ޕީއެސްޖީގައި މެސީ ހުރީ ހިތްހަމަޖެހިގެން، މިދިޔަ އަހަރަށްވުރެ މިއަހަރު ތަފާތު

ފްރާންސްގެ ގަދަ ބާރު ޕެރިސް ސެއިންޓް ޖާމަން (ޕީއެސްޖީ)ގައި ހުރީ ހިތްހަމަ ޖެހިގެން ކަމަށް އެ ޓީމަށް ކުޅެމުން އަންނަ އާޖެންޓީނާގެ ކެޕްޓަން ލިއޮނެލް މެސީ ބުނެފިއެވެ.

ބާސެލޯނާގެ ދޫކޮށް މެސީ ޕީއެސްޖީ އަށް ބަދަލުވީ މިދިޔަ އަހަރުއެވެ. އެ ކުލަބާއެކު މެސީ ހަދާފައިވަނީ ދެ އަހަރު ދުވަހުގެ އެއްބަސްވުމެކެވެ. ގިނަ އަހަރުތަކަށްފަހު ބާސެލޯނާ ދޫކޮށް ޕީއެސްޖީއަށް ބަދަލުވި ފުރަތަމަ އަހަރުގައި މެސީއަށް މާ އެދެވޭ ކުޅުމެއް ދެއްކިފައެއް ނުވެއެވެ. ނަމަވެސް، މި ސީޒަންގައި އޭނާ އަންނަނީ ޕީއެސްޖީއާއެކު މޮޅު ކުޅުމެއް ދައްކަމުންނެވެ. ގޯލު ޖެހުުގެ އިތުރުން މެސީ އަންނަނީ ގޯލު ޖެހުމަށް އެހީތެރިވެސް ވެދެމުންނެވެ.

ޕީއެސްޖީއާއެކު މެސީ ހަދާފައިވާ އެއްބަސްވުމުގެ މުއްދަތު ހަމަވާނީ އަންނަ އަހަރުގެ ޖޫން މަހުގެ ނިޔަލަށެވެ. އަލުން އަނބުރާ މެސީ ބާސެލޯނާއަށް ގެންދަން އެ ކުލަބުން ބޭނުންވާ ކަމަށް އަޑުތައް ވަނީ ފެތުރިފައެވެ. ނަމަވެސް ދާދި ފަހުން މެސީ ބުނީ، ޕީއެސްޖީގައި ހިތްހަމަ ޖެހޭ ކަމަށާއި، މިދިޔަ އަހަރަށްވުތެ މިއަހަރު ތަފާތު ކަމަށެވެ. އޭނާ ބުނީ ޕީއެސްޖީއަށް ބަދަލުވީއިރު ވެސް އެކަން އެގޮތަށް ވާނެ ކަން އެނގޭކަމަށެވެ.

އިތުރަށް ވާހަކަ ދައްކަމުން މެސީ ބުނީ ކުލަބާ މެދު ވެސް އޭނާ ހިތްހަމަ ޖެހޭ ކަމަށާއި، ކުޅުންތެރިންގެ ފަރާތުން އެއްބާރުލުން ވެސް ލިބޭ ކަމަށެވެ. އަދި މެސީ ބުނީ ޕީއެސްޖީއާއެކު ކުރިއަށް ގޮސް، ގިނަ ކާމިޔާބުތައް ހޯދަން ބޭނުންވާ ކަމަށެވެ.

މެސީ ވަނީ ޕީއެސްޖީއަށް ބަދަލުވެ މިހާތަނަށް އެ ޓީމަށް ކުޅެދިން 45 މެޗުގައި 17 ލަނޑު ޖަހާފައެވެ.