ޕޮޓާ ބޭނުންވަނީ ޗެލްސީއަށް ކޭން ގެންނަން

ޓޮޓެންހަމަށް ކުޅެމުން އަންނަ އިންގްލެންޑުގެ ފޯވާޑް ހެރީ ކޭން އަކީ ގްރަހަމް ޕޮޓާ ޗެލްސީއަށް ގެންނަން ބޭނުންވާ ކުޅުންތެރިޔެެއް ކަމަށް މީޑިއާ ރިޕޯޓުތައް ބުނެފިއެވެ.

ބޭރުގެ ބައެއް މީޑިއާތަކުގައި ރިޕޯޓުކޮށްފައިވާ ގޮތުގައި، ޕޮޓާ ބޭނުންވަނީ ޗެލްސީއަށް ކުޅުންތެރިން ގެނައުމަށެވެ. މި ސީޒަނަށް ޗެލްސީ ވަރުގަދަ ކުރުމަށް އެ ޓީމުން ވަނީ މެންޗެސްޓަރ ސިޓީއަށް ކުޅެމުން އައި ރަހީމް ސްޓާލިން އާއި ބާސެލޯނާއަށް ކުޅެމުން އައި އޮބާމަޔަން ވެސް ހޯދާފައެވެ. އެއީ ޗެލްސީގެ ކޯޗުކަމުގައި އޭރު ހުރި ތޯމަސް ޓުޗެލް ބޭނުންވެގެން އެ ޓީމުން ހޯދި ކުޅުންތެރިންނެވެ. ނަމަވެސް އެ ކުޅުންތެރިންނާއެކު ވެސް ޗެލްސީގެ ނަތީޖާ ދަށްވުމުން ޓުޗެލް މަގާމުން ދުރުކޮށް، އެ މަގާމަށް ވަނީ ޕޮޓާ ހަމަޖައްސާފައެވެ.

ރިޕޯޓުތައް ބުނާ ގޮތުގައި ކޭން އަކީ ޕޮޓާއަށް ވަރަށް ކަމުދާ ކުޅުންތެރިޔެކެވެ. މިދިޔަ ސީޒަނާއި މި ސީޒަންގައި ކޭން އަންނަނީ ވެސް މޮޅު ކުޅުމެއް ދައްކަމުންނެވެ. ޕޮޓާގެ ޓާގެޓަކީ ޗެލްސީގެ ފޯވާޑް ލައިން ވަރުގަދަ ކުރުމާއި، ގޯލު ޖަހާނެ ކުޅުންތެރިޔަކު ހޯދުން ކަމަށް ވެސް އެ ރިޕޯޓުގައިވެއެވެ.

ޓޮޓެންހަމާއެކު ކޭން ހަދާފައިވާ އެއްބަސްވުމުގައި ބާކީ އަދި ދެ އަހަރު އެބައޮތެވެ. އެއްބަސްވުމުގެ މުއްދަތު ހަމަވާނީ 2024 ވަނަ އަހަރުއެވެ. މިހާތަނަށް ޓޮޓެންހަމްގެ ކޯޗު އެންޓޯނިއޯ ކޮންޓޭ ވަނީ އެ ޓީމުން ކޭން ދޫނުކުރާނެ ކަމަށް ބުނެފައެވެ. އޭނާ ވަނީ ކޭން އަކީ އޭނާގެ ޕްލޭންގައި ހިމެނޭ އެންމެ މުހިންމު ކުޅުންތެރިޔާކަމަށް ވެސް ބުނެފައެވެ.