ވޯލްޑް ކަޕްގައި ސަޕޯޓަރުންނަށް ދަނޑަށް ވަދެވޭނީ ކޮވިޑް ޓެސްޓް ހަދައިގެން

މިއަހަރުގެ ނޮވެމްބަރު މަހު ގަތަރުގައި ފަށާ ފީފާ ވޯލްޑް ކަޕްގެ މެޗުތައް ބެލުމަށް ސަޕޯޓަރުންނަށް ދަނޑަށް ވަދެވޭނީ ކޮވިޑަށް ޓެސްޓު ކުރުމަށްފަހު ނެގެޓިވް ނަތީޖާއާއެކު އެކަނިކަމަށް ގަތަރުން ނިންމައިފިއެވެ.

ފަހަކަށް އައިސް، ވެކްސިން ކާޑު ދެއްކުމަށްފަހު ގިނަ މެޗުތަކަށް ވަނުމުގެ ފުރުސަތު ވަނީ ހުޅުވާލާފައެވެ. ނަމަވެސް ހަމައެކަނި ވެކްސިން ކާޑު ދައްކައިގެން ވޯލްޑް ކަޕްގައި މެޗުބަލަން ދަނޑަކަށް ނުވަދެވޭނެއެވެ. އޭގެ އިތުރުން ކޮވިޑަށް ނެގެޓިވްކަން އަންގައިދޭ ނަތީޖާއެއް ބޭނުންވާނެއެވެ.

އެގޮތުން އުމުރުން ހަ އަހަރުން މަތީގެ ހުރިހާ މީހުންވެސް ކޮވިޑަށް ޓެސްޓުކުރަން ޖެހޭނެކަމަށް މިހާރު ގަތަރުން ވަނީ ނިންމާފައެވެ. ޓެސްޓު ހަދަން ޖެހޭނީ ދަނޑަށް ދާން ދަތުރު ފެށުމުގެ 48 ގަޑިއިރު ކުރިން ނުވަތަ ދަނޑަށް ވަނުމުގެ 24 ގަޑިއިރު ކުރިންކަމަށް، މުބާރާތުގެ ސުޕްރީމް ކޮމިޓީ ފޯރ ޑެލިވަރީ އެންޑް ލެގަސީން ވަނީ ނިންމާފައެވެ. ޓެސްޓު ހަދަންޖެހޭނީ ރަސްމީ މެޑިކަލް ސެންޓަރަކުންނެވެ. ރެޕިޑް ކިޓަކުން އަމިއްލައަށް ހަދާ ޓެސްޓުތައް ބަލައިނުގަތުމަށް ވަނީ ނިންމާފައެވެ.

މީގެ އިތުރުން ދަނޑަށް ހާޒިރުވާ ބިދޭސީ ސަޕޯޓަރުންގެ ތެރެއިން 18 އަހަރުން މަތީގެ ހުރިހާ ސަޕޯޓަރުންވެސް ގަތަރުގެ ސަރުކާރުން ކޮންޓެކްޓް ޓްރޭސް ކުރުމަށް ބޭނުންކުރާ މޯބައިލް އެޕްލިކޭޝަންކަމަށްވާ "އިހްތިރާޒް"ގައި ރަޖިސްޓަރީވާން ޖެހޭނެއެވެ.