ދެކުނު ކޮރެޔާގެ ޖަންގައްޔެއްގައި އަލިފާން ރޯވެ އެކަކު މަރުވެ 4000 މީހުން ސަލާމަތުގެ އައްސޭރި އަށް ގެންގޮސްފިއެވެ.

ކަންވަންޑޫ ޕްރޮވިންސްގެ ޕަޔާރ ކެޕްޓަން ޗޮއި ޖިންހޯ ވިދާޅުވީ، އެ އަލިފާން ހިފާފައިވަނީ ކަންވަންޑޫ ޕްރޮވިންސްގެ ރިސޯޓެއްގެ ކައިރި  އޮންނަ ޖަންގަލީގައި ކަމަށެވެ.  

ދެކުނު ކޮރެޔާގެ ސަރުކާރުން ބުނީ، އެ އަލިފާންގަނޑު ސޮކޯ އިތުރުން ކަންވަންޑޫ ސިޓީގެ ސަރަހައްދުތަކަށް ފެތުރި 525 ހެކްޓަރުގެ ސަރަހައްދެއް އަނދާފައިވާ ކަމަށެވެ. އަދި 198 ގެއެއް އެއްކޮށް އަނދާ އަޅިއަށް ވެފައިވާ ކަމަށްވެސް އެ ގައުމުގެ ސަރުކާރުން ބުންޏެވެ.

އެ ސަރަހައްދުގައި ހުރި ގުދަން ތަކުގެ އިތުރުން ބައެއް އިމާރާތްތަކަށް ވެސް އަލިފާނުގެ އަސަރު ވަނީ ކޮށްފައެވެ.

 ބުރާސްފަތި ދުވަހު ހިނގި މި ހާދިސާގައި 4230 މީހަކު ރައްކާތެރި ހިސާބަކަށް ގެންގޮސްފައިވާ ކަމަށާއި، ޖިމްއާ ސްކޫލުތަކުން އިތުރު 2263 މީހުން ރައްކާތެރި ހިސާބުތަކަށް ގެންގޮސްފައިވާ ކަމަށް ރިޕޯޓްތައް ބުނެއެވެ.

 އަލިފާނުގެ އަސަރު ކުރުމުގެ ސަބަބުން 52 ސްކޫލެއް ވަނީ ބަންދު ކޮށްފައެވެ.

 ސޮކޯ އަދި ކަންވަންޑޫ ޕްރޮވިންސްގައި ރޯވި އަލިފާންގަނޑުގެ ތެރެއިން 50 ޕަސެންޓް ނިއްވާލެވިފައިވާ ކަމަށް ކޮރެޔާގެ ނެޝަނަލް ފަޔާރ އެޖެންސީން މައުލޫމާތުދެއެވެ.  އަލިފާން ނިއްވުމުގެ މަސައްކަތުގައި 872 އަލިފާން ނިއްވާ ލޮރީގެ އިތުރުން 3251 ފަޔަރ ފައިޓަރުން ދަނީ ހަރަކާތްތެރި ވަމުންނެވެ.

 ކޮރެޔާގެ ޑިފެންސް މިނިސްޓްރީން ބުނީ، 16،500 ސިފައިންނާއި 32 މިލިޓަރީ ހެލިކޮޕްޓަރުގެ އިތުރުން 26 މިލިޓަރީ ފަޔަ ޓްރެކްޓަރު ހަރަކާތްތެރިވަމުންދާ ކަމަށެވެ.

ސޯޝަލް މީޑިއާގައި ދައުރުވަމުންދާ ވީޑިއޯ އިން ފެންނަނީ، ޖަންގަލީގައި އަލިފާން ގަނޑު ރޯވެ ކަނިތައް ބުރައިގެން ދާތަނެވެ.

 އަލިފާން ރޯވި ސަރަހައްދަކީ ދެކުނު ކޮރެޔާއާ އަވަށްޓެރި އުތުރު ކޮރެޔާގެ ބޯޑަރާއި ކައިރީ ސަރަހައްދަކަށް ވާތީވެ ދެކުނު ކޮރެޔާގެ ޔުނިފިކޭޝަން މިނިސްޓްރީން ދަނީ އަލިފާނުގެ ހާދިސާއާ ބެހޭ އެންމެ ފަހުގެ މައުލޫމާތު އެގައުމަށް ދިނުމަށް މަސައްކަތް ކުރަމުންނެވެ.

 ނަންހާމަ ނުކުރުމަށް ޝަރުތު ކޮށް އަލްޖަޒީރާ އަށް ވާހަކަ ދެއްކެވި އޮފިޝަލަކު ވިދާޅުވީ، އަލިފާނުގައި ޒަހަމްވުމުގެ ސަބަބުން 11 މީހަކަށް ހޮސްޕިޓަލުގައި ފަރުވާދެމުންދާ ކަމަށެވެ