އިނގިރޭސި ކްލަބް ސަންޑަލޭންޑާ މަޝްވަރާ ކުރިކަމަށް ބަލްގޭރިއާގެ ފޯވާޑް ޑިމިޓާ ބާބެޓޯވް ބުނެފި އެވެ.
ސްކައި ސްޕޯޓްސް އަށް ދިން އިންޓަވިއުއެއްގައި ބާބެޓޯވް ބުނީ އޭނާ އަދިވެސް ކުޅެން ބޭނުންވާ ކަމަށާއި، ސަންޑަލޭންޑްގެ ކޯޗު ޑޭވިޑް މޮއިސްއާވެސް އެކަމާ ބެހޭގޮތުން މަޝްވަރާކޮށްފައިވާނެ ކަމަށެވެ.
އެގޮތުން ބާބެޓޯވް ބުނީ ފްރީ ޓްރާންސްފާއެއްގެ ދަށުން އެ ކްލަބަށް ބަދަލުވާން ހުށަހަޅާފައިވެސް ވާނެ ކަމަށެވެ. އެހެންނަމަވެސް އެންމެ ފަހުވަގުތު އެއްވެސް ކަމެއް ފުރިހަމަކުރެވިފައިނުވާ ކަމަށެވެ.
އަދިވެސް ފުޓުބޯޅަ ކުޅެން ބޭނުންވާކަމަށް ފާހަގަކުރަމުން ބާބެޓޯވް ބުނީ އެއް މެޗު ނަމަވެސް ނުވަތަ އެއް އަހަރު ނަމަވެސް ދަނޑުމަތީގައި ހަރަކާތްތެރިވާން ބޭނުންވާ ކަމަށެވެ.
ޕްރިމިއާ ލީގުގައި ހުރިހާ ކުޅުންތެރިންވެސް ކުޅެން ބޭނުންވާ ކަމަށާއި، އެއީ ކޮންމެ ކުޅުންތެރިޔަކުވެސް ދެކޭނެ ހުވަފެނެއް ކަމަށްވެސް ބާބެޓޯވް ވަނީ ބުނެފައެވެ. އެގޮތުން އޭނާ ބުނީ ކުރިޔަށް އޮތްތަނުގައި ވާނެ ގޮތެއް އަދި ނޭނގޭ ކަމަށެވެ.
މިދިޔަ ސީޒަނުގައި ގްރީސްގެ ޕައޮކް އެފްސީ އަށް ކުޅުމަށްފަހު ބާބެޓޯވް އެއްވެސް ކްލަބަކަށް އަދި ކުޅެފައެއްނުވެއެވެ. އެހެންނަމަވެސް އުމުރުން 36 އަހަރުގެ ބާބެޓޯވް ވަނީ އޭނާގެ ކެރިޔަރުގައި ގިނަ ކްލަބްތަކަށް ކުޅެފައެވެ.
އެގޮތުން މެންޗެސްޓާ ޔުނައިޓެޑް، ޓޮޓެންހަމް ހޮޓްސްޕާސް، މޮނާކޯ އަދި ފުލަމް އަށްވެސް އޭނާ ވަނީ ކުޅެފައެވެ. ބާބެޓޯވް އެންމެ ކާމިޔާބު ސީޒަންތައް ހޭދަކޮށްފައިވަނީ ޔުނައިޓެޑްގައެވެ. އޭނާ ވަނީ އެ ކްލަބާއެކު ދެ ޕްރިމިއާ ލީގު، ފުޓްބޯލް ލީގް ކަޕް، އެފްއޭ ކޮމިއުނިޓީ ޝިލްޑް ދެފަހަރު އަދި ފީފާ ކްލަބް ވޯލްޑް ކަޕް އެޓީމާއެކު ކާމިޔާބުކޮށްފައެވެ.
