އަމީނީ މަގުގެ ގަސްތައް ކަނޑާ މައްސަލަ މަޖިލީހަށް

އަމީނީ މަގު ތަރައްގީ ކުރުމުގެ މަޝްރޫއުގެ ދަށުން އެ މަގުގައި ތާރުއެޅުމުގެ މަސައްކަތްކުރާއިރު މަގުގައި ހުރި ގަސްތައް ކަނޑާ މައްސަލަ ރައްޔިތުންގެ މަޖިލީހަށް ހުށަހަޅައިފިއެވެ.

މި މައްސަލަ މަޖިލީހަށް ހުށަހެޅުއްވީ ހެންވޭރު ހުޅަނގު ދާއިރާގެ މެމްބަރު ހަސަން ލަތީފުއެވެ. އެ މައްސަލަ ހުށަހަޅުއްވައި ކުރެއްވި ޓްވީޓެއްގައި ހަސަން ލަތީފް ވިދާޅުވީ މައްސަލަ ހުށަހެޅުއްވީ ގަސް ކަނޑާތީ އެކަމުން ރައްޔިތުންގެ ކަންބޮޑުވުން އިންތިހާއަށް ބޮޑުވެފައިވާތީ ކަމަށެވެ.

ހަސަން ލަތީފް ހުށަހެޅުއްވި މައްސަލައިގައި ބުނެފައި ވަނީ މާލެއަކީ ހިތްފަސޭހަ ތަނަކަށް ހެދުމުގެ ވައުދަކީ އެމްޑީޕީގެ ވައުދެއް ކަމަށާއި "ޖަޒީރާ ރާއްޖެ މެނިފެސްޓޯ"ގައި އެމްޑީޕީން މާލޭގެ ރައްޔިތުންނާއި މާލޭގައި ދިިރިއުޅޭ އެންމެހައި ރައްޔިތުންނަށް ވެފައިވާ މުހިންމު ވައުދެއް ކަމަށެވެ. އަދި މާލެއަކީ ހިތްފަސޭހަ ތަނަކަށް ހެދުމަށް ޓަކައި ކުރަން ޖެހޭ އެތައް ކަމެއް އެބަހުރި ކަމަށާއި މަލޭގެ މަގުތައް ރަނގަޅު ފެންވަރަކަށް ހެދުމަކީ އޭގެ ތެރެއިން އެއްކަން ކަމަށް ވަނީ ބުނެފައެވެ.

އެ މައްސަލައިގައި ބުނެފައިވަނީ މަގުތައް ހަދާއިރު މާލެއަކީ "ހިތްފަސޭހަ" ތަނަކަށް ހެދުމުގެ މަހްފޫމާއި ވިސްނުން ނުގެއްލޭ ގޮތަށް އެ މަގުތައް ހަދަން ޖެހޭ ކަމަށެވެ.

އަމީނީ މަގު ހަދަން ފަށާއިފައިވާއިރު އެ މަގުގައި މިހާރު މަސައްކަތްކުރާ ހިސާބުގައި ހުރި ހިޔާ ދޭ ބޮޑެތި ގިނަ ގަސްތައް ކަނޑަމުންދިއުމަކީ އިންތިހާއަށް ކަންބޮޑުވުން ހުރި ކަމެއްކަން ހަސަން ލަތީފު ހުށަހެޅުއްވި އެ މައްސަލާގައި ވަނީ ފާހަގަކުރައްވައިފައެވެ. އަދި އެކަމުން އެތައް ސުވާލެއް އުފެދޭ ކަމަށާއި އަމީނީމަގު ހަދަން ނުފަށައި ބާކީ އޮތް ބޮޑު ބައި ހަދަން ފެށުމާއެކު އެ ހިސާބުގައި ހުރި އެ ފަދަ ބިޔަ ގަސްތައް ކަނޑާލާނެތޯ ސުވާލު އުފެދޭ ކަމަށް ބުނެފައިވެއެވެ.

އަމީނީ މަގުގެ އިތުރުން ވެސް މާލޭގެ އެހެން މަގުތައް ހެދުމުގެ މަސައްކަތް ކުރަން ނިންމާފައިވާއިރު މުޅި މާލެއިން ކިތަށް ގަސް ކަނޑާލަން ޖެހޭނެތޯ އާއި އެ ގަސްތައް ނުކަނޑައި މަގު ނުހެދެނީތޯ ސުވާލު އުފެދޭ ކަމަށް ވެސް ވަނީ ބުނެފައެވެ. އަދި ރަށެއް ނުވަތަ ތަނެއް ހިތްފަސޭހަވުމަށް މެދުވެރިވާ އެތައް ސިފަތަކެއް ހުންނަ ކަމަށާއި އެންމެ މުހިންމު އެއް ސިފައަކީ ގުދުރަތީ ގޮތުން އެ ތަނެއް އުފެދިފައިވާ ގޮތަށް ބަލައި ބޮޑެތި ބަދަލުތައް ނުގެނެސް އެ ތަނެއް ތަރައްގީ ކުރުމުން ލިބޭ ހިތްހަމަޖެހުމައި ހިތްފަސޭހަކަން ކަމަށް ވެސް ވަނީ ބުނެފައެވެ.

މެމްބަރު ހަސަން ލަތީފު މި މައްސަލަ މަޖިލީހަށް ހުށަހަޅުއްވާފައިވާއިރު އަމީނީ މަގުގެ މަސައްކަތް ކުރަމުން އަންނަ ރޯޑް ޑިވެލޮޕްމަންޓް ކޯޕަރޭޝަން (އާރުޑީސީ) އިން ބުނެފައިވަނީ އަމީނީ މަގުގައި ހުރި ގަސްތައް ގެންދަނީ ކ. ކުޑަގިރީގައި ތަރަައްގީ ކުރަމުން އަންނަ ޕިކްނިކް އައިލެންޑަށް ކަމަށެވެ. އަދި އަމީނީ މަގުން ނަގާ ކޮންމެ ގަހަކަށް، އެ މަގު ހަދައި ނިމުމުން ގަހެއް އިންދާނެ ކަމަށް ވެސް އެ ކުންފުނިން ވަނީ ބުނެފައެވެ.