ނީސް އިން ޕޮޗެޓީނޯއާ މަޝްވަރާ ކުރި، ކުލަބުގެ ހުށަހެޅުން އޭނާ ޤަބޫލު ނުކުރި!
24 ސެޕްޓެމްބަރު 2022 | ހޮނިހިރު 09:23ޕޮޗެޓީނޯ ބޭނުންވަނީ އެހެން ކުލަބެއްގެ ހުށަހެޅުމެއް ކަމަށް ރިޕޯޓުތަކުގައިވޭ
ޕޮޗެޓީނޯ
ފްރާންސް ލީގުގެ ނީސް އިން އާޖެންޓީނާގެ މައުރީސިއޯ ޕޮޗެޓީނޯއާ މަޝްވަރާ ކުރި ކަމަށާއި، ނަމަވެސް އޭނާ ހުށަހެޅުން ޤަބޫލު ނުކުރީ ކަމަށް ބޭރުގެ މީޑިއާތަކުގައި ރިޕޯޓުކޮށްފިއެވެ.
ނީސް އިން އެ ޓީމުގެ ކޯޗަކަށް ޕޮޗެޓީނޯ ގެންނަން މަސައްކަތް ކުރާ ކަމަށް އަޑުތައް ފެތުރެމުން ދަނިކޮށް، އެ ކުލަބުގެ ރައީސް ވިދާޅުވީ ކޯޗު ބަދަލުކުރަން ނޫޅޭ ކަމަށެވެ. އޭނާ ވިދާޅުވީ ނީސްގެ ފަރާތުން އެއްވެސް މީހަކު ޕޮޗެޓީނޯއާ ނުވަތަ އޭނާގެ އެޖެންޓަކާ ވެސް މަޝްވަރާކޮށްފަ ނުވާނެ ކަމަށެވެ.
އެ ކުލަބުގެ ރައީސް އެހެން ވިދާޅުވި ނަމަވެސް، ފްރާންސްގެ މީޑިއާތަކުގައި ބުނެފައިވާ ގޮތުން، ޕޮޗެޓީނޯ ގެނައުމަށް އެކުލަބުން މަސައްކަތް ކުރިއެވެ. ނަމަވެސް އޭނާ އެ ކުލަބުގެ ހުށަހެޅުން ޤަބޫލު ނުކުރި ކަމަށާއި، ޕޮޗެޓީނޯ ބޭނުންވަނީ އެހެން ކުލަބެއްގެ ހުށަހެޅުމެއް ކަމަށް ވެސް ރިޕޯޓުގައި ވެއެވެ.
ޕޮޗެޓީނޯ އެންމެ ފަހުން ހުރީ ފްރާންސްގެ ޕެރިސް ސެއިންޓް ޖާމަން (ޕީއެސްޖީ)ގެ ކޯޗު ކަމަށެވެ. ނަމަވެސް ނިމުނު ސީޒަންގެ ޗެމްޕިއަންސް ލީގުން އެ ޓީމު ކެޓުމާއެކު، މިއަހަރު ވަނީ އޭނާ މަގާމުން ވަކިކޮށްފައެވެ. އެ މަގާމަށް ދެން ގެނައީ މިހާރުގެ ކޯޗު ކްރިސްޓޮފާ ގަލްޓިއޭއެވެ.
އުމުރުން 50 އަހަރުގެ ޕޮޗެޓީނޯ ވަނީ މީގެ ކުރިން ވެސް ގިނަ ކުލަބުތަކަށް ކޯޗުކަން ކޮށްދީފައެވެ. އޭގެ ތެރޭގައި އެސްޕަންޔޯލް، ސައުތުހެމްޓަން، ޓޮޓެންހަމް އަދި ޕީއެސްޖީ ހިމެނެއެވެ.
