ބޮޑު މުސާރައިގައި ކޮންސަލްޓަންޓުން ނަގާތީ އެވާހަކަ ދެއްކުމުން އާރުޑީސީގެ ރަސްމީ އެކްސް އެކައުންޓުން އަވަގުރާނަ ގޮވައިފި

ރޯޑް ޑިވަލަޕްމަންޓު ކޯޕަރޭޝަނުން ބޮޑު މުސާރައިގައި ކޮންސަލްޓަންޓުން ނަގާތީ އެވާހަކަ ދެއްކުމުން އާރުޑީސީގެ އެކްސް އެކައުންޓަކުން އަވަގުރާނަ ގޮވައިފިއެވެ.

ސޯޝަލް މީޑިއާގެ ޕްލެޓްފޯމެއްކަމަށްވާ އެކްސްގައި، އެ ކުންފުނިން ނެރެފައިވާ މެމޯއަކާއެކު އެކްސްގައި ޕޯސްޓެއްކޮށްފައިވަނީ އެ ކުންފުނީގައި ކުރިން މަސައްކަތް ކުރި މުވައްޒަފެކެވެ. އަހުމަދު (ދޮންކޮޅު) އެކްސްގައި ޕޯސްޓުކުރި މެމޯއަކީ އެ ކުންފުނީގެ ޑެޕިއުޓީ މެނޭޖިންގ ޑިރެކްޓަރު މުހައްމަދު ނަބީހު އަފީފު މުވައްޒަފުންނާއި ޑިމާޓްމަންޓުތަކުގެ އިސްވެރިންނަށް ފޮނުވާފައިވާ މެމޯއެކެވެ.

އެގޮތުން މެމޯގައި ވަނީ ކޯޕަރޭޝަންގެ މަސައްކަތްތައް ހަރުދަނާކުރުމުގެ ގޮތުން ކުންފުނީގެ ހިއުމަން ރިސޯސް މަސައްކަތްތަކާއި ރިޕެއަރ އެންޑް މެއިންޓަނަންސްގެ މަސައްކަތްތައް ތަރުތީބުކުރުމަށްޓަކައި އެ ކޯޕަރޭޝަނާއި އަލަށް ގުޅިވަޑައިގެން 2 ކޮންސަލްޓެންޓުންގެ މަސައްކަތަށް އެއްބާރުލުން ދިނުމަށެވެ.

މި މެމޯއާއެކު އޭނާ އެކްސްގައި ކުރި ޕޯސްޓުގައި، ހަރަދު ކުޑަ ކުރަން އާދައިގެ ސްޓާފް އޯޓީ ކަނޑާލާފަ ކޮންސަލްޓަންޓްގެ ގޮތުގައި ބޭކާރު ބަޔެއް ބޮޑު މުސާރާއިގަ ނެގީމަ ހަރަދު ކުޑަވޭތޯ ސުވާލުކޮށް އާރުޑީސީގެ ރަސްމީ އެކްސް އެކައުންޓު ޓެގްކޮށްފައިވެއެވެ.

އަދި އޭނާގެ ޕޯސްޓަށް ރައްދުދީ އާރުޑީސީގެ ރަސްމީ މީޑިއާ އެކައުންޓުން އަވަގުރާނަލިޔެ ބުނެފައިވަނީ އާރުޑީސީއޭ ކިޔާފައި އެއްޗެހި ނުކިޔުމަށެވެ. އަދި އެ ޕޯސްޓް ވަނީ ފަހުން ޑިލީޓްކޮށްފައެވެ. މިއާއެކު އަހުމަދު ކުރި އެހެން ޕޯސްޓެއްގައި އެ ޕޯސްޓު ޖެހީ ކާކުންކަން އިނގޭ މޭރުމަކުން ވަނީ ލިޔެފައެވެ. އޭގައި ބުނެފައިވަނީ "އަދި އެވެސް އެކީގަ މަސައްކަތް ކުރި މީހުން. މީ އާރުޑީސީ އަށް އެއްޗެއް ނުކިޔާ އިރު ވާ ވަރު. މަށަށް އިނގޭ އާރުޑީސީގެ ކަންތަކުގެ ވާހަކަ ލިޔާ ނަމަ ކިހާ ވަރެއް އަރުވާލާނެބާ؟ ޝުކުރިއްޔާ އެކީގަ މަސައްކަތް ކުރި ޓީމް އަށް" ކަމަށެވެ.

ހަރަދު ކުޑަކުރުމުގެ ސިޔާސަތުގެ ދަށުން މުވައްޒަފުން ވަޒީފާއިން ވަކިކޮށް، 35،000 ރުފިޔާގެ މުސާރަ ލިބޭގޮތަށް ވަނީ ދެ ކޮންސަލްޓަންޓުން ނަގާފައެވެ. އަދި ހަރަދު ކުޑަކުރުމަށް ކަމަށް ބުނެ މުވައްޒަފުންގެ އޯޓީވެސް ވަނީ ކަނޑާލާފައެވެ. ނަމަވެސް މި ފަހުން ނެގި ދެ ކޮންސަލްޓަންޓުންނަށް މަހެއްގެ މައްޗަށް 70،000 ރުފިޔާ ހަރަދުވާނެއެވެ.