ގްރެންފެލް ޓަވަރުގެ އަލިފާނުގެ ހާދިސާއަކީ ލޯކަލް ކައުންސިލް އަދި ކާމިޔާބު ސަރުކާރުތަކުގެ "އެތައް އަހަރެއްގެ އިހުމާލު"ކަމަަށް ލަންޑަންގެ މޭޔަރ ސާދިގް ޚާން ވިދާޅުވެއްޖެއެވެ.

މަރުވި މީހުންގެ ޖަނާޒާއަށް ހާޒިރުވެ ވަޑައިގަތުމަށްފަހު ޚާން ވިދާޅުވީ އަލިފާނުގެ ހާދިސާއަކީ ގައުމީ ކާރިސާއެއް ކަމަށާއި ގައުމީ އިޖާބައެއް ބޭނުންވާ ކަމެއްކަމަށެވެ.

ކެންސިންގްޓަން އަދި ޗެލްސީ ކައުންސިލްގެ ލީޑަރު ވިދާޅުވީ ބުދަ ދުވަހު ހިނގި ހާދިސާއަށްފަހު ސައްވީސް ގަޑިއިރު އޮފިޝަލުން މަސައްކަތް ކުރަމުންދާކަމަށެވެ.

ސަރުކާރުން ބުނެފައިވަނީ ގެދޮރު ގެއްލުނު ފަރާތްތަކަށް 5،500 ޕައުންޑް ދިނުމަށް ނިންމާފައިވާކަމަށެވެ.

ހުކުރު ދުވަހު އިއުލާނުކުރި 5 މިލިއަން ޑޮލަރުގެ އިމަރޖެންސީ ފަންޑުން ކޮންމެ ގޭ ބިސީއަކަށް މަދުވެގެން 500 ޕައުންޑް ނަގުދުު ފައިސާއިން ދޭއިރު އެކައުންޓަށް 5000 ޕައުންޑު ޖަމާކުރެވިގެންދާނެއެވެ.

ކެންސިންގޓަންގައި ހުންނަ 24 ބުރީގެ އިމާރާތުގައި ބުދަ ދުވަހުގެ ރޭގެ ވަގުތެއްގައި ހިނގާފައިވާ އަލިފާނުގެ ހާދިސާގައި މަރުވި މީހުންގެ އަދަދު މަދުވެގެން 58 އަށް އަރާނެ ކަމަށް ކަމާބެހޭ ފަރާތްތަކުން މިހާރުވަނީ ލަފާކޮށްފައެވެ.

މަރުވި މީހުންގެ ތެރެއަށް އިތުރުވީ އަދަދު ހޯމަ ދުވަހު ފުލުހުން ހާމަ ކުރާނެކަމަށް ބެލެވެއެވެ.

ބީބީސީން ބުނެފައިވަނީ 70 މީހަކު މަރުވިކަން އެނގިފައިވާކަމަށެވެ.

އަށާރަ މީހަކު ހޮސްޕިޓަލްގައި އެޑްމިޓްކޮށްފައިވާއިރު ނުވަ މީހެއްގެ ހާލު ނާޒުކު ކަމަށް އޮފިޝަލުން ބުނެއެެވެ.