރު އޭނާގެ ސަމާލުކަން އެންމެ ބޮޑަށް ހުރީ ފިޓްނެސް ރަނގަޅު ކުރުމަށް ކަމަށެވެ. މިއީ ވަގުތުނަގާނެ ކަމެއް ކަމަށާއި, އެހެން ނަމަވެސް ޓީމުގެ ފުރަތަމަ އެގާރައިން ޖާގަ ލިބޭނީ ރަނގަޅަށް ފަރިތަކުރުންތައް ކުރިއަށް ގެންގޮސް ފިޓްނެސް ހޯދައިގެން ކަމަށް ގްރީލިޝް ބުންޏެވެ.
އެސްޓަން ވިލާގައި ހުރުމަށްފަހު ގްރީލިޝް މެންޗެސްޓަރ ސިޓީއަށް ބަދަލުވީ 100 މިލިއަން ޕައުންޑުގެ ރެކޯޑު އަގަކަށެވެ. މިދިޔަ އަހަރުގެ އޯގަސްޓު މަހު ސިޓީއަށް ބަދަލުވި ގްރީލިޝްއަށް މިހާތަނަށް ސިޓީއަށް ކާމިޔާބުކޮށްދެވުނީ އެންމެ ލަނޑެކެވެ.
މިކަމާއި ގުޅޭ ގޮތުން ގްރީލިޝް ބުނީ ލަނޑު ޖެހުމާއި އެސިސްޓު ކުރުމަކީ އޭނާއަށް އެންމެ މުހިންމު ކަންތައް ނޫން ކަމަށެވެ. އެއީ އެޓޭކިންގ ކުޅުންތެރިއަކަށް ވަރަށް މުހިންމު ކަމެއް ނަމަވެސް އޭނާގެ ވިސްނުން ހުރީ ފުޓްބޯޅައިގައި ހަމައެކަނި ކަމަކީ ލަނޑު ޖެހުން ނޫން ކަމަށް ގްރީލިޝް ބުންޏެވެ.
